Ortaq múddeler oraıyndaǵy basqosýlar

Dostastyqqa múshe elder basshylarynyń bir kúnde ótken eki mańyzdy otyrysy tabysty aıaqtaldy

Keshe Býrabaıda TMD-ǵa múshe elder Memleketter basshylary ke­ńesiniń jáne Joǵary Eýra­zııalyq eko­no­mıkalyq keńes­tiń kezek­ti otyrystary ótti. Qazaq­stan Prezıdenti Nursultan Nazarbaevtyń tóra­ǵaly­ǵymen ótken TMD Memle­ket­teri basshy­lary­nyń bas­qo­sýynda lańkes­tik qa­ter­­lerge qarsy birles­ken is-qımyldyń, qaýip­siz­dik pen quqyq tártip­terin qam­ta­masyz etýdiń, Dostas­tyq­qa múshe mem­le­ket­ter­diń kúsh­tik organdary ynty­maq­tas­ty­ǵynyń negiz­gi jaıttaryn qamtyǵan taqy­ryptar tal­qylandy. Al Qazaqstan, Reseı, Be­la­rýs, Qyrǵyzstan jáne Ar­­menııa prezıdentteriniń qa­ty­sýymen ótken Joǵary Eýra­zııalyq ekonomıkalyq keńes otyrysynda áriptes mem­­leketter arasyndaǵy yq­pal­­dastyq úderisterin damy­týǵa basa nazar aýdaryldy.  Basqosýda 17 másele qaraldy Sál keıinge shegine sóıler bol­saq, ótken jyly Belarýs asta­nasy Mınsk qalasynda uıym­das­tyrylǵan TMD-ǵa múshe Memleketter basshylary keńe­siniń otyrysynda dál osyndaı kelesi basqosýdy Qazaqstanda ótkizý týraly sheshim qabyldanǵan edi. Mınskidegi alqaly jıynda Qazaqstan Prezıdenti TMD-ny damytýdyń jańa tujy­rymdamasyn ázirleýdi usynǵan-dy. Naqtylaı aıtqanda, Memleket basshysy sol joly TMD-ǵa tóraǵalyq 2015 jyly Qazaqstanǵa ótetinine toq­tala kelip, «Múmkin memleket bas­shylarymen keńe­sip, TMD-ny damytýdyń jańa tujyrymdamasyn daıyndaý jó­ninde ýaǵdalasyp, odan ári qalaı jumys isteıtinimizdi aıqyndap alarmyz. Bul qujat TMD-nyń qurylǵanyna 25 jyl tolýyna oraı ázirlenedi, Qazaqstan ony daıyndap, sizdermen keńesetin bolady. Saýda qatynastaryn, erkin saýda aımaǵyn damytý ba­ǵy­­tyndaǵy jumystardy toqtat­paı­myz. Biz endi kólik, agro­óner­kásip­tik keshen, azyq-túlik qaýip­siz­digi salasyndaǵy yntymaq­tas­tyq­ty nyǵaıtýǵa kúsh salamyz jáne bizdiń tóraǵalyq osy má­se­le­lerdi, gýmanıtarlyq yntymaq­tas­tyq sala­syndaǵy qaýipsizdik máse­le­lerin qamtıdy», – dep málim­degen bolatyn. Mine, Qazaqstan Prezıdenti Nursultan Nazarbaevtyń 2014 jy­ly aıtqan joǵarydaǵy sózderi atalǵan keńestiń bıylǵy otyrysyna negiz boldy. Sonymen, Býrabaıda ótken Táýelsiz Memleketter Dos­tas­tyǵyna qatysýshy Memleketter basshylarynyń keńesi aldymen shaǵyn quramdaǵy kelissózder­men bastaldy. Nursultan Nazarbaev tóraǵalyq etken jo­ǵary deńgeıdegi bul jıynǵa Arme­nııa Prezıdenti Serj Sar­­gsıan, Belarýs Pre­zı­denti Alek­­sandr Lýkashenko, Qyr­ǵyz­­stan Prezıdenti Almazbek Atam­baev, Reseı Prezıdenti Vla­­­dımır Pýtın, Ázerbaıjan Pre­­zıdenti Ilham Álıev, Tá­jik­stan Prezıdenti Emomalı Rah­­mon, О́zbekstan Prezıdenti Is­lam Kárimov, Túrikmenstan Mı­nıstrler kabıneti tóra­ǵa­sy­­nyń orynbasary Satlyk Sat­lykov, Moldova Syrtqy is­ter já­ne eýropalyq ıntegrasııa mı­nıstriniń orynbasary Andreı Galbýr qatysty. Basqosýdy ashqan Qazaqstan Pre­zıdenti, TMD-ǵa múshe Mem­leketter basshylary keńesiniń Tóraǵasy Nursultan Nazarbaev qatysýshylarǵa arnaıy atbasyn buryp kelgenderi úshin alǵysyn bildirdi. Sondaı-aq, ol Belarýs basshysy Aleksandr Lýkashenkony prezıdenttik saılaýdaǵy jeńi­simen quttyqtady. «Aldymen bar­ly­ǵymyz áriptesimiz ári dosymyz Aleksandr Grıgorevıch Lýka­shen­kony prezıdenttik saılaýdaǵy aıqyn jeńisimen quttyqtap, oǵan zor densaýlyq pen tabys­tar tilegenimiz durys dep oılaımyn. Sizdiń basshylyǵyńyzben Belarýs barlyq baǵyttaǵy bizderdiń ıntegrasııalyq úde­ris­terdi odan ári nyǵaıta beredi dep senemin», – dedi Qazaqstan basshysy. Sondaı-aq, ol 4 qazanda Qyr­ǵyzstanda parlamenttik saı­laý­dyń tabysty ótkenine qatysty Almazbek Atambaevqa jyly le­bizin bildirdi. «Bul – erekshe oqıǵa. О́ıtkeni, Qyrǵyzstanda kóp­tegen jyldan beri saılaý alǵash ret tynysh ótti jáne halyq beıbit memlekette ómir súrýdi qalaı­tyn­dyǵyn kezekti márte óz danaly­ǵymen kórsetti», – dedi Nursultan Nazarbaev. Nursultan Nazarbaev Qazaq­stan TMD qurylǵaly beri elderimizdiń arasyndaǵy kópjaqty yntymaqtastyqty jandandyrýdy, is-qımyldyń negizgi baǵyttary boıynsha ıntegrasııany tereńdete túsýdi dáıektilikpen jaqtap kele jatqanyn aıtty. TMD – burynǵy keńestik keńis­tiktegi 11 memleketti biriktiretin bire­geı qurylym. Bizdiń óńirde oǵan balama joq. Biz mundaı kezdesý­ler aıasynda halyqaralyq saıasat­tyń eń mańyzdy problema­lary boıynsha senimdi yńǵaıda pikir almasyp, kópjaqty ynty­maq­tastyǵymyzdyń kez kelgen máse­lesin talqylaı alamyz. Bizdiń bú­gin­gi is-sharamyz TMD-ny damy­tý isine óz úlesin qosatynyna se­nim­­­di­min, – dedi Memleket basshy­sy. Qazaqstan Prezıdenti sondaı-aq, 17 másele qaralatyn búgingi oty­­­rys­­tyń kún tártibi tyǵyz eke­nin aıtty. Máselelerdiń eleýli bóligi qaýipsizdik jáne quqyq tártibin qamtamasyz etýge arnalǵan, halyq­aralyq sharttar toptamasyna qol qoıý, baǵdarlamalyq qujat­tardy bekitý, sondaı-aq, TMD-ǵa múshe memleketter basshy­larynyń halyqaralyq terrorızmge qarsy kúreske jáne BUU-nyń 70 jyldyǵyna arnalǵan máli­m­demelerin qabyldaý josparlanǵan. Usynylǵan qujattardyń is jú­zindegi máni zor jáne olardy qabyldaý elderimizdiń ynty­maq­tastyǵyn nyǵaıta túsýge yqpal etetin bolady, – dedi Elbasy. Yntymaqtastyq arta beredi Qazaqstan Prezıdenti TMD-ǵa múshe elder Memleket basshylary keńesiniń keńeıtilgen quramda ótken otyrysyna qatysty. Qa­zaq­stan basshysy óz sózinde shaǵyn quramda ótken Keńes otyrysynda TMD ahýaly men damý kele­sheginiń máseleleri egjeı-tegjeıli talqylanǵanyn aıtty. Búginde álemde aýqymdy ózgerister bolyp jatqany eshkimge qupııa emes. Áńgime eń aldymen ekonomıka jáne qaýipsizdik jóninde bolyp otyr. Bolyp jatqan jaıttar bizdiń uıymnyń da jańa jaǵdaılarǵa beıimdelýin talap etedi. TMD da ósip, jańa jaǵdaılarǵa yńǵaılanýy, jańa qaýip-qaterlerge qarsy barynsha tıimdi áreket ete alýǵa tıis, – dedi Nursultan Nazarbaev. Qazaqstan Prezıdenti talqy­laý­dan ótken taqyryptyń biri ha­lyq­aralyq qaýipsizdik salasyn­daǵy ahýal bolǵanyna nazar aýdardy. Terrorlyq toptardyń qımyly jandanǵanyn, olardyń áreketi ornyqqan álemdik qalypty buzyp jatqanyn aıtý kerek. Bul jerde halyqaralyq terrorızm kóptegen elder men óńirlerdegi jaǵdaıǵa búl­dirgishtik turǵydan yqpal ete­tinin atap ótken jón. Zorlyq-zom­bylyqtyń ýshyǵýy beıbit tur­ǵyndardyń, ásirese, áıelder men balalardyń arasyndaǵy qurbandar sanyn ulǵaıtty. Nátıjesinde, bul jaǵdaı Soltústik Afrıka jáne Taıaý Shyǵystan Eýropaǵa aǵylǵan qarapaıym halyqtyń Ekinshi dúnıejúzilik soǵystan keıingi eń aýqymdy májbúrli mıgrasııasyn týdyrdy. Bul máseleni sheshý úshin orasan ekonomıkalyq resýrstar qajet bolady. Oǵan qosa, turaqsyzdyq oshaqtaryn qalyptastyrýdy dittegen terrorshylar bosqyn atymen jasyrynyp júrýi múmkin, – dedi Memleket basshysy. Nursultan Nazarbaev TMD mem­leketteri basshylary ter­rorlyq qaýipti joıýdyń ýaq­­ty­ly ári tıimdi sharalaryn qa­byl­daýǵa ortaq nıet tanytyp otyrǵanyn aıtty. Meniń BUU Bas Assam­bleıa­sy­nyń minberinen aıtqanymdaı, Uıymnyń kelisimimen terrorlyq uıymdarmen kúrestiń dúnıejúzilik jelisin qurý qajet. Bizge osy baǵyttaǵy jumysty kúsheıtip, TMD Terrorızmge qarsy kúres ortalyǵynyń áleýetin barynsha paıdalaný kerek. Sondyqtan TMD memleketteri basshylarynyń Birikken Ulttar Uıymynyń 70 jyldyǵyna jáne halyqaralyq ter­rorızmge qarsy kúreske qa­tysty málimdeme qabyldaýyn der kezinde jasalǵan ári qajetti shara dep sanaımyn, – dedi Qazaqstan Pre­zıdenti. Sonymen qatar, Memleket bas­shysy Qazaqstannyń TMD-ǵa tóraǵalyǵy ekonomıkalyq tur­ǵy­dan kúrdeli kezeńge tap kelgenin, biraq barlyq qajetti talaptar oryndalǵanyn aıtty. Dostastyq aıasynda jospar­lanǵan sharanyń bári ótti. Budan bólek, taıaýda Astanada TMD elderiniń shyǵarmashyl jáne ǵy­lymı zııaly qaýymynyń H mereı­toılyq forýmy ótedi. Al Dýshan­bede TMD-ǵa múshe elder Úki­met basshylary keńesiniń otyrysy bolady. Osy sharalarmen Qazaq­stannyń Dostastyqtaǵy tóra­ǵa­lyǵy aıaqtalady, – dedi Nursultan Nazarbaev. Shara barysynda A.Lýkashenko Qazaqstan Prezıdentine Bela­rýs­tiń memlekettik nagradasy – «Ha­lyqtar dostyǵy» ordenin tapsyrdy. Nursultan Nazarbaev óziniń baı jumys tájirıbesin paıdalana otyryp TMD-nyń qalyptasýy men damýy úshin óte kóp jumys atqardy, eýrazııalyq yqpaldastyq ıdeıasy da oǵan tıesili. Osynyń bári halyqtar arasyndaǵy dos­tyq­ty nyǵaıtyp qana qoımaı, elde­ri­mizdegi adamdar turmysyn jaqsarta túsedi, – dedi Belarýs Prezıdenti. «Táýelsiz Memleketter Dos­tastyǵyna Qazaqstannyń tór­aǵalyǵy aıaqtalady. Shyn máninde, bizderge ekonomıkalyq turǵyda óte qıyn kezeń týra keldi. Biraq, biz óz mıssııamyzdy laıyqty dáre­jede oryndaýǵa tyrystyq. Dos­tastyq aıasynda josparlanǵan bar­lyq shara ótkizildi», – dedi Elbasy. Elbasy atap ótkendeı, taıaý kún­deri elordada TMD memleket­teriniń shyǵarmashylyq jáne ǵylymı zııalylarynyń 10-shy mereı­toılyq forýmy, sonymen qa­tar, Dýshanbede TMD-ǵa mú­she memleketter Úkimet basshy­lary keńesiniń otyrysy ótki­zilmek. «Bul sharalarmen biz óz tóraǵalyǵymyzdy túıin­deı­miz. Osy sátti paıdalanyp, Dos­tas­tyqtaǵy barlyq seriktesterimizge túsinistikteri úshin, TMD-daǵy bizdiń tóraǵalyǵymyzǵa qoldaý bildirgeni úshin alǵysymdy aıtqym keledi», – dedi N.Nazarbaev. Keńeste Belarýs Respýb­lı­kasynyń Tótenshe jaǵdaılar jónindegi mınıstri Vladımır Vashenko osydan 30 jyl buryn oryn alǵan Chernobyl apaty jóninde aıtyp ótti. Sondaı-aq, jıyn kezinde TMD terrorızmge qarsy kúres ortalyǵynyń basshysy, polısııa general-polkovnıgi Andreı Novıkovtyń óz qyzmetin odan ári jalǵastyra beretini belgili boldy. Naqtylaı aıtqanda, TMD-ǵa múshe elder Memleket basshylary keńesiniń bekitýimen A.Novıkovtyń ókilettiligi 2018 jyl­dyń 31 jeltoqsanyna deıin uzartyldy. Onyń atalǵan orta­lyqqa 2006 jyldan beri bas­shylyq jasap kele jatqanyn aıtyp ótýimiz kerek. TMD-ǵa múshe Memleketteri basshylary keńesiniń otyrys qorytyndysy boıynsha tómen­degideı qujattarǵa qol qoıyldy: – TMD Memleketteri basshy­lary­nyń Birikken Ulttar Uıy­mynyń 70 jyldyǵyna baılanys­ty málimdemesi; – TMD Memleketteri basshy­larynyń halyqaralyq terro­rızmge qarsy kúres týraly má­lim­demesi; – TMD Memleketteri basshy­la­rynyń Chernobyl AES-indegi apattyń 30 jyldyǵyna baılanys­ty úndeýi; – TMD-ǵa múshe memleketterdiń tótenshe jaǵdaılardy eskertý jáne joıý salasyndaǵy ynty­maq­tastyq týraly kelisimi; – TMD-ǵa múshe memleketterdiń 2020 jylǵa deıingi áskerı ynty­maq­tastyq tujyrymdamasy; – TMD-ǵa múshe memleketterdiń 2016-2020 jyldarǵa arnalǵan syrt­qy shekaralardaǵy qaýipsiz­dik­ti nyǵaıtý salasyndaǵy ynty­maq­tastyq baǵdarlamasy. Jumys tıimdiligi – nátıjesinen Osy kúnniń ekinshi jarty­synda Joǵary Eýrazııalyq ekonomıkalyq keńestiń (JEEK) kezek­ti otyrysy bastaldy. Oǵan Qazaq­stan Prezıdenti Nursultan Nazar­baev, Reseı Prezıdenti Vladı­mır Pýtın, Belarýs Prezı­denti Aleksandr Lýkashenko, Qyr­ǵyz­stan Prezıdenti Almazbek Atam­baev jáne Armenııa Prezıdenti Serj Sargsıan qatysty. Jıynda sóz alǵan Nursultan Nazarbaev Joǵary Eýrazııalyq eko­nomıkalyq keńestiń kezekti otyrysyna kelgen áriptesterine óziniń quttyqtaý sózin arnady. Sonymen birge, Qazaqstan Prezıdenti. «Bul alqaly jıyn bizdiń yqpaldastyq birlestigimizdiń odan ári damýyna óz úlesin qosatynyna senimdimin. Búgingi otyrysta Eýra­zııalyq ekonomıkalyq odaq­tyń tolyqqandy múshesi retinde Qyr­ǵyz Respýblıkasynyń Prezı­denti Almazbek Atambaev qaty­syp otyr. Sizdi otyrysqa qaty­sýyńyzben quttyqtaımyn», – dedi. Kelissózderdiń jemisti bol­ǵa­nyn, sondaı-aq, qol qoıylǵan qu­jat­tardyń mańyzdylyǵyn atap ótti. Jıyndy júrgizip otyrǵan Aleksandr Lýkashenko Joǵary Eýra­zııalyq ekonomıkalyq keńestiń bul jıynyn uıymdastyrýda Qa­zaq­stan tarapynyń tyńǵy­lyqty daıyndalǵanyn, bul oraıda Prezıdent Nursultan Nazarbaevtyń tabandy eńbek etkenin aıryqsha atap kórsetti. Keńes barysynda Belarýs Pre­zıdenti Aleksandr Lýkashenko jıyn qorytyndysy boıynsha 15 qujatqa qol qoıylǵanyn, onyń barlyǵy da keńinen talqylanyp, súzgiden ótkenin jetkizdi. «О́zderińiz kórip otyrǵandaı, búgin óte qarbalasqa toly kún boldy. Táýelsiz Memleketter Dos­tas­tyǵy elderi basshylarynyń jáne Joǵary Eýrazııalyq ekono­mıkalyq keńestiń kóptegen má­selelerdi jan-jaqty talqyǵa sal­ǵan mańyzdy qujattarǵa, baǵ­dar­lamalarǵa qol qoıylǵan aıtýly jıyny ótti. Eń bastysy, kóp­tegen máseleler óz sheshimin tapty. Biz Joǵary Eýrazııalyq eko­nomıkalyq keńestiń osy otyrysynda barlyǵy 15 másele qarastyrdyq. Onyń ishinde bıylǵy jyly múshelikke ótken Qyrǵyz Respýblıkasy da bar. Qyrǵyzstan halqy Almazbek Atambaevty bul turǵydan qoldady. Olardyń ortaq na­ryqqa múshe bolýdan utatyn tus­tary kóp. Sondyqtan, bul she­shimderine ókinbeıtin bolady dep oılaımyn. Basqosý nátıjesinde tómen­degideı sheshim qabyldandy. Ke­lesi jyldyń 1 aqpanynan bas­tap, Eýrazııalyq ekonomıkalyq odaqtyń komıssııasyna Armenııa Res­pýblıkasy tóraǵa bolady. Komıssııany Armenııanyń bu­rynǵy premer-mınıstri Tıgran Sar­gsıan basqarady. Ol bir kez­deri Reseı Federasııasynyń Pre­zıdentimen birge jumys istegen. О́te tájirıbeli maman. Sondyqtan, 2016 jyldyń 1 aqpanynan bas­tap, oǵan komıssııany basqarýdy senip tapsyryp otyrmyz, – dedi Belarýs Prezıdenti. Sonymen qatar, A.Lýkashenko Joǵary Eýrazııalyq ekonomıkalyq keńestiń kelesi otyrysy aldaǵy jeltoqsan aıynda Máskeýde ótetinin málim etti. Túıip aıtqanda, taraptar EAEO jumysynyń qory­tyn­dysyn shyǵaryp, damýdyń jańa perspektıvalaryn belgiledi. Odaq qyzmetiniń máseleleri tal­qy­landy, sonyń ishinde Eýrazııalyq ekonomıkalyq komıssııa alqasy quramynyń sany bekitilip, onyń jumys kestesine ózgeris engizildi. Sonymen birge, EEK-tiń kelesi jylǵy basshysynyń kandı­­da­týrasy kelisildi. Jańa múshe­ler qabyldaý jáne EAEO-daǵy múshelikti doǵarý tártibi qabyl­dandy. Otyrysqa qatysýshylar EAEO men «Jibek joly ekonomıkalyq beldeýi» jumysyn úılestirý jó­nindegi is-qımyldarǵa arnaıy toqtaldy. Memleketter basshylary Odaqtyń úshinshi eldermen jáne halyqaralyq uıymdarmen ózara is-qımyl tártibin talqylady. Máselen, Izraılmen erkin saýda aımaǵy týraly kelisim jasaýǵa qatysty kelissózderdi bastaý týraly sheshim qabyl­dandy. Elimizdiń DSU-ǵa kirýine baı­lanysty negizgi jaıttar Qazaq­stan tarapynyń bastamasymen qarastyryldy. Sonymen qatar, qyzmet kór­setý sektorlarynyń tizbesi beki­tildi, osyǵan oraı EAEO aıasyn­da qyzmet kórsetýdiń biryń­ǵaı naryǵyn qalyptastyrý yryq­tandyrý josparyna sáıkes júr­gi­ziletin bolady. Keńes otyrysy aıaqtalǵan soń Joǵary Eýrazııalyq ekonomıkalyq komıssııa alqasynyń tóraǵasy Vıktor Hrıstenko arnaıy má­lim­deme jasady. «Búgingi keńes jumysy óte qarqyndy ótti jáne kún tártibinde EAEO jumysynyń keleshegine qatysty kóptegen máseleler qa­­raldy. Komıssııa jumysyn 2016 jyldyń 1 aqpanynan bas­tap jańartý boıynsha sheshimder qabyldandy. Sonyń nátıjesinde komıssııanyń 10 alqa múshesi mınıstrlerden turatyn bolady. Osylaısha, alqada memleketterdiń ókildigi eki adamnan quralady. Qazaqstannyń Dúnıejúzilik saýda uıymyna múshe bolýyna baılanysty memleketter basshylary málimetterdi Odaq normalarynda júzege asyrýdy qamtamasyz etetin qujattar paketin qa­byl­dady. Bul bir jaǵynan Qazaq­stannyń DSU-ǵa kirýimen qa­byldanǵan mindettemelerin naryqta qoldanýyna múmkindik beredi, ekinshi jaǵynan, Odaq boıynsha seriktes memleketterge eshqandaı shyǵyn keltirmeıtindeı, tarıf aıyrmashylyǵyna alyp kelmeıtindeı etip basqarý júıesin qurýǵa jol ashady», – dedi. Vıktor Hrıstenkonyń sózine qaraǵanda, osy kúni Memleketter basshylary Qazaqstannyń DSU-ǵa kirýine baılanysty ónimderdiń qysqarýy týraly halyqaralyq kelisimshartqa qol qoıdy. Sondaı-aq, myńnan astam taýarlyq jaıǵasymnyń tarıfteri boıynsha normalardy Odaq normalary aıasynda júzege asyrý týraly sheshim qabyldandy. Onyń aıtýynsha, bul úderis ulttyq parlamentterde 15 jeltoqsanǵa deıin aıaqtalýy kerek. Sonymen qatar, V.Hrıstenko: «Eýrazııalyq ekonomıkalyq odaqtyń 2015-2016 jyldarǵa arnalǵan halyqaralyq qyzmetiniń negizgi baǵyttary men ortasha merzimdi keleshekte EAEO-nyń negizgi seriktesterimen saýda-ekonomıkalyq ynty­maq­tas­tyqty damytýǵa arnalǵan ádister máselesi kún tártibinde kóp nazarǵa alyndy. О́zderińiz biletindeı, qazir Memleketter basshylary saýda-ekonomıkalyq kelisim qurý boıynsha Qytaı Halyq Respýblıkasymen jumystar júrgizý týraly sheshim qabyldady. Dál sol sııaqty Úndistan, Iran, Mysyr jáne basqa da birqatar eldermen ózara is-árekettiń tártibin qurýǵa qatysty máselelerdiń úlgisi anyqtaldy», – dedi. Sońynda sharaǵa qa­ty^­­sýshylar kún tártibi maz­mun­dy, at­qa­rylǵan jumys tıim­di bol­ǵanyn atap ótti. Sonymen, bir kúnde ótken qos mańyzdy otyrys aıaqtaldy. Ondaǵy qaralǵan máselelerdiń barlyǵy da ózekti. Sondyqtan da, osy kúni qabyldanǵan árbir sheshim, bekitilgen árbir qujat elimiz úshin asa qajet ári máni zor ekeni anyq. Baqbergen AMALBEK, Joldybaı BAZAR, «Egemen Qazaqstan» – Býrabaıdan. Sýretterdi túsirgender S.BONDARENKO, B.OTARBAEV.