Aýyldy qoldaý sharalary eki ese artty

Ortalyq kommýnıkasııalar qyzmetinde Aýyl sharýa­shylyǵy mınıstri Asyljan Mamytbekov baspasóz más­lıhatyn ótkizdi. Sharada 11 aqpanda Memleket basshysy júk­tegen tapsyrmalardyń oryndalý barysy týraly aıtyldy. Áýeli ótken jyly atqarylǵan jumystar týraly áńgimelegen mınıstr salada qol jetkizilgen tabystarǵa toqtaldy. Onyń sózine qaraǵanda, byltyr aýyl sharýashylyǵynyń ishki jalpy ónimi 2,5 trln. teńgege jetipti. Bul kórsetkish burnaǵy jyldan 0,8 paıyzǵa artyq kórinedi. «Eli­mizdegi barlyq jumys isteı­tin azamattardyń 25 paıyzy aýyl sharýashylyǵynda qyz­met etedi. Osyǵan qarap, AО́K-ke bólinip jatqan qosymsha qara­jat qoǵamdaǵy áleýmettik turaq­ty­lyqty qamtamasyz etýmen birge, AО́K aralas salalardyń damýy­na da ońdy áserin tıgizedi. Buǵan qosa, «Agrobıznes-2020» baǵ­dar­lamasynyń júzege asyry­lýynyń alǵashqy nátıjeleri jaıly da aıtyp ótkim keledi. Byl­tyr bolǵan kúrdeli tabıǵı jaǵdaı­ǵa qaramastan egistik sharýa­shy­lyǵynyń ósimi 98,4 paıyzdy qurady. Al mal sharýashylyǵynda 3,8 paıyzdyq ósim boldy», dedi mınıstr. Jaǵymdy jańalyq – mı­nıs­trlik pen «QazAgro» UBH» AQ birlesip, orta jáne sha­ǵyn bız­nesti nesıeleý baǵdar­la­malaryn ázirlepti. Ol boıynsha 50 jáne 100 bas qoıy bar, sondaı-aq jylqy jáne sútti qara mal fermer­lik sharýashylyqtardy qoldaý boıynsha ındıkatıvti jospar jasalypty. Buǵan qosa, 5 gektarǵa deıin otbasylyq baý-baqsha jasap, baǵbandyq etem deýshilerge kepilsiz nesıe alý sharasy da qarastyrylyp jatqan kórinedi. Mınıstrdiń sózine ılansaq, atalmysh sharalar oıdaǵydaı iske asyrylsa aǵymdaǵy jyly 30 myńǵa jýyq adam jumyspen qamtamasyz etiledi eken. Kóktemgi egis naýqanynda sharýalarǵa jeńildikpen beri­letin janar-jaǵarmaı baǵasy jýr­nalısterdiń nazarynan tys qalmady. «Qazirgi ýaqyt­ta aýyl­sharýashylyq taýaryn óndirý­shilerge arnalǵan arzandatylǵan janar-jaǵarmaıdyń quny óńir­lerde 81 teńge dep bekitilgen. Bul naryqtaǵy baǵadan 18 paıyzǵa arzan. Al, onyń baǵasy lıtrine 99 teńge ekeni málim. Byltyrǵyǵa qaraǵanda bul 30 paıyzǵa tómen. Jalpy, bekitilgen janar-jaǵarmaıdyń kólemi 366 myń tonna. Ony tıisti aýylsharýashylyq sýbektileri alyp jatyr», degen A.Mamytbekov aýyl sharýashylyǵyn memlekettik qoldaý aıasynda bólingen sýb­sıdııalarǵa da toqtaldy. Barshańyzǵa málim, 2013 jyldan beri «Agrobıznes-2020» baǵdarlamasy júzege asyrylýda. Baǵdarlamanyń negizgi maq­saty – memleket tarapynan aýyl sharýashylyǵyn damytýdyń qarjylyq jáne qarjylyq emes keshendi sharalaryn qolǵa alý. Osy baǵdarlama aıasynda eki jyldyń ishinde memlekettik qoldaý is-sharalarynyń kólemi eki esege artty. Naqty sandarǵa súıenip aı­tatyn bolsaq, 2013 jyly sýb­sı­dııalardyń kólemi 87,2 mlrd. teń­geni quraǵan bolsa, bıylǵy onyń kólemi 177,3 mlrd. teńgege jetip otyr, dep atap aıtty ol. Taǵy bir eńse kóteretin jaǵ­daı sharýashylyqtardy qoldaýǵa qosymsha 20 mlrd. teńge qarjynyń bólingeni. «Qazir álemde qalyp­tasyp otyrǵan kúrdeli ekono­mıkalyq jaǵdaı bizdiń elimizge de keri áserin tıgizip jatyr. Degenmen, Elbasynyń tikeleı tapsyrmasy boıynsha aýyl sharýashylyǵy keshenine baǵyttalǵan mem­le­kettik qarjylaı qoldaý is-shara­lary ulǵaıyp, «Nurly Jol» baǵdarlamasy boıynsha qosym­sha 20 mlrd. teńge qarjy bólinip otyr. Osyǵan qatysty tıisti zań qazir Parlamentte qara­lý­da. Onyń jumsalýyna kelsek, 20 mlrd. teńgeniń 7 mlrd. qarjy­laı saýyqtyrý aıasynda nesıe men lızıngtiń ósý paıyzyn sýbsı­dııalaýǵa baǵyttalady. Al, 13 mlrd. teńge mal sharýashylyǵyna jáne nesıe men syıaqy mólsherin retteýge, taǵy da basqa sharalarǵa jumsalady», dedi mınıstr. Nurbaı ELMURATOV, «Egemen Qazaqstan».