12 jasar bala Federerge qarsy qalaı oınaý kerektigin kórsetti (vıdeo)

ASTANA. 12 naýryz. Tennısten júlde ataýlynyń bárin utqan ataqty Rodjer Federer búgin 12 jasar balaǵa qarsy oınady. Bul týraly egemen.kz habarlady. Negizi Federer bolgarııalyq Grogor Dımıtrovqa qarsy oınap jatqan. Nıý-Iorktegi kórme retinde uıymdastyrylǵan oıynda bolgar tennısshisi 2:1 (6:2, 1:6, 7:5) esebimen jeńiske jetti. Tartystyń eń qyzyqty sáti úshinshi sette boldy. Federer kezekti ret dopty oıynǵa qosýǵa daıyndalyp turǵanda kortqa jas bala shyǵyp, bolgar tennısshisiniń qolynan raketkany aldy.  Urysta turys joq degen qaǵıdany ustanǵan shveısarııalyq ta oılanbastan  dopty oıynǵa qosyp jiberdi. Sol-aq eken jasóspirim bala oǵan jaýap qaıtaryp, dopty qaıtadan Federerdiń aımaǵyna asyrdy. Birneshe soqqymen almasqan Federer torǵa tym jaqyn kelip, balanyń kezekti dobyn qabyldaı almady. Nátıjesinde, 12 jastaǵy bala dańqty Federerden upaı oljalap, raketkany qaıtadan Dımıtrovtyń qolyna ustatty. Elaman Qońyr. Derek: egemen.kz. Sýret: worldsportss.com.