Araldyń tabanynan sý ketkenmen, jurtynyń júreginen jyr ketken joq

Elbasy Nursultan Ábishuly Nazarbaevtyń “Men Aralǵa kó­mek­tesemin degen armanyma jetkenime qýanyshtymyn” degen sózi barsha araldyqtardyń júregine máńgilikke jazylyp qalǵan desek, asyra aıt­qandyǵymyz bolmas. Elbasy aıtsa aıtqandaı, kúni keshe kelmeske ketip bara jatqan Aral teńiziniń or­nyna Kishi Aral kelip, aral­dyq­tardyń ahýaly jaqsara tústi. Aq sha­ǵalalar qańqyl qaǵyp, sary sazandar men aq tyrnalar tirshilik tynystaryn keńeıtti. Kezinde údere kóshken araldyqtar týǵan topy­raq­taryna qaıta kelip, teńiz tós­keı­in­degi qaıyqtarynyń aq jelken­de­rin qaıta kóre bastady. Áńgimeniń ashyǵyn aıtar bolsaq, tikeleı El­basynyń nusqaýymen Kishi Araldy saqtap qalý jónindegi ǵalamat jobanyń júzege asyrylýy el-halyqtyń eńselerin qaıta tikteý­lerine birden bir sebepshi boldy. Araldyqtardyń osyndaı shat-shadyman tynys-tirshilikterin jyl saıyn dúıim jurtqa jetkizýdi murat tutqan oblys ákimi Bolatbek Qýandyqovtyń bastamasymen Aral kúnderi ótkiziletin boldy. Kúni keshegi mereke – Aral aımaǵy halqynyń shattyq bastaýy boldy. Eki kúnge sozylǵan Aral kúnderi merekesinde shańqyldap shaǵalalar ushty, kúmbirlep kúı tógildi, syń­ǵyrlata án salynyp, syl­qyldaı bı bılendi. Aral kúnderi merekesi Qambash kóliniń jaǵa­syn­da bastaý aldy, ıaǵnı osy kól jaǵasynda bolashaqta boı kóterer demalys or­nynyń jo­basynyń tu­saýy kesildi. Alma­ty­lyq “Ýr­bostıl” JShS dı­rek­­tory L.Ny­san­baeva sol joba nusqa­sy­men jan-jaqty tanystyrdy. Osy kúni keshkilik Aral qalasynyń ortalyq ala­ńy­na jınalǵan halyq­tan jer qaıysty. “Aral – adam­zat­tyń aq jelkeni” atty shara ashylar al­dyn­da qoıylǵan teatrlan­dyrǵan kóriniste “Aralym – anam kele ja­tyr” degen kópshilik daýsy qulaq tun­dyr­dy. Teńiz tós­keıindegi keme­den túsken kapıtan oblys áki­mi­ne qaıta oral­ǵan teńiz qaıy­ǵy­nyń es­kegin tabys etti. Aral aımaǵy – aıtýly jer. Bul aımaqta kezinde 16 Eńbek Eri ómirge kelse, Nurtýǵan, Nur­ma­ǵanbet, Ja­ńa­bergen, Dáriqul, Jap­parberdi syn­dy ot aýyzdy, oraq til­di shaı­yr­­lar men Zeınolla Shú­kirov, Ábdi­já­mil Nurpeıisov syndy aqyn-ja­zý­shylar, Temirhan, Nabat, Qudaı­ber­­gen sııaqty óner sańlaq­tary týyp-ósip, órken jaıǵan. Oblys ákimi Elbasynyń Aral aımaǵyna jasap jatqan qamqor­ly­ǵyna erekshe toqtaldy. Prezı­dent­tiń bastamasynan bastaý alǵan SARATS jobasynyń birinshi kezeńi sátti aıaqtalyp, Kishi Araldyń sý kó­lemi 27 mlrd. tekshe metrge jetti. Ke­zinde keýip qalǵan 70 kóldiń 30-y qalpyna kelip, 14 túrli balyq aý­lanyp jatyr. Búginde 2 myńnan astam adam ózderiniń ata kásipteri – balyqshylyqqa bel sheshe, bilek túre kirisip ketken. B.Qýandyqov aýdan azamatta­ry­na oblystyń “Qurmet gramotasy” men “Alǵys hattaryn” tabys etse, aýdan ákimi N.Musabaev “Aral aý­da­nynyń qurmetti azamattary” tós­belgilerin – jazýshy Begimbaı Uzaqbaev pen arda­ger-zańger Iman­ǵalı Seıitovke taqty. Munan soń alańǵa jınalǵan qa­raqurym halyq Turmaǵanbet atyn­daǵy ult-aspaptar orkestriniń oryndaýyndaǵy kúılerge qulaq quryshtaryn qandyrdy. Merekeniń ekinshi kúni A.Baı­tur­­synov kóshesiniń boıynda fýtbol jáne oıyn alańdary ash­yl­dy. Odan soń jańa sporttyq-saý­yq­tyrý ke­she­ninde akrobatıkadan qazaq jastary arasynan shyqqan tuńǵysh KSRO sport sheberi Dárı Qutty­mu­ratov atyndaǵy erkin kúres týrnıri ótti. Eki kúnge sozylǵan mereke sońy “Aral – bolashaqtyń boıtumary” ga­la-konsertimen márege jetti. Aıt­qandaı, “Aralym – aıdyn shal­qa­rym” atty jazba aqyndar músháı­ra­sy men aıtys aqyndarynyń sóz tartysynda Nazgúl Berdiqoja bas júldeni ıem­dense, aıtysker aqyn Aıdos Rahmetov temir tulpardy taqymyna basty. Sal­tanat sońynda Memlekettik syı­lyq­tyń ıegeri, aqyn Qadyr Myrza Álı óziniń júrekjardy lebizin jetkizdi. Bul maqalanyń taqyrybyn joǵarydaǵydaı etip aıqaılatyp qoıýda bir negiz bar. Zamanynda te­ńiz sýy tartylyp, araldyqtar ab­yr­­jyp qalǵanda týma talant, mar­­­­qum Bekuzaq Táńirbergenov osylaı dep ómirden ótip edi. Endi, mine, jyr da, sý da Aralǵa oraldy. Erkin ÁBIL. Qyzylorda oblysy, Aral qalasy.