“Bıznestiń jol kartasy-2020” baǵdarlamasyna kásipkerlerdiń qulshynysy zor

Keshe Úkimette Premer-Mınıstr Kárim Másimovtiń tóraǵalyǵymen Ekonomıkany jańǵyrtý jónindegi memlekettik komıssııa men Kásipkerlik máseleleri jónindegi biryńǵaı úılestirý keńesiniń birlesken májilisi bolyp ótti. Onda qaralǵan “Bıznestiń jol kartasy-2020” baǵdarlamasynyń ekinshi baǵytynda júzege asyry­latyn 16 jobany kásipkerlerge tapsyrý máselesi jóninde Eko­no­mıkalyq damý jáne saýda mı­nıstri Janar Aıtjanova baıan­da­ma jasady. Baıandamashynyń aı­týynsha, atalǵan jobalardy jú­zege asyrýǵa kásipkerlik qury­lym­dar erekshe qyzyǵýshylyq tanytýda. Muny osy jobalardy júzege asyrý isine qatyssaq degen nıetpen ekinshi deńgeıdegi bank­terge 517 tapsyrys jasalǵan­dy­ǵynan ańǵarýǵa bolady. Sonyń ishinde jańa nysandar men bu­rynǵy kásiporyndardy jańǵyrtý úshin beriletin nesıelerdiń stav­kalaryn jeńildetýge baǵyttalǵan birinshi baǵyt boıynsha 16,7 mlrd. teńgeniń sýbsıdııasyna 91 tapsy­rys tússe, bıznes sektordy saýyq­tyrý jónindegi ekinshi baǵyt boıynsha 174,7 mlrd. teńgeniń tap­syrystary túsken. Al eks­portqa baǵyttalatyn ónimder shyǵarýdy qoldaýǵa negizdelgen úshinshi baǵyt boıynsha berilip otyrǵan 34,2 mlrd. teńgeniń 18 tapsyrysy jasalynyp otyr. Osy rette Janar Aıtjanova oblystar arasynan eń kóp tapsyrystar Shyǵys Qazaqstan oblysynan kelip túskendigin málimdedi. Osy oblys boıynsha túsken tapsyrystardyń jalpy sany – 74. Olar kóbinese Turan­álembank pen Sentrkredıtbank arqyly jasalynǵan. Munan keıin kelip túsken tap­syrystardyń sapasy týraly áń­gime qozǵaldy. Osy rette sóz alǵan Qarjygerler assosıasııa­sy­nyń tóraǵasy Serik Ahanov  atalǵan másele jóninde qarjy­gerler pikirine qoldaý bildirgen Úkimetke alǵysyn aıta kele, ká­sip­kerlik qurylymdardan tapsy­rystyń kóptep túsýi “Bıznestiń jol kartasy-2020” baǵdarlamasyn júzege asyrýda jaqsy nyshan ekendigin, Úkimettiń osynaý negizgi jobalarynyń birine bıznes qaýym­dastyqtyń erekshe yqylas tanytyp otyrǵandyǵyn atap kór­setti. Endigi eń basty másele tap­sy­rystarǵa baılanysty júrgizi­le­tin saraptama isin sapaly jolǵa qoıý bolyp otyr. Al “Atameken” odaǵy” Qa­zaq­stannyń ulttyq ekono­mı­ka­lyq palata­synyń tóraǵasy Azat Perýashev ózderi­niń jer­gilikti jerlerde bolyp, kásipkerlik qurylym­darǵa beri­letin nysan­dar­dy baıqap kórgendikterin, olardy júzege asyrýǵa kásipker­lerdiń erekshe qulshynysty ekendigin aıtty. Árıne, ekinshi deńgeıdegi bankter “Bıznestiń jol kartasy-2020” baǵdarlamasy aıasynda jú­zege asyrylatyn jobalardy qar­jylandyrýdy bastarda kásipker­ler­den túsken usynysty óz bet­teri boıynsha barynsha zert­tep, oǵan nesıeni berýge bola ma, bolmaı ma degen máseleni naqty sheshýge umtylatyndyǵy anyq. Sondyqtan otyrysta eger kásip­kerdiń tapsyrysyn bank qoldap otyrsa, oǵan senim artýǵa bolady degen pikirler de aıtyldy. Munan keıin “Bıznestiń jol kartasy-2020” baǵdarlamasynyń jalpy júzege asý barysy qa­raldy. Osy másele boıynsha baıandama jasaǵan Ekonomıkalyq damý jáne saýda mınıstri Janar Aıtjanova osy baǵdarlama boı­yn­sha qarjy bólýdiń burynǵy jasalǵan talaptaryna ózgerister engizý jóninde birqatar usynys­tar jasady. Sonyń biri – bir bıznes jobaǵa beriletin nesıe qar­jynyń kólemin 3 mıllıard teńgeden asyrmaý. Osy rette Janar Aıtjanova atalǵan talap oryndalǵan jaǵdaıda “Jol kar­tasy” boıynsha qarjy kóptegen kásipkerlerge tıetindigin aıtty. Sondaı-aq, ereje boıynsha  eldi mekenderdegi nysandarǵa qarjy bólý úshin sol eldi mekendi damy­týdyń bas jospary bolýy qajet degen talap aýyrlaý tıip turǵan sııaqty. О́ıtkeni, mundaı jaǵ­daıda bas jospary ázir bolmaǵan eldi meken baǵdarlama aıasynan syrtqary qalyp qoımaq. Ekonomıkalyq damý jáne saýda mınıstri, mine, osyndaı birneshe usynys jasady. Birlesken otyrysty Úkimet basshysy Kárim Másimov qorytyndylady. Suńǵat ÁLIPBAI.