Úmitkerlerdi usyný barysymen tanystyrdy

Dúısenbi, 9 naýryzda Qazaqstan Respýblıkasynyń prezıdenttigine kandıdattardy usyný barysy jáne Qazaqstan Respýblıkasy Prezıdentiniń kezekten tys saılaýyn uıymdastyrý jónindegi Ortalyq saılaý komıssııasynyń jumysy týraly Ortalyq saılaý komıssııasynyń múshesi Lázzat Súleımen brıfıng ótkizdi. Onyń atap ótkenindeı, 26 aqpanda Ortalyq saılaý komıs­sııasynyń bekitilgen kúntizbelik kestesine saı 2015 jylǵy 26 sáý­irge taǵaıyndalǵan Qazaqstan Res­pýblıkasy Prezıdentiniń kezekten tys saılaýyna kandıdattardy usyný bastaldy. 2-9 naý­ryz aralyǵyndaǵy kezeńde OSK-ǵa usy­ný týraly 14 ótinish kelip tústi. О́zin-ózi usyný arqyly óz kan­dı­datýralaryn usynǵandar: Asqar Syrǵabaev, Safıolla Aldajanov, Lımana Qoıshıeva, Baqyt Ábdi­kárimov, Sýhrab Myrzashov, Esen­bek Úkteshbaev, Iаkobjan Júnis­bekov, Qaırat Juman, Erjan Serǵazın, Qaırat Maıshev, Ýálıhan Qaısarov, Bahtııar Estemesov jáne Qanat Týrageldıev. Al Turǵyn Syzdyqov «Qazaqstan Kommýnıstik halyq partııasy» qoǵamdyq birlestiginen usynyldy. «Ortalyq saılaý komıssııasy pre­zıdenttikke kandıdattardyń Konstı­týsııa men qoldanystaǵy saılaý týraly zańnamada qoıylǵan talaptarǵa sáıkestigin tekserý boıynsha qajetti is-sharalar ótkizdi, – dedi L.Súleımen. – Bas prokýratýra men IIM-ge tıisti suraý­lar jiberildi. Prezıdenttikke kandı­dattardyń  memlekettik tildi erkin meńgergendigin anyqtaý jónindegi Lıng­vıstıkalyq komıssııanyń otyrys­tary ótýde. Qazirgi ýaqytta keıbir úmitkerlerge qatysty júrgizilgen tekserýdiń nátıjeleri boıynsha tómen­degi anyqtaldy». OSK múshesiniń habardar etýinshe, Baqyt Ábdikárimov pen Sýhrab Myrzashov 40 jasqa tolmaǵan, osyǵan baılanysty olardy 6 naýryzda OSK qaýlylarymen tirkeýden bas tartylǵan. Sonymen qatar, Lıngvıstıkalyq komıssııa qorytyndysynyń negizinde Komıssııa prezıdenttikke kandıdattar retinde eki úmitkerdi – Asqar Syrǵabaev pen Safıolla Aldajanovty tirkeýden bas tartty. Al 6 naýryzda Lımana Qoıshıevaǵa qatysty, onyń Konstıtýsııa men saılaý týraly zańnamanyń talaptaryna sáıkestigi jóninde tıisti qaýly qabyldandy. Oǵan óziniń kandıdatýrasyn qoldap, saılaýshylardyń qoldaryn jınaý úshin qol qoıý paraqtary berildi. «Úmitkerlerdiń óz qoldarymen jazǵan málimetteriniń ózin Ortsaı­laýkom muqııat tekserýde. Mysaly, óz kandıdatýrasyn usynǵan Ý.Qaısarov prezıdenttikke kandıdat bolyp daýysqa túsýge nıet bildirý týraly ótinishinde basqa memlekettiń aza­mattyǵynda turǵanyn óz qolymen kór­setken. Osy másele boıynsha biz Ishki ister mınıstrligine atalǵan derek­terdi tekserý úshin suraý jiber­dik. Sondaı-aq, osy úmitkerdiń mem­lekettik tilde toltyrǵan ómirbaıandyq derekterinde birneshe qate ketken», – dep atap ótti Ortalyq saılaý komıssııasynyń múshesi L.Súleımen. * * * Sol kúni keshkisin Ortalyq saılaý komıssııasynyń taǵy bir otyrysy boldy. Onda óz kandıdatýralaryn usynǵan úmitkerler Qanat Jumanǵa, Esenbek Úkteshbaevqa jáne Ýálıhan Qaısarovqa olardyń Qazaqstan Respýblıkasynyń Konstıtýsııasy men «Qazaqstan Respýblıkasyndaǵy saılaý týraly» Konstıtýsııalyq zańynda kandıdattarǵa qoıylatyn talaptarǵa sáıkes kelmeýine baılanysty Qazaqstan Respýblıkasynyń prezıdenttigine kandıdattar retinde tirkeýden bas tartý týraly sheshimder qabyldandy. Atalǵan úmitkerlerge qatysty júrgizilgen tekserýdiń nátıjeleri boıynsha Ortalyq saılaý komıssııasy mynany anyqtady. Qanat Juman, Lıngvıstıkalyq komıssııanyń 7 naýryzdaǵy, Esenbek Úkteshbaev pen Ýálıhan Qaısarov Lıngvıstıkalyq komıs­sııanyń 9 naýryz­daǵy qorytyn­dysynyń negizinde memlekettik tildi erkin meńgermegen. Sondaı-aq, osy kúni Ortalyq saılaý komıssııasy «2015 jylǵy 26 sáýirge taǵaıyndalǵan Qazaqstan Respýblıkasy Prezıdentiniń kezekten tys saılaýynda qol qoıý paraqtaryn tekserý barysynda saılaýshylardyń qoldaryn jalǵan dep taný negizderi týraly» qaýly qabyldap, prezıdenttikke kandıdattardy qoldap jınalǵan saılaýshylardyń qoldaryn tekserý barysynda: birneshe adam úshin bir qolmen oryndalǵan; naqty kandıdat úshin qol qoıý paraqtarynda bir adam bir retten artyq oryndaǵan; qol qoıý paraǵyna saı derekter tolyq bolmaǵan kezde; óz qolyn keri qaıtaryp alýshy saılaýshynyń jazbasha ótinishi bolǵan kezde; belsendi saılaý quqyǵy joq adam oryndaǵan jáne qaıtys bolǵan adamdar úshin oryndalǵan saılaýshylardyń qoldary jalǵan bolyp tanylatynyn aıqyndady. Aýmaqtyq saılaý komıssııasy qol zańdardyń talaptaryn buza otyryp alynǵany anyqtalatyn ózge jaǵdaılarda da, qoldy jalǵan dep tanýy múmkin. Álısultan QULANBAI, «Egemen Qazaqstan».