Borıs Nemsovty óltirýge tapsyrys berýshiniń aty ataldy

ASTANA. 12 naýryz. Reseılik belgili saıasatker Borıs Nemsovtyń óltirilýi boıynsha tergeýshiler ótken aptada eldiń prezıdenti Vladımır Pýtınge bul atyshýly qylmysty uıymdastyrýshynyń famılııasy men tapsyrysty oryndaýshylardyń keıbiriniń aty-jónin atady. Bul týraly «Novaıa gazeta» basylymyna silteme jasaǵan «Dojd» telearnasy habarlady. Aqparat quralynyń habarlaýynsha, Nemsovty óltirýdi uıymdastyrýy múmkin adamnyń aty - Rýslan. «Áskerı sheni - maıor. Onyń famılııasy prezıdentke belgili, dúısenbi kúni Groznyıda dál osy adamnan jaýap alyndy, aqparattyń baspasózge shyǵyp ketýine jol berilmeı, biraq Rýslannyń jaqyn týysy sheshenniń kúsh qurylymdarynyń joǵary laýazymdy ókili delindi», - dep jazady «Novaıa gazeta». Basylymnyń málimetinshe, Rýslan «Soltústik» batalonynda qyzmet etken jáne «birneshe márte marapattalǵan». Sońǵy kezderi Rýslan Máskeýge barǵan, bul jaqta onyń eki aǵaıyny jumys isteıdi. «Maıor Rýslannyń" famılııasy ishki ister mınıstrligi, federaldyq qaýipsizdik qyzmeti, tergeý komıtetiniń ondaǵan, tipti, júzdegen qyzmetkerine tanys eken. Ol maqala avtorlaryna da belgili kórinedi, biraq olar «kinásizdik prezýmpsııasyn eskere otyryp», onyń atyn atamaýdy jón kórgen. «Eho Moskvy» radıosy bolsa, maquldanbaǵan aqparat boıynsha Pýtınge baıandalǵan málimette Rýslan Geremeev týraly aıtylatynyn habarlady. Ol kezinde Nemsovtyń ólimi týraly is boıynsha negizgi kúdikti Zaýr Dadaevpen birge marapatqa ıe bolǵan. «Rýslannyń aǵaıy - Súleıman Geremeev, Sheshenstannyń senatory, onyń esimi baspasózde Rýslan Iаmadaevtyń, Movladı Baısarovtyń, Anna Polıtkovskaıanyń ólimderine jáne qylmys áleminiń serkesi Rýslan Atlangerıevtiń urlanýyna qatysty materıaldarda atalady. Rýslannyń ekinshi aǵaıy - Vaha Geremeev, Sheshenstannyń Shelkovskıı aýdany boıynsha ishki ister bóliminiń bastyǵy. Onyń nemere aǵasy - Memlekettik Dýma depýtaty Adam Delımhanov», - dep habarlady radıostansııa. Vladımır Pýtınniń baspasóz hatshysy Dmıtrıı Peskov «Novaıa gazeta» basylymynyń aqparatyna qatysty túsinik berip, bul málimetti qısynsyz dúnıe dep atady. Eske sala keetıik, 8 naýryzda Máskeýde saıasatker Borıs Nemsovtyń ólimi týraly is boıynsha bes aıyptalýshynyń tutqyndalǵany habarlanǵan edi. Olar – «Soltústik» batalony komandıriniń eks-orynbasary Zaýr Dadaev, Shagıt jáne Azor Gýbashevtar, Ramzat Bahaev pen Tamerlan Eskerhanov. Negizgi kúdikti Dadaev áýeli saıasatkerdiń ólimine qatysy baryn moıyndady da. keıin óz sózinen bas tartty. Sheshenstan basshysy Ramzan Qadyrov Dadaevty qorǵap, ony «Reseıdiń naǵyz patrıoty» dep atady. Murat Aıtqoja. Derek, foto: «Dojd».