Jańa jobalarǵa jol ashyq

“Nur Otan” HDP oblystyq fılıalynyń májilis zalynda “Bereke-Birlik” pikirtalas klýbynyń uıymdastyrýymen “Astana qalasynyń aımaqtyq tehnoparki” jaýapkershiligi shekteýli seriktestigi úlgisindegi ınnovasııalyq ındýstrııalandyrý Aqmola oblysynyń oıdaǵydaı damýynyń tıimdi joly” atty keńes bolyp ótti. Májiliske memlekettik organ­dar­dyń basshylary, kásipkerler, saıası partııalar men qoǵamdyq bir­lestikterdiń ókilderi, joǵary oqý oryndarynyń oqytýshylary men stýdentteri qatysty. Onyń jumy­syn júrgizip otyrǵan partııanyń oblystyq fılıaly tóraǵasynyń birinshi orynbasary Ǵalym Shoı­kın ekonomıkany damytýdyń óńir­lik basym baǵyttarynyń maqsat­taryna toqtaldy. – Jeke kásipkerlik memleket­tik saıasattyń qozǵaýshy kúshine aı­naldy, – dedi ol. – Ony damytý­dyń tirek zańnamalary qalyp­ta­syp, Úkimet tarapynan qoldaý sha­ra­larynyń órisi keńeıdi. “Astana tehnoparkiniń” oblysymyzǵa kelýi óńirlik tartymdylyqtyń ósken­di­gin aıqyndaıdy. Qazirgi talap – óndiristi ártaraptandyryp, shıki­zat­tyq emes salany órkendetý. Munda ozyq úlgidegi ınnovasııalyq jobalar ǵana tabysqa bastaıdy. Jergilikti kásipkerler qonaqtary­myz­dyń usynystaryn saralap, áriptestik baılanystyń jemisin kóretinine senimdimin. “Astana qalasynyń aımaqtyq tehnoparki” JShS dırektory Murat Aqshalov ýaqyt talabyndaǵy kásiporynnyń jumys josparlary men atqarylǵan ister jaıynda egjeı-tegjeıli áńgimeledi. Qazaq­standa qazir osyndaı 8 tehnopark jumys isteıdi. Olar údemeli ın­dýstrııalyq-ınnovasııalyq damýdy kózdeıtin memlekettik baǵdarlama sheńberinde qurylǵan. Tehnopark­ter bıznes qurylymdary men jas kásipkerlerge ınternettik málimet, býhgalterlik jáne zańgerlik keńes berip, bolashaǵy mol ǵylymı teh­no­logııany, ishki rynokta suranys­qa ıe jáne eksporttyq áleýeti jo­ǵary taýar óndirý men qyzmetterdi qurýǵa septesedi. Jańa ári tıimdi jobalarǵa ınvestısııa tartý, ozyq tehnologııalardy kásibı sarapta­madan ótkizip, óndiriske engizý jumystyń negizgi baǵyty sanalady. Dırektordyń aıtýynsha, ústimizdegi jyly tehnologııalyq bıznesti damytý qyzmetine bıýdjetten 245 mıllıon teńge qarjy bólingen. Keńeske qatysýshylar tehno­park uıymdastyrǵan kórmeni tama­shalap, iskerlik keńester aldy. “Nur Otan” partııasynyń oblys­tyq fılıalynda “Bıznestiń jol kartasy–2020” arnaıy bólme jab­dyqtalatyn boldy. Baqbergen AMALBEK. Aqmola oblysy.