Otyz kún oraza ustap, ımandylyq tanytyp, ıbalylyqqa bet burǵan baýyrlarymyzǵa L.N.Gýmılev atyndaǵy Eýrazııa ulttyq ýnıversıtetiniń basshylyǵy dastarqan uıymdastyryp, aýyz ashtyrdy.
Ramazan aıynda oraza tutyp, aýyz bekitken oqytýshylar men qyzmetkerler, stýdent jastar bul ıgilikti iske ózderiniń dán rızalyqtaryn jetkizdi. 600-den asa aýyz bekitken azamattardyń arasynda ardaqty aqsaqaldar men aqjaýlyqty analar da az bolǵan joq. Sol sekildi elordamyzdaǵy kıeli oryndardyń birinen sanalatyn “Nur Astana” meshitiniń ımamdary men din ókilderi qatysyp, Jaratýshymyzdyń ósıet-ónegesinen jan-jaqty áńgime qozǵap, adamdyq pen adaldyq, azamattyq, ıman jolyndaǵy tazalyq týraly oı órbitti. Jastarǵa ıslamnyń qadir-qasıeti týraly keńinen tolǵap, musylman áleminiń qundylyqtary tóńireginde suhbattasty.
Osyndaı ónegeli iske uıytqy bolǵan bilim ordasynyń basshylarynyń atynan oqý-ádistemelik jumys jáne strategııalyq damý jónindegi prorektor Dıhan Qamzabekuly 30 kún orazanyń óz qýaty, adam boıyna darytar jaqsylyǵy baryn, Allaǵa qulshylyq etip, oraza tutqan barsha jamaǵattyń, onyń ishinde stýdent jastardyń keýdelerindegi sáýle men izgi nıetin bildirip, olardyń tilegen tilekteri qabyl bolsyn, dedi.
Jyl saıyn osyndaı aýyzashardy dástúrge aınaldyryp kele jatqan oqý ornynyń jaqsy isi ózgelerge úlgi bolarlyq. Biz orazadan keıin de ımandylyq jolyndaǵy tálim-tárbıe máselesin jalǵastyra beretin bolamyz, deı kelip, prorektor aýyzasharǵa jınalǵan qaýymǵa ýnıversıtet ákimshiligi atynan jaqsylyqqa uıytatyn eńbekter men ultymyzdyń uly oıshyly, hakim Abaıdyń eki tomdyq shyǵarmalar jınaǵyn syıǵa tartty.
Súleımen MÁMET.
* * *
Orazadaǵy ońdy ister
Túrkistan qalasynyń ákimi Qaırat Moldaseıitovtiń bastamasymen ramazan aıynda áleýmettik jaǵynan az qorǵalǵan, kómekke muqtaj otbasylarǵa járdem berildi. Aldymen kómekke muqtaj 100 otbasy tańdap alynyp, olarǵa birneshe qap un, piste maı jáne úsh tonnadan kómir berildi. – Túrkistan – el aýzynda qazaqtyń rýhanı astanasy ári ımandylyq qalasy dep atalady, – deıdi qala ákimi. – Sondyqtan, izgi bastamalardyń osy qasıetti aımaqta qolǵa alynýy zańdy. Bir jolǵy kómekpen, árıne, eshkimniń qabyrǵasyn jaba almaımyz. Biraq, aılardyń sultanynda, aıt kúnderi kómekke muqtaj otbasylar eshkimge jaltaqtamaı qazanyn kótere alady. Igi bastamany HQTÝ rektory Lesbek Táshimov, “Aq jol” fırmasynyń prezıdenti Sabyr Ataev, Áziret Sultan mýzeıiniń basshylyǵy qoldaǵan. Jıynda “Kentaý” transformator zaýyty” dırektorlar keńesiniń tóraǵasy Seıdýlla Qojabaev ujym atynan 200 myń teńge bólinetindigin aıtty. Biz kómek berilgen bir otbasynyń shańyraǵyna bas suqtyq. Aýǵanstannan tarıhı Otanyna oralǵan Quseıin balasy Afqan qarııanyń qoly qysqa. Japyryp jumys jasar azamat balasy joq. Memlekettik kómektiń arqasynda jan baǵyp otyrǵan olar kómekke asa muqtaj. Afqan qarııa qala basshylyǵyna rahmetin aıtyp, kózine jas aldy. Ramazan aıy aılardyń sultany. Musylmandar úshin qasıetti aı. Dáýletti azamattar osyndaıda otandastaryna kómek kórsetse sadaqasy qabyl bolady. Memlekettik kómekke qarap otyrǵan otbasylardyń jaǵdaıynan osyny uǵýǵa bolatyndaı. Olardyń birazy aýlasyna kómir túsirilgende qatty qýandy. О́ıtkeni, Ońtústiktiń qysy qysqa. Úsh tonna kómirmen kóktemniń jylymyǵyna iligýge bolady. Túrkistan qalasynyń ákimdigi mundaı kómekterdi turaqty kórsetýge baǵyt ustap otyr. Baqtııar TAIJAN. Ońtústik Qazaqstan oblysy, Túrkistan qalasy.
