Lenın portreti – 5 mıllıon dollar
Amerıkalyq sýretshi Endı Ýorhol salǵan Vladımır Lenınniń portreti Sothebys aýksıonynda 4,7 mıllıon dollarǵa satylǵan. Saýda-sattyqqa deıin onyń quny 3,8-4,5 mıllıon dollarǵa baǵalansa kerek. Keńes Odaǵynyń «Kún kóseminiń» portretine onyń 1897 jylǵy, qazirgi kezde Máskeýdegi Lenın ortalyq mýzeıinde saqtaýly turǵan sýreti paıdalanylypty.
Ýorholdyń ózge dúnıeleri aýksıonda edáýir arzanǵa baǵalanǵan. Máselen, Jaklın Kennedıdiń portreti 1 mıllıon dollarǵa satylypty. Portret onyń kúıeýi, AQSh prezıdenti Djon Kennedı óltirilgennen keıin salynǵanǵa uqsaıdy. Kartına buǵan deıin AQSh-tyń, Japonııa men Ulybrıtanııanyń iri galereıalarynda qoıylyp kelipti. Al sýretshiniń Merılın Monronyń beınesi salynǵan polotnosy 2,3 mıllıon dollarǵa satylǵan.
Zeınetker balalar alańyn qıratty
Reseıdiń Tver qalasynda zeınetker áıel aýlasyndaǵy balalar alańyn demontajdaý úshin óz erkimen arnaıy brıgada jáne tehnıka jaldaǵan. Oqys oqıǵa qaladaǵy Blagoev kóshesindegi №7 úıdiń aýlasyna qatysty aıtylyp otyr. Alańǵa arnaıy tehnıka jetkizilip, átkenshekter men basqa da túrli snarıadtar demontajdalyp tastalǵan.
Demontajdaý barysynda balalarǵa arnalǵan kerek-jaraqtyń keıbiri syndyrylypty. Turǵyndardyń aıtýynsha, zeınetker kempirge balalardyń shýy jaqpasa kerek. Bosatylǵan orynǵa ol kir jaıatyn qurylǵy ornatýdy kózdegen degen de nusqa bar. Aty-jóni naqty aıtylmaıtyn mosqal áıel buǵan deıin ákimshilikke balalar alańyn alyp tastaý týraly ótinishpen de shyǵypty. Biraq bul ótinishten bas tartylǵan.
Jastardy lańkestikke tartqan ımam
Germanııanyń astanasy Berlın qalasyndaǵy Moabıt aýdanyndaǵy meshitte ımam bolyp júrgen Reseı azamaty qamaýǵa alyndy. Oǵan jastardy «Islam memleketi» delinetin terrorlyq toptyń qataryna tartýmen aınalysqan degen aıyp taǵylyp otyr. Germanııadaǵy Reseı elshiligindegilerdiń habarlaýynsha, dıplomatııalyq mıssııadan kómek surap ázirshe eshkim qaıyrylmaǵan.
Prokýratýranyń málimetterine qaraǵanda, tutqyndaý nemis astanasynda júzege asyrylǵan. Vedomstvoda onyń aty Murat delinip otyr. Al teginiń alǵashqy árpi «A» eken. Daǵystan avtonomııasynyń týmasy. Oryssha jáne cheshenshe sheshen sóıleıtinge uqsaıdy. Germanııa Federatıvtik Respýblıkasyndaǵy cheshen qoǵamynda aıtarlyqtaı yqpaly bar kórinedi.
Londonda bas aspazshy tonaldy
Brıtanııalyq bas aspazshy Djeımı Olıver tonaýshylardyń «qurbandyǵyna» aınaldy. Urlyqshylar onyń Londonnyń soltústigindegi úıine eppen kirip, 2 elektr quralyn úptep ketken. Polısııany kireberis esiktiń ashyq qalǵanyn kórgen kórshileri shaqyrypty. Al urylar úıge jertóle arqyly kirse kerek.
«Baǵaly zattar urlanǵany týraly aqparat joq», – deıdi bas aspazshynyń baspasóz hatshysy. Al quqyq qorǵaý organdarynyń qyzmetkerleri beınebaqylaý kameralaryndaǵy jazbalardy tekserýge kirisipti. Ázirshe eshbir kúdikti anyqtalmaǵan. Urylar úıge túsken kezde Olıver zaıybymen jáne 4 balasymen óziniń Esseks graftyǵyndaǵy úıinde bolǵan. Onyń shilde aıynda satyp alynǵan, VII ǵasyrda salynǵan úlken qamal-úıi de bar eken.
Burynǵy oıynshynyń buzyqtyǵy nesi?
Aǵylshynnyń «Manchester Iýnaıted» komandasynyń jáne Fransııa quramasynyń burynǵy shabýylshysy Erık Kantona Elle jýrnalynyń fransýz nusqasynyń muqabasy úshin jalańash kúıinde sýretke túsipti. 49 jastaǵy sportshy fotosessııaǵa óziniń zaıyby – 38 jastaǵy fransýz aktrısasy Rashıda Braknımen birge qatysqan.
Biraq Rashıda muqabaǵa paltomen túsipti. Basylym, sonymen qatar, Kantonamen jáne Braknımen suhbat ta jarııalaǵan. 2007 jyly otbasyn qurǵan erli-zaıyptylar mahabbat jáne otbasylyq qundylyqtar týraly oı-paıymdarymen bólisipti. Tanymal fýtbolshy óziniń oıynshy retindegi mansabyn 1997 jyly támamdap, sodan keıin kıno túsirýge den qoıǵan edi. Al ol «Manchester Iýnaıtedpen» birge 4 ret Anglııa chempıony atanǵan bolatyn.
Zorlyq kórgen erkekter ortalyǵy
Shvesııanyń Stokgolmdegi bir klınıkasy zorlanǵan er adamdarǵa kómek kórsetetin ortalyq ashty. Endi atalǵan aýrýhana onyń basshylyǵy málimdegen qaǵıdatty qatań ustanatyn bolady. Al basshylyqtyń qaǵıdaty mynadaı: medısınalyq qyzmet kórsetý máselesinde jynystardyń teńdigin qamtamasyz etý.
«Biz zorlyqqa ushyraǵan erkekter úshin tuńǵysh klınıka ashyp otyrǵanymyzǵa qýanyshtymyz. Buǵan deıin biz áıelder úshin dál osyndaı ortalyq ashqan bolatynbyz», – deıdi medısınalyq ortalyqtyń ashylýynda sóz sóılegen Lıberaldyq partııanyń baspasóz hatshysy Rasmýs Ionlýnd. Atalǵan ortalyqtyń jumysyna, sondaı-aq, sentrıster, Hrıstıandyq demokrattar partııasy qoldaý kórsetken.
Aqparat agenttikteriniń materıaldary negizinde ázirlendi.
