QYRǴYZSTAN: Parlament saılaýynyń alamany bastaldy

Bul kúnderde Bishkek kóshelerinde sonadaıdan kóz tartqan kórkem bıl­bord-plakattar kóbeıe túsken. Qyrǵyz eliniń saıası ómirine qaıtadan qan jú­girip, shyraılanǵan túri bar. Onyń se­bebi, aldaǵy 10 qazanǵa belgilengen Qyr­­­ǵyzstan Parlamenti saılaýynyń alaman báıgesi sóreden shyǵyp, bola­shaq Parlamenttegi oryndardan dámeli partııalardyń úgit-nasıhat jumysyn bastaýǵa resmı túrde ruqsat etildi. Saılaý aldyndaǵy mańyzdy naý­qan­­dy zor qulshynys-jigermen bel­sen­di bastap ketken partııalarǵa keler bolsaq, eldegi 150 partııanyń 29-y bar­­lyq rásimdi talaptardan ótip, Or­talyq saılaý komıssııasynda zańdy tú­r­de tirkeldi. Komıssııa tóraǵasy A.Fa­rıev saılaý kúni 2 mıllıon 700 myń saılaýshy daýys beretinin aıtýda. Naq qazir mynaý jeńedi dep, kóp daýys alady dep, jańaǵy partııalar­dyń ishinen bireýin daralap bóle-jara ataý qıyn. Dese de, “Mızamnyń temir qalqany” dep zańdylyq aıasyndaǵy is-áreketti tý etken “Ar-Namys”, “Ata­meken”, “Ata jol”, “Aqsuńqar”, “Qyr­­­ǵyzstannyń sosıal-demokratııalyq” jáne basqa partııalardyń el ishindegi tanymaldyǵy da osy ázirden qylań berip qalǵandaı. Bul partııalar adal, ádil hám ashyq kúresti talap etip otyr. Qazirden bastap bılik oryndaryna, bylaısha aıtqanda, “ákimshilik resýrs” deıtindi iske qosyp, ala qoıdy bóle qyrqatyn bolsańyzdar, ol Qyrǵyz eliniń bolashaǵyn oılaǵandyqqa jatpaıdy” dep aldyn-ala málimdeýde. Sáýir aıynda búlinshilikke toly dúrbeleńdi, maýsymda Oshtaǵy qaı­­ǵy­ly oqıǵalardy bastan keshken Qyrǵyz elinde tynyshtyq pen kelisimdi qamta­masyz etip, demokratııalyq qoǵamdy or­nyqtyratyn joldaǵy alǵashqy mańyzdy qadamnyń biri osy Parla­ment saılaýy bolǵaly otyr. Bul saı­laýdyń teń quqyqty jáne demokra­tııa­lyq stan­darttarǵa sáıkes ótýine ha­lyqara­lyq qoǵamdastyq ta úlken mán berýde. Soǵan oraı, Bishkekke arnaıy ju­mys saparymen kelgen Is basyndaǵy EQYU tóraǵasynyń arnaıy ókili, Qa­zaqstan Respýblıkasynyń Parlamenti Májilisi Tóraǵasynyń orynbasary Já­nibek Káribjanov, BUU Bas hat­shy­sy­nyń arnaıy ókili Mıroslav En­she­men, Eýroodaqtyń Ortalyq Azııa boı­­ynsha arnaıy ókili Per Mo­rel­men jáne EQYU-nyń janjaldardy boldyrmaý jónindegi ortalyǵynyń jetekshisi Gerbert Saldermen birlese otyryp, Qyrǵyz Respýblıkasy bılik oryndarynyń basshylarymen birqatar kezdesýler ótkizdi. Bul kezdesýlerde res­pýblıkadaǵy saılaý aldyndaǵy jaǵ­daı keńinen talqylanyp, arnaıy ókil­­­der óz tarapynan aldaǵy Parlament saılaýynyń uıymshyldyqpen ádil ótýiniń mańyzdylyǵyn atap kórsetti. Olar sondaı-aq saıası partııalardyń ókilderimen kezdesip, olardy ózara to­le­ranttylyqqa jáne saılaý aldyndaǵy naýqandy júrgizý barysynda óz báse­kelesterine qurmetpen qaraýǵa shaqyr­dy. EQYU jáne oǵan múshe elder, atap aıtqanda, Qazaqstan, Reseı, AQSh, Túrkııa jáne basqalary Qyrǵyzstan halqy men úkimetine qaýipsizdik pen turaqty damýdy qamtamasyz etý jo­lynda, atap aıtqanda demokratııalyq ıns­tıtýttardy damyta túsý úshin, adam quqyǵyn qorǵap, zańnyń ústemdigin ny­ǵaıta túsý úshin óz qoldaýy men gýma­­nıtarlyq jáne tehnıkalyq kómegin odan ári jalǵastyrýda. J.Káribjanov bastaǵan EQYU delegasııasy Qyrǵyzstannyń ótpeli kezeńdegi prezıdenti Roza Otýnbaevamen kezdesti. Qyrǵyz Respýblıkasynyń bas­­shysy aldaǵy saılaýdy demo­kra­tııa­lyq talaptarǵa saı ótkizý úshin bar kúsh-jigerdi jumsaıtyndyqtaryna sendirdi. Saılaýǵa ázirlik jáne ony ótkizý kezeńine EQYU-nyń demokra­tııalyq ınstıtýttary jáne adam qu­qy­­­ǵy jónindegi bıýrosy tarapynan 300-den astam baqylaýshy keledi dep kútilýde. Qorǵanbek AMANJOL – Bishkekten.