Batys Qazaqstanda shekara beketteriniń qyzmeti kóńil qýantpaıdy

ORAL. 12 aqpan. Sońǵy kezde Batys Qazaqstan oblysy aýmaǵyndaǵy shekara beketteriniń qyzmetine shaǵym aıtýshylar kóbeıip ketti. Bul týraly egemen.kz tilshisi habarlady. Aıtalyq Reseı tarapynan kezek múldem az. Tipti joq dese de bolǵandaı. Ári saparǵa shyǵýshylardyń shekara beketinen ótý ýaqyty on bes mınýttan aspaıdy. Al Qazaqstan jaǵynan adamdardyń ári-beri ótýi úshin jeti-segiz saǵatqa deıin sarylyp kútýine týra keledi. Mundaı kórinis ásirese Reseıdiń Samara qalasy baǵytyndaǵy «Syrym» shekara beketinde jıi oryn alýda. Aldyńǵy jylmen salystyrǵanda Reseı baǵytyna saparlaýshylar sany qyryq paıyzǵa ulǵaıǵan kezde bul máseleni shuǵyl túrde retteý qajet. Osy arada aıta keterlik másele, óńir aýmaǵynda №2029 áskerı bólim qyzmet jasaıdy. Onyń quramyna jeti shekara beketi kiredi. Shekara – eldiń aınasy. Solaı bolǵandyqtan da mundaǵy jeke quramnyń qazirgi sylbyr qyzmetin shuǵyl shıratyp, qajetti uıymdastyrý jumystaryn júrgizse, kólik ıeleriniń saǵattar boıy kezekte turý kórinisteri azaıar ma edi? Ras, joǵaryda atalǵan áskerı bólim komandıri Baýyrjan Rysbekovtyń málimdeýinshe, Reseı tarapynan qozǵalys alty jolaqty. Sondyqtan olardyń ótkizý qabileti de joǵary. Qazaqstandyq bólikte de shekaradan ótkizý ınfraqurylymy Reseıden artyq bolmasa kem emes beketter bar. Alaıda báribir munda da kezek az emes. Bul oraıda muny múmkindik bola tura qoldan jasalǵan qyrsyzdyq demeske laj joq. Eń bastysy búginde shekara qyzmetin ońtaıly túrde jolǵa qoıý isi kezek kúttirmeıdi. Búgingi kezde – ýaqyt asa qymbat qoǵamdyq qundylyq qataryna kiredi.Jeke adamdar ǵana emes, shekaralyq óńirler arasynda taýarlar men júk tasymaldaýshylar da ýaqyttan utylmaýy asa mańyzdy. Bul arada artyq talap qoıylyp otyrǵan joq. Bári de tıisti zańdylyqtar aıasynda júıeli túrde jolǵa qoıylǵany jón demekpiz. Temir Qusaıyn. Derek: egemen.kz. Sýret: panoramio.com.