Jaqynda «Kerýen» saýda, oıyn-saýyq ortalyǵynda «Bolashaq» qaýymdastyǵy, «Nur Otan» partııasy, «Báıterek» holdıngi jáne «Meloman» kompanııasynyń uıymdastyrýymen Halyqaralyq áıelder kúni qurmetine dısneılik «Kúlshe qyz» (Zolýshka) ertegisiniń qazaq tilindegi kórsetilimi tusaýyn kesti. Bul osymen qazaq tiline aýdarylǵan 10-shy gollıvýdtyq blokbaster bolyp sanalady.
Bes jylda atqarylǵan osynaý is-shara kórermen úshin, qazaq tilin damytý jolyndaǵy maqsat-múdde úshin kórermenderge úlken olja bolyp tabylady. Aıta ketý kerek, «Mádenıet týraly» Zańǵa sáıkes 2012 jyldyń 1 qańtarynan bastap prokat úshin Qazaqstanǵa ákelingen barlyq fılmder memlekettik tilde dýblıajdalýy tıis. Sonyń ishinde Gollıvýd fılmderin dýblıajdaýdy «Bolashaq» qaýymdastyǵy «Nur Otan» partııasynyń qoldaýymen «Jastar – Otanǵa!» atty jastar jobasy sheńberinde júzege asyrýda.
Týǵan tilimizde jaryq kórgen alǵashqy blokbasterlerdiń biri – «Kólikter-2» (Tachkı-2) mýltfılmin 2011 jyly baldyrǵan kórermender tamashalaý múmkindigine ıe bolsa, atalmysh joba Elbasy tarapynan joǵary baǵaǵa ıe boldy. О́ziniń bolashaqtyqtarǵa arnaǵan tilek sózinde Nursultan Nazarbaev: «Qazaq tili – tamyryn tereńge tartqan erekshe baı, kórkem til. Ol búginde jan-jaqty damyp, halyqaralyq tilge aınalý ústinde. Bul bastama aldaǵy ýaqytta da jalǵasyn taýyp, jas urpaq ıgiligine jaraı beredi dep senemin», – degen bolatyn. Al qazirgi tańda tanymal blokbasterlerdi qazaq tiline aýdaryp, usyný elimizdi álemge tanytýdaǵy taǵy bir mańyzdy jobaǵa aınalyp, tilderdi damytý baǵdarlamasy men «Máńgilik El» jalpyulttyq ıdeıasynyń júzege asýyna edáýir yqpalyn tıgizýde.
Álemdik kınoındýstrııa kóshbasshylary – Marvel,Walt Disney, Sony Pictures, Metro-Goldwyn-Mayer fılmderi joǵary tehnologııalyq dýblıajdyń nátıjesinde sózsiz ulttyq qundylyqtarǵa aınaldy. Qazaq tili barsha álemge DVD, Blu-Ray standarttarynda qoljetimdi Gollıvýd fılmderiniń negizgi tiliniń qataryna qosyldy.
Joba sheńberinde dýblıaj akterleri Berik Aıtjanov (Djonnı Depp), Gúlnáz Áýesbaeva (Andjelına Djolı), Azamat Qanapııa (Ýıll Smıtt) áıgili Gollıvýd juldyzdaryn dybystaýdyń aıryqsha quqyǵyna ıe boldy, dýblerlerdiń daýysyn akterler jeke ózderi bekitti. Túsirilimine BAFTA syılyǵynyń ıegeri, áıgili rejısser Kennet Brandt («Tor» jáne «Gamlet») arnaıy shaqyrylǵan bul kınoertegini álemge tanymal Pinewood Studios pavılondarynda ázirleý shamamen 250 mıllıon dollarǵa túsken kórinedi. Bul qazaqstandyq kórermenderge tóltýma nusqanyń bar ǵajabyn jetkize alǵan daryndy rejısser Aıjan Jámshıtovanyń dýblıaj jasaýdaǵy 7-shi gollıvýdtyq jumysy edi. Fılmdegi basty róldi «Oskar» syılyǵynyń eki márte ıegeri Keıt Blanshett («Avıator», «Bendjamın Battonnyń jumbaq ómiri») somdady. Kúlshe qyzdy qazaq tilinde Shehnaza Qyzyhanova dybystady, ol – T. Júrgenov atyndaǵy О́ner akademııasynyń 3-shi kýrs stýdenti. Shehnaza jobaǵa alǵash ret qatysýda. Kórsetilimdi mektep oqýshylary, balalar úıleriniń tárbıelenýshileri, qoǵam qaıratkerleri, sondaı-aq BAQ-tyń, «Bolashaq» qaýymdastyǵy men «Nur Otan» partııasynyń ókilderi tamashalady.
Fılmde boıyn ishtarlyq jaılaǵan jáne aram paıdany kóksegen zulym ógeı sheshe qyzyn únemi tuqyrta beredi. Biraq Kúlshe qyz úmitin úzbeıdi, oǵan aýyr sátterde anasynyń: «Berik bol jáne jaqsylyqqa sen!» degen amanaty kúsh beredi. Perızat-Kindik sheshe birde Kúlshe qyzǵa ómirin jaqsartýǵa kómektesedi, alaıda barlyǵy da basty keıipkerdiń ózine baılanysty. О́geı sheshe Kúlshe qyzdy kelisimge shaqyrǵanda, ol bul usynystan túbegeıli bas tartady. О́ziniń týǵan patshalyǵyn zulymdyqtan saqtap qalý úshin onyń júregin ǵalamat kúsh kerneıdi. Kishkentaı júrekpen patsha bolý múmkin emes. Naǵyz patsha bolý úshin meıirimdilik jáne adamdarǵa qamqorlyq jasaı bilý kerek. Fılm jelisi osy oıdy sanaǵa sińdiredi.
Aınur IMANǴALI.
ASTANA.
