TMD Bas prokýrorlary Úılestirý keńesiniń otyrysy ótti

ASTANA. 27 tamyz. Elordadaǵy Táýelsizdik saraıynda TMD-ǵa qatysýshy memleketter Bas prokýrorlarynyń Úılestirý keńesiniń 25-shi otyrysy bolyp ótti. Bul týraly Bas prokýratýranyń baspasóz qyzmeti habarlady. Forým jumysyna elimizdiń bas prokýrory Ashat Daýylbaev, Armenııa Respýblıkasynyń bas prokýrory Gevorg Kostanıan, Belarýs Respýblıkasynyń bas prokýrory Aleksandr Konıýk, Qyrǵyz Respýblıkasynyń bas prokýrory Indıra Djoldýbaeva, Reseı Federasııasynyń bas prokýrory Iýrıı Chaıka, Tájikstan Respýblıkasynyń bas prokýrory Iýsýf Rahmon, Ázerbaıjan Respýblıkasy bas prokýrorynyń orynbasary Rýstam Ýsýbov, Moldova Respýblıkasy bas prokýrorynyń orynbasary Iýrıı Garabanyń basshylyǵymen TMD Bas prokýratýralarynyń delegasııalary, sondaı-aq TMD Atqarýshy komıtetiniń tóraǵasy Sergeı Lebedev jáne TMD BPÚK atqarýshy hatshysy Leonıd Ermolaev qatysty. Forým delegattarynyń aldynda sóz sóılegen Qazaqstan Respýblıkasy Prezıdentiniń kómekshisi – Qaýipsizdik Keńesiniń hatshysy Nurlan Ermekbaev TMD aıasynda ózara yntymaqtastyqtyń basym baǵyttaryn odan ári damytý qajettiligine basa nazar aýdardy. TMD-ǵa qatysýshy memleketter Bas prokýrorlarynyń Úılestirý keńesiniń tóraǵasy, Reseı Federasııasynyń bas prokýrory Iýrıı Chaıka óz sózinde aımaqtaǵy qaýipsizdiktiń jańa qaýip-qaterleriniń paıda bolýy aıasynda qarastyrylatyn máselelerdiń mańyzdylyǵy men ózektiligin atap ótti. Otyrysqa tóraǵalyq etken Qazaqstan Respýblıkasynyń bas prokýrory búginde BPÚK-niń memleketaralyq qyzmette mańyzdy oryn alatynyn, onyń tikeleı qatysýymen yntymaqtastyq máseleleri boıynsha qajetti kelisim-sharttyq baza jasalǵanyn, ulttyq zańdardy jaqyndatý boıynsha, sonyń ishinde Eýrazııalyq odaq aıasynda usynystar ázirlenip jatqandyǵyn atap aıtty. Keńestiń áleýetin odan ári kúsheıtý Dostastyqtyń prokýratýra organdaryna quqyq tártibin qamtamasyz etý boıynsha ortaq maqsat-mindetterge jetý jónindegi birlesken jumysty oryndaýǵa múmkindik beredi. Osy turǵyda qatysýshylar bas prokýratýralardyń aqparattyq tehnologııalardy engizý, qylmyspen, sybaılas jemqorlyqpen, esirtki, psıhotroptyq zattardyń jáne olardyń prekýrsorlarynyń zańsyz aınalymymen kúresý, ekstremızm jáne terrorızmge qarsy áreket etý, nashaqorlyq, azamattardy ekstremıstik uıymdarǵa tartý, adamdardy satý jáne zańsyz kóshi-qon boıynsha jumys tájirıbesin talqylady jáne taldady. Delegattar atap ótkendeı, azamattardyń quqyqtary men bostandyqtaryn qorǵaý boıynsha qazirgi zamanǵy strategııalyq mindetter kontekstinde memleketterdiń quqyq qorǵaý organdarynyń transulttyq qylmyspen kúrestegi úılesimdi ózara áreket etý qajettiligi týraly máseleniń ózektiligi odan ári arta túsedi. Úılestirý keńesiniń týy jáne eltańbasy týraly erejeler, sondaı-aq BPÚK-tiń Salyqtyq (qarjylyq) tergeý organdary basshylarynyń Úılestirý keńesimen jáne TMD elderiniń Qarjylyq barlaý bólimsheleri basshylarynyń keńesimen ózara áreketti reglamentteıtin qujattar maquldandy. Otyrys barysynda forým delegattary Reseı Federasııasynyń bas prokýrory Iýrıı Chaıkany bir aýyzdan TMD-ǵa qatysýshy memleketter Bas prokýrorlarynyń Úılestirý keńesiniń tóraǵasy etip qaıta saılady. Sondaı-aq TMD BPÚK-niń kezekti 26-shy otyrysy 2016 jyly Belarýs Respýblıkasynda ótkiziletini jóninde sheshim qabyldandy. Talqylaý nátıjeleri boıynsha TMD-ǵa qatysýshy memleketter Bas prokýratýralarynyń basshylary aldaǵy kezeńde halyqaralyq yntymaqtastyq salasynda, prokýrorlyq qadaǵalaýdyń negizgi baǵyttary jónindegi oń tájirıbemen almasýdy jalǵastyrý jáne olardy praktıkalyq qyzmette paıdalaný boıynsha basym mindetterdi anyqtaıtyn kún tártibiniń barlyq máseleleri boıynsha sheshimder qabyldady. Qorytyndy sheshimderge qol qoıylǵan soń Táýelsiz Memleketter Dostastyǵyna qatysýshy memleketter Bas prokýrorlarynyń Úılestirý keńesi qurylýynyń 20-jyldyǵy qurmetine TMD Bas prokýratýralary men organdarynyń ókilderin mereıtoılyq medaldarmen saltanatty túrde marapattaýdyń resmı rásimi ótti. Zańdylyqty, adamnyń jáne azamattyń quqyqtary men bostandyqtaryn qamtamasyz etý, qylmyspen kúresý salasynda TMD-ǵa qatysýshy memleketterdiń bas prokýratýralarynyń yntymaqtastyǵyn jáne ózara áreket etýin uıymdastyratyn, Dostastyqtyń memleketaralyq organy bolyp tabylatyn Táýelsiz Memleketter Dostastyǵyna qatysýshy memleketter Bas prokýrorlarynyń Úılestirý keńesi 1995 jylǵy 7 jeltoqsanda qurylǵan. 2000 jylǵy 25 qańtardaǵy Dostastyqqa qatysýshy-memleketterdiń basshylary Keńesiniń sheshimimen oǵan TMD-nyń memleketaralyq organy mártebesi berilgen. Osy qujatqa Ázerbaıjan Respýblıkasy, Armenııa Respýblıkasy, Belarýs Respýblıkasy, Grýzııa, Qazaqstan Respýblıkasy, Qyrǵyz Respýblıkasy, Moldova Respýblıkasy, Reseı Federasııasy, Tájikstan Respýblıkasy jáne Ýkraına qol qoıǵan. Aıdar О́risbaev. Derek, sýret: Bas prokýratýranyń baspasóz qyzmeti