ASTANA. 12 naýryz. Búgin Astanada Sporttyq jekpe-jek jáne kúsh qoldanylatyn sport túrleri konfederasııasynyń jıyny ótti. Oǵan uıymnyń tóraǵasy Tımýr Qulybaev qatysyp, kelesi jylǵy Rıo-de-Janeıro Olımpıadasyna sportshylardyń daıyndyǵy jaıynda aıtty. Bul týraly egemen.kz habarlady.
«Sportshylarymyzdyń nátıjeleri oqý-jattyǵý jıyndarynyń qalaı júrgizilgenine baılanysty. Bizde elimizdiń Mádenıet jáne sport mınıstrligimen tyǵyz qarym-qatynas ornatylǵan. Olımpıada oıyndaryna daıyndyq maqsatynda boksshylarymyz Brazılııada oqý-jattyǵý jıyndaryn ótkizedi. Bul sol jaqtyń klımatyna boı úıretý úshin asa mańyzdy dúnıe. Elimizdegi basqa federasııalardy da osyǵan shaqyramyn. Biz Rıo-de-Janeıroǵa joldama alýy múmkin sportshylarymyzdyń barlyǵyn sol jaqqa jattyǵý jıyndaryna jiberýimiz kerek», – dedi Qulybaev myrza.
Sonymen qatar, Konfederasııa tóraǵasy aımaqtardaǵy sporttyń damýyna da kóńil bólýimiz kerektigin tilge tıek etti. Sebebi, ulttyq quramada aıtarlyqtaı másele bolmasa da oblystardaǵy sporttyń deńgeıi áli de damytýdy qajet etedi. Osy maqsatta Tımýr Asqaruly tıisti adamdardy aımaqtardaǵy sportshylardyń qarjy máselesinde tapshylyq kórmeýin jiti qadaǵalaýǵa shaqyrdy. Qarjyny maqsatty jumsap, onyń esep-qısabyna muqııat bolý kerektigin aıtqan tóraǵa: «Bizdiń bir ǵana maqsatymyz bar. Ol – 2016 jyly Olımpıada oıyndarynda joǵary nátıjege qol jetkizý. Sol úshin árqaısysymyz adal jumys isteýimiz kere», – dedi.
Jıyn barysynda Tımýr Qulybaev konfederasııanyń jańa bas dırektory bolyp taǵaıyndalǵan Danııar Abylǵazındi tanystyrdy. Osyǵan deıin bul qyzmetti Sáken Musaıbekov atqaryp kelgen edi. Ol jýyrda Úkimettiń qaýlysymen Mádenıet jáne sport mınıstrliginiń vıse-mınıstri laýazymyna taǵaıyndalǵan bolatyn.
Basqosýda kóterilgen taǵy bir másele sport medısınasyna qatysty boldy. Budan bylaı ulttyq quramaǵa múshe sportshylardyń barlyǵy zamanaýı dári-dármekpen qamtamasyz etiledi. Atalǵan medısınalyq preparattar arnaıy kelisim boıynsha jeńil baǵamen satyp alynady. Jıynda tyıym salynǵan dári-dármekti paıdalaný máselesi de qatań tekseriletini aıtyldy. Sondaı-aq, sporttyq tólqujattardy jasaý jumystary da jalǵasyp jatqany belgili boldy. Odan bólek, Halyqaralyq Olımpıadalyq komıtet qazaqstandyq 15 sportshyǵa arnaıy stıpendııa taǵaıyndaǵan. Soǵan oraı, atalǵan sportshylarǵa 2016 jyldyń shildesine deıin aı saıyn 305 AQSh dollary kóleminde aqsha tólenedi. Stıpendııaǵa ilikken sańlaqtarymyzdyń sport túrleri boıynsha federasııalary konfederasııanyń quramyna kiretinin aıta keteıik.
Rıo-de-Janeırodaǵy Olımpıada oıyndary 2016 jyldyń 5-21 tamyzy aralyǵynda ótedi. Al elimiz sportshylarynyń Brazılııadaǵy oqý-jattyǵý jıyndary osy jyldyń tamyzyna josparlanǵan.
Elaman Qońyr.
Derek: egemen.kz.
Sýret: confederation.kz.
