«Qaırat» jeńgenimen, toptyq kezeńge shyǵa almady (vıdeo)

ASTANA. 27 tamyz. Búgin Almatyda jergilikti «Qaırat» komandasy Eýropa lıgasy pleı-off kezeńiniń qarymta matchyn fransýzdyń «Bordosymen» ótkizip, 2:1 esebimen jeńiske jetti. Biraq bul esep ony toptyq kezeńge shyǵara almady. Bul týraly ras.kz habarlady. Eki komandanyń budan bir apta buryn Bordoda kezdeskende, match 1:0 esebimen alań ıeleriniń paıdasyna sheshilgen edi. Qonaqtardyń bul joly syrt alańda soqqan bir doby olardy kelesi kezeńge alyp shyqty.   «Qaırat» (Almaty, Qazaqstan) – «Bordo» (Bordo, Fransııa) 2:1 (1:0) 27 tamyz. Almaty. Ortalyq stadıon. 26 242 kórermen. Tóreshiler: Bas Neısheıs, Rob van de Van, Harles Shap (bári – Nıderland). «Qaırat»: Vladımır Plotnıkov, Brýno Soares, Jarko Markovıch, Ermek Qýantaev (Jambyl Kókeev, 87), Islambek Qýat, Mıhaıl Bakaev, Baýyrjan Islamhan (Djordje Despotovıch, 82), Isael, Anatolıı Tımoshýk, Jerar Goý, Sıto Rıera. «Bordo»: Jerom Prıor, Nıkolıa Pallýa, Sedrık Iаmbere, Maksım Pýndj, Frederık Gılbert, Abdý Traore (Davıd Sımbassa, 69), Andre Bııogo Poko, Vahbı Hazrı, Dıego Rolan (Enso Krıvellı, 69), Anrı Seve, Isaak Telın. Goldar: Sedrık Iаmbere 1 (avtogol), Islambek Qýat 66, Enso Krıvellı 77 Eskertýler: Anatolıı Tımoshýk 38 – Abdý Traore 21, Vahbı Hazrı 39, Sadrık Iаmbere 64, Enso Krıvellı 85 Birinshi oıyn – 0:1.   Almatylyqtar oıyn bastalar-bastalmastan ózindik bir rekord jasady. Olar matchtyń 44-sekýndynda esep ashty. Dáliregi, qaqpa alańyndaǵy Jerar Goýdan saqtanǵan qorǵaýshy Sedrık Iаmbere dopty alań syrtyna jibermekshi bolyp tepken kezinde, ony tordan bir-aq shyǵaryp aldy. Al dopty munda sol qaptaldan Sıto Rıera tastaǵan edi. Alań ıeleri budan keıin de birneshe qaýipti joryqtar uıymdastyrdy. Biraq olardan nátıje shyǵarýdyń yńǵaıy kelmedi. Munyń ornyna birte-birte «Bordo» oıyn tizginin óz qolyna ustaı bastady. Osy dúmpýmen fransýzdar birneshe ret shabýyl da uıymdastyryp kórdi. Bul aralyqta qaırattyqtar da qarap qalmady. Matchtyń ekinshi bóligi meımandardyń shabýylymen bastaldy. Olardyń áreketteri barǵan saıyn qaýipti bola tústi. Biraq goldy taǵy da almatylyqtar salyp ketti. Ony Isaeldiń bergen aıyp dobyna jurttyń bárinen buryn aıaǵyn tósep úlgergen Islambek Qýat saldy. Osylaısha 2:0 esebimen alǵa shyqqan «Qaırat» úmittiń otyn burynǵydan beter úrleı tústi. Alaıda, arada 11 mınýt ótkennen keıin qonaqtar bul úmittiń talqanyn shyǵardy. Qaqpa aldyndaǵy qarbalas sátinde ókshesimen dopty syrǵyta salǵan Enso Krıvellı ony qaqpa torynan bir-aq shyǵardy. Budan keıin almatylyqtardyń jaǵdaıdy túzeý úshin jasaǵan áreketteri júzege aspady. Osylaısha eki oıynnyń qorytyndysymen fransýz klýby kelesi kezeńge joldama aldy. Talǵat Raıymbek. https://youtu.be/Q9qlpMFz6Sc