Qorshaǵan ortany qorǵaý – barshamyzdyń mindetimiz

Qazaqstan Respýblıkasy prezıdenttigine kandıdat Ábilǵazy Qusaıynov Petropavl qalasynda «Qyzyljar sý» JShS ujymymen kezdesý ótkizdi. Seriktestik jumysshylarymen kezdesý barysynda prezıdenttikke kandıdat jınalǵandardy ekologııalyq máselelerdi qamtyǵan óziniń saılaýaldy tuǵyrnamasynyń negizgi baǵyttarymen tanystyrdy. Á.Qusaıynov jıynǵa qatysý­shy­larǵa jahandyq ekologııalyq qyzmettiń negizgi vektorlary týraly baıandap, tabıǵatty qorǵaý máselesindegi ǵylym­nyń mańyzyna erekshe toqtaldy. Bul – ekologııalyq qaýipsizdik, klımat pen sý resýrstaryn, «jasyl» tehnologııany zertteý jumystaryn qosa alǵanda, birtalaı mindetter keshenin qamtıtyn mańyzdy maqsat, dedi ol. Prezıdenttikke kandıdattyń aı­týyn­sha, álemde kúni búginge deıin eko­logııalyq problemalarǵa tıisti nazar bólinbeı keledi. Halyqara­lyq qaýymdastyqtar men mamandan­dyrylǵan uıymdardyń atqaryp jatqan ekologııalyq jumystary konferensııa, talqylaýlar, sheshimi joq daýlarmen ǵana shektelip otyr. Al álemde tabıǵat qoınaýyn tıimsiz paıdalaný, gendik qor men bıologııalyq ártúrliliktiń azaıýy topyraqtyń qu­narsyzdanyp, sýdyń lastanýyna, jalpy, qorshaǵan ortanyń quldyraýyna alyp kelýde. Sondaı-aq, prezıdenttikke kandıdat álemdik ónerkásiptiń qarqynymen artyp otyrǵan tehnogendik apattardyń aldyn alý máselesine jeke toqtaldy. Á.Qusaıynov atap ótkendeı, jer júzinde adam paıda bolyp, onyń órkenıeti ósken saıyn, bıosfera evolıýsııasynda jańa – antropogendik faktor iske qosyldy. Adam bıosferany jeke qajettilikterin qanaǵattandyrý úshin paıdalana bastady. Alaıda, qorshaǵan ortany qan­sha­lyqty ózgertýge tyrysqanymyzben, Jer betindegi tirshilik tabıǵattyń qa­tań zańyna baǵynyp damıdy. Son­dyqtan adamzat órkenıeti turaqty damý úshin osy zańdar men qaǵıdalardan aýytqymaýy kerek. «Tabıǵatpen úılesimdi ómir súrý – adamnyń Jer betindegi ómir saltynyń negizgi qaǵıdasy», – dep  atap ótti Ábilǵazy Qusaıynov. Onyń aıtýynsha, ǵylym, tehnıka men tehnologııanyń sapaly jańa baılanysyn qalyptastyrǵan HH ǵasyr qoǵamnyń tabıǵatqa áser etý kúshin arttyryp, adamzatqa birqatar ózekti ári ótkir mindetter júktedi. Sol sebepti, Á.Qusaıynovtyń pikirinshe, tabıǵat qoınaýyn tıimdi ári josparly paıdalaný, qorshaǵan ortany lastanýdan qorǵaý, memlekettik baqylaýdyń josparly júıesin engizý ár azamattyń basty mindetine aınalýy tıis. Á.Qusaıynovtyń saılaýaldy tuǵyrnamasynyń taǵy bir mańyzdy baǵyty – ónerkásiptik qaýipsizdik má­seleleri. Prezıdenttikke kandıdattyń aı­týynsha, ónerkásiptik qaýipsizdik degenimiz – ónim men óndiristiń qaýip­sizdigi týraly, kóp deńgeıli standarttaý men sertıfıkattaý týraly tehnıkalyq reglamentterdi, normalardy qatań ustaný. «Meniń maqsatym – osy norma­lar­dyń ashyq jáne durys oryndalýyna qol jetkizý. Qaýipti óndirispen aınalysatyn barlyq uıymdar óz jumysshylarynyń, nysandary men qorshaǵan ortanyń qaýipsizdigine jaýapty bolýy kerek. Barlyq kásiporyndar óz jumystaryn qorshaǵan ortaǵa yqpaly meılinshe az bolatyndaı etip júrgizýleri kerek», – dep qorytty sózin Ábilǵazy Qusaıynov. Sonymen qatar, «Qyzyljar sý» bir­lestiginiń jumysshylary aldyn­da prezıdenttikke kandıdattyń respýb­lıkalyq shtabynyń jetekshisi Rústem Jolaman sóz sóıledi. Ol ekologııalyq túıtkilderdiń mańyzdylyǵyna toq­ta­lyp, ony der kezinde sheshý qajettigin atap ótti. «Biz týyndaǵan ekologııalyq syn-qaterlerge der kezinde toıtarys berip, qorshaǵan ortanyń lastanýy, sý men topyraqtyń qunarsyzdanýy sııaqty máselelerdi tez arada sheshýimiz kerek. Eń bastysy, bizge bul problemalardyń týyn­daýyna jol bermeý mańyzdy. Bul jerde azamattardyń ózi sanaly túsi­nistik tanytýlary qajet», – dep atap kórsetti prezıdenttikke kandıdattyń respýblıkalyq shtabynyń basshysy. Rústem Jolaman sózin bylaısha túıindedi: Biz ekologııa týraly bilimdi, qaýipsiz ári ekologııalyq taza ortada ómir súrý qaǵıdalaryn, tabıǵat pen adamzatty qorshaǵan orta týraly bilimdi qoǵam sanasyna sińire bilýimiz kerek». О́mir ESQALI, «Egemen Qazaqstan». PETROPAVL.