Quran tegin taratyldy

Bas múftı Erjan qajy Malǵajyulynyń ıgi bastamasymen Bahreınnen qasıetti Kuran Kárim jetkizilgen bolatyn. Osy izgi bastamanyń negizinde oblystyq ortalyq «Nur-Ǵasyr» meshitinde musylman balasynyń jaryq nury, qasıetti kitapty barlyq meshitterge taratý rásimi boldy. Onda «Quran Kárim» kitaby óńirdegi ár meshitke 15 danadan, qosymsha ókilderge keleshek ashylatyn meshitter úshin 1000 danadan jáne QMDB-nyń qyzmetkeri Sabıt Ibadýllaevtyń eńbegimen jaryq kórgen «Quran jáne maǵynalyq aýdarmasy» atty kitaby tegin úlestirildi. Atalǵan shara barysynda Aqtóbe oblystyq ortalyq meshitiniń naıb ımamy Serikjan Enshibaıuly jınalǵan ımamdar qaýymyna sóz arnap, bul qasıetti «Quran Kárim» barsha aımaqtyń musylman qaýymyna berilgen erekshe tartý, teńdesi joq sııapat ekenin, syıǵa tartylǵan Quran árbir meshittiń sóresinde mindetti túrde jamaǵat paıdasy úshin turýy tıistigin jetkizdi. Álemde eń kóp oqylatyn, oqylýynyń ózi qulshylyq bolyp sanalatyn, ár árpine saýap jazylatyn, qansha oqysań da jalyqtyrmaıtyn, syry, hıkmeti men danalyǵy taýsylmaıtyn kitap – Quran eken. Quran adamzatty sheksiz baqytqa jeteleıtin, týra jol kórsetetin, qııametke deıin ózgermeıtin máńgi muǵjıza bolyp tabylady. Quran – sońǵy paıǵambarlyqtyń dáleli, týra dinniń úni ári Islam sharıǵatynyń ata zańy. Quran oqyǵan adamnyń búkil bolmysymen ózgergenin baıqaısyń. Quranǵa degen mahabbat ony oqýǵa baılanysty. Bahreındegi Quran taratý qaıyrymdylyq uıymynyń uıytqy bolýymen halyqtyń ıslamı saýatyn kóterý maqsatynda Quran jáne onyń ártúrli tilderdegi aýdarmasy buǵan deıin Palestınada – 250 000, Kamerýnda – 200 000, Iemen, Egıpet, Ýganda, Ispanııa, Fılıppın jáne Shrı-Lanka memleketteriniń árqaısysynda 100 000 danadan úlestirilgen eken. Mine, endi Qazaq eline de bul úrdis jetip, halyqtyń dinı saýat ashýyna kómegi tıetin boldy. Munyń ózi saýapty is ekeni sózsiz. Satybaldy SÁÝIRBAI, «Egemen Qazaqstan». Aqtóbe oblysy.