Elbasy Nursultan Nazarbaev 8 naýryz – Halyqaralyq áıelder kúnine arnalǵan «Júregimniń jyry» atty merekelik konsertti tamashalady.
Qazaqstan Prezıdenti elimizdiń názik jandy áıelder qaýymyn mereıli merekemen quttyqtap, halqymyz áıel zatyn árdaıym aıryqsha qurmettegenin atap kórsetti.
– Zaýaly kóp zamanda qazaq qyzdary qıyndyqqa tózip, únemi qaısarlyq tanytty. Aıaýly arýlar táýelsizdik alǵan jyldary da aýyrtpalyqty qaıyspaı kóterdi. Jas memleketimizdiń keregesin keńeıtip, irgesin nyǵaıtýǵa sizder de aıryqsha úles qostyńyzdar. Sizderdiń eseli eńbekterińiz eńseli elimizdiń damýyna erekshe serpin berdi, – dedi Memleket basshysy.
Nursultan Nazarbaev áıelder árbir otbasynyń baq-berekesi jáne Qazaqstannyń básekege qabilettiliginiń negizi ekendigine toqtaldy.
– Búgingi zamanda áıeldiń qoǵamda atqaratyn róli arasyndaǵy aıyrma qarqyndy ulǵaıyp keledi. Bir polıýstiń basynda – áıelderi otbasy tóńireginde shektelgen elder, al ekinshi polıýste – kerisinshe, áıelderi balalaryna, urpaq jalǵastyǵyna degen sezimderinen aıyrylyp, otbasynan jedel alystap bara jatqan memleketter tur. Osy eki polıýs ortasyndaǵy bizdiń elimizdiń jaǵdaıy – naǵyz «altyn aralyq». Bizdegi áıelder jumysta, shyǵarmashylyqta, sportta, ǵylymda tabystarǵa jetýde. Sonymen qatar, otbasynyń da saqtaýshysy bolyp qalyp otyr. Munyń qanshalyq qıyn ekenin túsine otyryp, memleket sizderge járdemdesýge tyrysady, aýyrtpalyqtyń bir bóligin ózine alady. Bul qoldaý jalǵasa beretin bolady, – dedi Qazaqstan Prezıdenti.
Memleket basshysy Qazaqstan arýlary áıel-ana jáne áıel-maman beınesin úılestire alyp kele jatqanyna nazar aýdardy.
– Qazaqstandyq áıelderdiń qaıtalanbas osy ereksheligi – qoǵamymyzdyń sondaı myqty tiregi ári bizdiń etnosaralyq jáne dinaralyq kelisim úlgisi sııaqty tanymal brendimiz. Bizdiń áıelder otbasylyq qarym-qatynasty árdaıym batyl qorǵady. Osy zalda otyrǵan jáne Qazaqstan qoǵamynyń barlyq názik jandy qaýymy ókilderine aıtarym: esh ásireleýsiz aıtsaq, bizdiń ulttyq baılyǵymyz – sizdersizder, – dedi Nursultan Nazarbaev.
Qazaqstan Prezıdenti áıelderdiń týmysynan senimdi tirek izdeýge beıim ekenin, ony tapqan soń da minsizdikke qaraı umtylýyn toqtatpaıtynyn aıtty. Memleket basshysy mundaı ustanym qarqyndy ári úılesim tapqan Qazaqstan jolynyń túpki arqaýy ekenin atap ótti.
Nursultan Nazarbaev elimizdiń basymdyǵynyń biri laıyqty urpaq tárbıeleý bolyp sanalatynyna toqtaldy.
– Bul iste ananyń ǵalamat qajyr-qýatyn eshteńe almastyra almaıdy. Eger árbir otbasynda ana mahabbaty jalyndap tursa, onda búkil el kelisim men ósip-órkendeýdiń araıly shýaǵyna bólenetin bolady. Jynysqa, dinge, ultqa qaramastan, bizdiń bárimizdiń ortaq qazaqstandyq armanymyz bar. Bizdiń armanymyz – basynda baspanasy bar, balalarǵa jaqsy bilim bere alatyn jáne olardyń bolashaǵyna senimdi úlken ári berik otbasy. Bul rette áıelderdiń eńbegine baǵa jetpeıdi, men sizderdiń árqaısyńyzǵa rızamyn, – dedi Memleket basshysy.
Qazaqstan Prezıdenti mereıli merekemen taǵy da quttyqtap, árbir áıel zaty men qazaqstandyq otbasyna jylylyq, shattyq jáne kelisim tiledi.
Memleket basshysy konsert bastalmas buryn «Jasampaz Astana» fotokórmesin aralap kórdi, sondaı-aq, osy jobaǵa qatysýshy áıeldermen áńgimelesti.
Konsertte belgili otandyq ártister men shyǵarmashylyq ujymdar óner kórsetti. Qoıylym túrli mýzykalyq janrdy qamtydy, olardyń keıbiri horeografııalyq kórinistermen súıemeldendi.
Asqar TURAPBAIULY,
«Egemen Qazaqstan».
Sýretterdi túsirgender
S.BONDARENKO, B.OTARBAEV.
