Partııa sportty qoldaıdy

Qazaqstan sporty damýdyń jańa kezeńine aıaq basty. Elimizde halyqaralyq deńgeıdegi jarystar men chempıonattar ótkizilip, sport­shylarymyz asa abyroıly jarys­tarda bıik tuǵyrdan kórinip júr. Oǵan tamyz aıynyń 14-i men 26-sy aralyǵynda Sıngapýrde ótken alǵashqy jazǵy jasóspirimder olımpııa oıyny dálel bola alady. Qazaqstan beıresmı komanda­lyq esep boıynsha 205 eldiń arasy­nan 24-shi oryndy enshiledi. 10 qyrkúıekte Ortalyq apparatta osy halyqaralyq sharada laıyqty óner kórsetken qazaqstandyq sportshy­larǵa qurmet kórsetildi. Saıys júldegerlerimen bolǵan kezdesýdi ashqan partııa Tóraǵasynyń birinshi orynbasary Nurlan Nyǵmatýlın: “Sizder, álemniń 200-den astam eli qatysqan halyqaralyq jazǵy jasóspirimder olımpııa oıynyna qatysyp, joǵary kórsetkishke qol jetkizdińizder. Sıngapýrde alǵash ret ótkizilgen mártebeli jarysta, sizder altyn, kúmis, qola medaldar ıelenip, búkil álem aldynda taǵy bir ret Qazaqstanymyzdyń abyroıyn, mereıin kóterip qaıttyńyzdar. Bul Elbasymyz, partııamyzdyń Tóraǵasy Nursultan Ábishuly Nazarbaevtyń barlyq salaǵa, sonyń ishinde sportqa da erekshe qoldaý kórsetip otyrǵanynyń nátıjesi deýge bolady”, – dep atap ótti. О́z kezeginde sportshylar men jattyqtyrýshylar quramy deni saý urpaq tárbıeleý ıdeıasyn qoldaýǵa, sportpen shuǵyldanýdy keń kólemde nasıhattaýǵa daıyn ekendikterine sendirdi. Kezdesý barysynda “Nur Otan” partııasynyń basym baǵyttarynyń biri halyqty sportpen shuǵyldanýǵa yntalandyrý jáne dene tárbıesin damytý ekeni aıtyldy. Jyl saıyn partııada túrli jastaǵy myńdaǵan turǵyndar qatysatyn kóptegen sporttyq sharalar men aksııalar ótkizilip turady. Bul salamatty ómir saltyn qalaıtyndardyń sanyn arttyrýǵa yqpal etip keledi. Aıta keteıik, qazaqstandyq sportshylar grek-rım kúresi, aýyr atletıka, taekvondo túrlerinen eki altyn, eki kúmis, eki qola medaldi qanjyǵasyna baılady. Sonymen qatar, dzıýdo boıynsha synaqtan tys aralas komandalyq esepte joǵary dárejeli bir medal jeńip aldy.