Mańyzdy mıssııanyń mártebeli mejesi

EQYU-ǵa múshe elder memleket basshylarynyń Astanada ótetin Sammıtin júrek lúpildeı kútip otyrmyz. Kelgen meımandar elimizdiń qonaqjaılyǵyna kózi qanyp, kóńili tolyp keterine esh kúmán joq. О́ıtkeni, qonaqjaılyq qasıetimiz halqymyzdyń dástúri arqyly tereńnen tamyr tartqan ulttyq úrdis bolyp tabylady.

Marapat ıelerin tapty EQYU úsh sebetindegi máselelerdi sheshýdi kózdeıtin Uıymǵa múshe elder áreketterin sol elder turǵyndarynyń qoldaýy oryndy. Osyǵan oraı ortaq isterge azamattardy kóbirek tartý kez kelgen uıymnyń basymdyq beretin máseleleriniń biri bolsa kerek. Elimiz Syrtqy ister, Bilim jáne ǵylym mınıstrlikteri osy rette jalpyulttyq shyǵarmalar baıqaýyn ótkizgen-di. Keshe sonyń qorytyndysy jarııa etildi. Uıymdastyrýshylardyń málimetine qaraǵanda, elimizdiń túkpir-túkpirinde turatyn jasóspirimderden 200-ge tarta shyǵarmalar kelip túsken. Sonyń eń mazmundy ári maǵynasy tereń degen ony tańdap alynyp, úsheýi jeńimpaz dep tanylǵan. Baıqaý sharttary boıynsha elimiz mektepteriniń 9-11 synyp oqýshylaryna EQYU elderi basshylarynyń birine nemese barlyǵyna arnalǵan joldaý hat túrindegi shyǵarma jazý kerek bolatyn. Sondaı-aq jasóspirim Uıym qyzmetindegi ózekti degen máselelerge qatysty jeke kózqarastaryn da bildire ketýi usynylǵan. Baıqaý barysynda qazylar alqasy quramyna kirgender shyǵarmalardy tańdap alý óte qıynǵa túskendigin tilge tıek etti. Bul jóninde “QR-daǵy Mısýbısı Kor­poreıshn” ókildiginiń basqarýshy dırektory Hırokazý Saıto  erekshe aıtyp ketti. Áıtse de úsh shyǵarma tańdap alynypty. Baıqaý nátıjesi boıynsha Pavlodar obly­synyń Ekibastuz qalasyndaǵy №7 mekteptiń 10 synyp oqýshysy Iýlııa Býr­mıstrova  gran-prı ıegeri dep tanylǵan. Mek­tep oqýshysy óziniń joldaý shyǵar­masynda EQYU-ǵa qatysýshy memleketterdiń azamattary Uıym qyzmetinen habardar emes degen taqyrypty kóterip, qalyptasqan máselelerdiń sebepterin taldap, ony sheshý joldaryn usynypty. Ekinshi orynǵa ıe bolǵan Shymkent qalasyndaǵy Muhammed Haıdar Dýlatı atyn­daǵy №8 gımnazııanyń 11 synyp oqýshysy Dilnaz Irısmetova qaýymaralyq óshpendilik, nashar bilim alý men kedeıshilik arasyndaǵy baılanystarǵa oı jibergen. Onyń shy­ǵarmasynda Eýrazııa aımaǵyndaǵy oryn alǵan etnostyq qaqtyǵystar barysy zerdelenip, EQYU-ǵa múshe elder basshylaryn azamattar, ásirese, jastar arasyndaǵy túsinistikti damytýǵa shaqyrady. Baıqaýdyń úshinshi jeńimpazy bolyp taǵy bir ekibastuzdyq oqýshy, 17 jasar Jánel Baıdildına tanylǵan. Ol óz shyǵarmasynda Uıymǵa múshe elder kóshbasshylarynan memleket pen qoǵam arasyndaǵy senimdilikti nyǵaıtý qajettigine nazar aýdarýdy surapty. Jeńimpazdarǵa laıyqty qurmet kórsetilip, syı-syıapattar tabys etildi. Qazaqstandaǵy Shetel ınvestorlary keńesine múshelik etetin kompanııalar, atap aıtqanda, “Aýstrııa áýe joldary”, “Mısýbısı Korporeıshn”, “METRO Kesh end Kerrı” jáne TNRC Kazakhstan baıqaýǵa laıyqty demeý kórsetip, jeńimpazdarǵa úsh noýtbýk, al gran-prı ıesine Venaǵa baryp qaıtý múmkindigin taǵaıyndaǵan. Al “Baldáýren” respýblıkalyq oqý jáne saýyqtyrý ortalyǵy jeńimpazdarǵa Býrabaı­daǵy “Balalyq arman araly” keshenine jyldyń qalaǵan mezgilinde 21 kún boıy demalý múmkindigin syılady. Aǵylshyn tilinde jazylǵan shyǵarmalar­dyń jeńimpazdaryna syı-syıapattaryn tabys etý EQYU Sammıtiniń Medıa-ortalyǵynda saltanatty jaǵdaıda ótkenin aıta ketý kerek. Atalǵan sharaǵa qatysýshylardyń barlyǵy da sammıt bederinde sýretke túsip, telearnalarǵa suhbattaryn da berip jatty. Eń bastysy – mundaı áser balalardyń júreginde uzaq saqtalyp qalary aıtpasa da túsinikti.

Uıymnyń barlyq jumysyna belsendi qatysady

Keshe Astana Sammıti aıasynda EQYU Parlamenttik Assambleıasynyń Prezıdenti Petros Eftımıý buqaralyq aqparat quraldary ókilderine brıfıng ótkizip, Parlamenttik Assambleıanyń róli jóninde oı bólisti jáne jýrnalısterdiń suraqtaryna jaýap qaıtardy. Petros Eftımıý myrzanyń atap ótkenindeı, Uıymnyń Parlamenttik Assambleıasy Vankýverden Vladıvostokqa deıingi keńistikti qamtıtyn bedeldi halyqaralyq uıym – EQYU-nyń kún tártibine qoıylǵan barlyq máseleler jumysyna belsendi qatysady. Sonymen qatar, Parlamenttik Assambleıa EQYU-ǵa qatysýshy memleketterdiń Assambleıaǵa múshe parlamentshileri arqyly Uıymǵa múshe elderdiń parlamentimen tyǵyz yntymaqtastyq ornatýdy maqsat etedi. Janjaldardyń aldyn alýǵa, konstıtýsııalyq zańdylyqtyń saqtalý mehanızmin daıyndaýǵa kómek kórsetedi. Osynyń barlyǵy parlamentaralyq únqatysý arqyly júzege asyrylady. – Parlamenttik Assambleıada Kavkaz, Ortalyq Azııa, genderlik, taǵy basqa da arnaıy máselelermen aınalysatyn ókilder bar, – dedi Parlamenttik Assambleıanyń Prezıdenti. – Assambleıa, sondaı-aq Uıymǵa múshe memleketterde ótetin saılaýlarǵa baıqaýshylar da jiberedi. Biz jyl saıyn Parlamenttik Assambleıanyń jıynyn ótkizip turamyz. 2008 jyly Astanada Parlamenttik Assambleıanyń jıyny tabysty ótkenin aıta ketpekpin. Erteń Astana Sammıtiniń aldynda Assambleıanyń bıýrosynyń májilisi ótedi. Petros Eftımıý, sondaı-aq Astana Sammıtiniń ashylýynda Parlamenttik Assambleıanyń Prezıdenti retinde sóz sóıleıtindigin de jasyryp qalmady. Onyń habardar etýinshe, Parlamenttik Assambleıa tarapynan kópten beri aıtylyp kele jatqan usynystar bar. Olardyń birqatary Astana qujatyna engizildi. – Astana Sammıtiniń orny erekshe, onda talqylanatyn máseleler barlyǵyna ortaq, – dedi ol sóziniń sońynda. – О́ıtkeni, EQYU qyzmetin jan-jaqty damytýda memleketter  basshylarynyń saıası únqatysýy asa qajet. Parlamenttik Assambleıa EQYU-nyń joǵary deńgeıdegi sammıtinen osyny kútedi. EQYU Parlamenttik Assambleıasynyń Prezıdenti Petros Eftımıýǵa jýrnalıster tarapynan birqatar suraqtar qoıyldy. Olardyń deni Taýly Qarabaq problemasyna, Grýzııanyń aýmaqtyq tutastyǵyna, Ázirbaıjanda ótken parlamenttik saılaýdyń nátıjesine baılanysty boldy. Ýaqytynyń tyǵyzdyǵyna qaramastan, qoıylǵan suraqtarǵa ol qysqa ári naqty jaýap qaıtardy. О́ıtkeni, Petros Eftımıýdiń negizgi mamandyǵy – jýrnalıst.

Qazaqstan sammıtti ótkizýge ázir

Keshe keshke EQYU Sammıtine ázirlik jónindegi atqarýshy hatshy, Erekshe tapsyrmalar jónindegi elshi Serjan Ábdikárimov qazaqstandyq jáne sheteldik buqaralyq aqparat quraldary ókilderiniń aldynda ashylýyna sanaýly saǵattar qalǵan EQYU-nyń Sammıtine ázirlik barysy jóninde baspasóz máslıhatyn ótkizdi. Baspasóz máslıhaty Syrtqy ister mınıstrliginiń resmı ókili, Imıdjdik jumys basqarmasynyń bastyǵy Asqar Abdrahmanovtyń moderatorlyǵymen ótti. Serjan Ábdikárimov óz sózin búgingi kúni sammıtke qatysýǵa tirkelip otyrǵan de­legattardyń sany 2,5 myń adamǵa jet­kendiginen bastady. Onyń aıtýynsha, óti­nishter búgingi kúnge deıin túsip jatyr. Demek, delegattar sany budan da óse túsýi ábden múmkin. Munyń syrtynda sammıtke aqparattyq qoldaý kórsetý úshin 1,2 myńnan astam jýr­na­lıst tirkelip úlgergen eken. Aldaǵy ýaqytta bul san da óse túsýi múmkin. Oǵan osy ýaqytqa deıin bolyp ótken Sholý konferensııasyna qa­tysqan 600-ge tarta úkimettik emes uıymdar ókil­derin qosyńyz. Sonda sammıtke qatysatyn jalpy adamdardyń sany 5 myńǵa jetip jyǵylmaq. – Osy ýaqytqa deıin sammıtke ázirliktiń barlyq máseleleri sheshildi. Ushaqtar qabyl­daı­tyn áýejaı, qonaqtardy qabyldaıtyn qo­naq úıler, sharalar ótetin májilis zaldary saı­ma-saı ázirlikke qoıyldy. Demek, Qazaqstan sammıtti ótkizýge jan-jaqty daıyn, – dep málimdedi EQYU Sammıtine ázirlik jónindegi atqarýshy hatshy. Sammıtke qatysatyn elderden keletin basshylar tizimi de anyqtalǵan. Serjan Ábdi­kárimov jýrnalıster aldynda bul jaıynda da júıelep aıtyp berdi. Sondaı-aq ol barlyq qatysýshylardyń Qazaqstannyń EQYU-ǵa tóraǵalyǵy salmaqty nátıjelerimen kórinip otyrǵandyǵyn, sonyń bir dáleli – osy ótetin sammıt ekendigi týraly jaǵymdy pikirler bildirip jatqandyǵyn jetkize ketti. Sóıtip, ótkeli otyrǵan tarıhı mańyzy zor bul sharany úlken jumystardyń aldyn ala nátıjesi retinde baǵalaýǵa bolady. Astanadaǵy EQYU Sammıtinen oǵan qaty­satyn qonaqtar da úlken úmit kútip otyr. О́ıtkeni, bul – álemdik  salmaǵy mol osy Uıymnyń aıasynda 11 jyldan keıin baryp ótkeli otyrǵan basty jıyn. Sonyń ishinde sońǵy 7 jyldan beri oǵan múshe memleketterdiń birlese otyryp deklarasııa da qabyldaı almaı kele jatqandyǵy málim. Al álem jyldan jylǵa ózgerip barady. Osyǵan oraı EQYU-ǵa múshe memleketter bul sammıtke úlken úmitpen qaraýda. Qazaqstan ózi tarapynan Uıymǵa tóraǵa jáne onyń sammıti ótetin el retinde jıyn jumysynyń sátti bolýyna bar kúsh-jigerin jumsaıtyn bolady. Jýrnalıster baspasóz máslıhatynda birqatar suraqtar qoıyp, oǵan qanaǵattan­dyrar­lyq jaýap aldy. “Habar” agenttiginiń suraǵy: Sammıtte qa­byldanatyn qorytyndy qujattyń 4 nusqamen ázirlengendigi aıtyldy. Muny qalaı túsinýge bolady? Jaýap: О́ıtkeni, mundaı uly dúbir jıynda sammıtke qatysýshylardyń barlyǵyn qanaǵattandyratyndaı qorytyndy bir qujatqa qol jetkizý ońaı emes. Sondyqtan qorytyndy qujattyń alǵashqy nusqasy ázirlengennen keıin ol belgili bir mólsherde talqylaýdan ótkizilip, aıtylǵan usynystar men  eskertpeler eskerildi. Sóıtip, ekinshi  nusqa paıda boldy. Mine, osyndaı jaǵdaılarǵa baılanysty qorytyndy qujattyń jobasynyń ózi birneshe nusqany qurap otyr. Al naqty máseleni sammıtke qatysýshylar sheshetin bolady. Grýzııa teledıdarynyń suraǵy:  Buryn EQYU-nyń Grýzııa mıssııasy jumys istep edi. Ony qalpyna keltirý qarala ma? Jaýap: Sammıtte qaralatyn máselelerdiń aýqymy az emes. Biraq kún tártibine qaısysy ótetindigin aıta almaımyz. Jalpy, oǵan qatysýshy ár eldiń basshysy óz elin tolǵandyratyn másele jóninde áńgime qozǵaýy múmkin. Al qorytyndy barlyq elderdiń ortaq kózqarastary nátıjesinde shyǵarylatyn bolady. “Egemen Qazaqstan” gazetiniń suraǵy: Sammıttiń kún tártibine negizinen qandaı máseleler qoıylmaq? Jaýap: Sammıttiń kún tártibine qoıylatyn máseleler aldyn ala naqtylanǵan joq. Sebebi, bárin de sammıtke qatysýshylar sheshedi. Jalpy, EQYU-ny tolǵandyryp otyrǵan máseleler az emes. Osylardyń bárin sammıttiń kún tártibine usynýǵa bolady. Baspasóz máslıhatynda basqa da kóptegen suraqtar qoıyldy. Olardyń bárine jaýap berildi.

Qazaqstan abyroı bıiginde

Bul týraly jýrnalısterge arnap ótkizgen baspasóz máslıhatynda EQYU-nyń Janjaldardyń aldyn alý jónindegi ortalyǵynyń dırektory Herbert Zalber málimdedi. Herbert Zalber sóziniń álqıssasyn Qyrǵyz­stannan bastady. Qyrǵyz elinde áli de sheshimin tappaı jatqan má­selelerdiń qarasy mol ekenin aıtty. Ásirese, onda adam quqyqtaryn saqtaý jáne zańnyń ústemdik qurýy, zań bıligin moıyndaý boıynsha atqarylar isterdiń kóp­tigine toqtaldy. Osy rette EQYU Qyrǵyzstanǵa Uı­ymnyń polısııasyn jiberý jumysyna kiriskenin jetkizdi. – Al EQYU polısııasy degenimizdiń ózi, – dedi meıman, sol jerdegi ishki ister organdaryna qajetti sarap­tamalyq-keńes berýshi mamandar. Olardyń min­deti – sol elde demokratııa qaǵıdattarynyń saqtalýy, zań ústemdigine qol jetkizý baǵyttarynda konsýl­tatıvtik turǵyda jón silteý. Qazirgi kúni 8 polısııa qyzmetkeri Qyrǵyzstanda júr, osy aptada taǵy bireýi barýy tıis eken. Al kelesi jyl­dan bastap 30-dan astamy, ıaǵnı baǵdarlanǵan mólsherdegi polısııa ornalasyp, Qyrǵyzstanda joǵaryda aıtqandaı jumystardy júrgizetin bolady dep kútilýde. “Ony osy eldiń basshylyǵy da jete túsinip otyr. Alda ótetin Eýropadaǵy qaýipsizdik jáne yntymaqtastyq uıymynyń Sammıtine Qyrǵyzstan prezıdenti Roza Otýnbaeva da qatysady. Sondyqtan ol qatysatyn barlyq kezdesýlerde Qyrǵyzstannyń máselesi talqylanatyn bolady”, degen H.Zalber jýrnalısterge saýaldary bolsa jaýap berýge ázir ekendigin bildirgen. Alǵashqy suraq uzaqqa sozylǵan janjaldar sheń­be­rinde qoıyldy. “Sammıtte osy máselelerdi sheshýge qadam jasalady dep oılaısyz ba, atap aıtqanda, Taýly Qarabaq jaıynda ne der edińiz?” degen saýalǵa H.Zalber: “Árıne, mundaı joǵary deńgeıdegi bas­shy­lar­dyń sammıti qandaı da bir máseleni jan-jaqty qa­ras­tyrýǵa múmkindik týǵyzady. Sebebi, oǵan ár memle­ket­tiń joǵary basshylary keledi. Degenmen, bul jerde realıst bolýymyz kerek, jyldar boıǵy qordalanǵan, shıelenip qalǵan túıindi bir sammıt aıasynda sheship tastaý qıyn bolar, áıtse de osy jerde áńgime aýanyn túzeýge, kelisimge barýdyń alǵysharttaryn jasaýǵa múmkindik týady dep esepteımin. Jáne bir basa nazar aýdaratyn jáıt – bir-birimen mámilege kele almaı otyrǵan taraptardyń daýly máseleni sheshýge degen yntalarynyń aldymen ózderinde bolýlary qajettigi. Al EQYU qyzmetin bul turǵyda araaǵaıyndyq deýge keler. Osy rette arnaıy qurylǵan Mınsk toby biraz is atqardy jáne olar jumystaryn ári qaraı da jalǵastyra beredi. Mundaǵy basty másele, taǵy da qaıtalap aıtaıyn, eki eldiń daýdy sheshýge degen saıası erik-kúshiniń bolýy”, dep jaýap berdi. Munan soń H.Zalber Eýropa qaýipsizdiginiń jańa arhıtektýrasy týraly saýalǵa jaýap bere kele, munyń óte shamshyl joba ekenin atady. Meniń oıymsha, dep jalǵady oıyn ol, qazirgi kúngi eýropalyq, transatlantıkalyq nemese eýrazııalyq qaýipsizdik kartınasy jaman deńgeıde emes, alaıda Uıymǵa múshe keıbir elder osy máselede teńgerimdilik joq dep shaǵymdanady. Jáne bir jáıtti de esimizden shyǵarmaýǵa tıispiz, qaýipsizdikke jaýap beretin uıymdar tarıhı jaǵdaılarda paıda boldy. Mysaly, NATO nemese sońǵy kezderi ujymdyq qaýipsizdikti saqtaýǵa umtylǵan ózge de uıymdardyń qurylýyn osyndaı tarıhı qajettilikter týdyrdy. Al osylardyń barlyǵyna parapar keletin qaýipsizdiktiń jańa tetigin jasaý shynymen óte kúrdeli jumys. Alaıda, biz oǵan kele jatyrmyz. Meniń paıymymda, Astana Sammıtinde bul máselede oń nátıjelerge qolymyz jetse, biz budan keıin onyń sheshimine syndarly túrde keletin bolamyz, sammıttiń negizi de osynda jatyr ma dep oılaımyn. Sam­mıttegi syndarly únqatysý Vankýver men Vladı­vostok aralyǵandaǵy qaı eldi de qanaǵattandyratyn qaýipsizdiktiń negizin qalasa degen nıet bar. “Qazaqstan óz tóraǵalyǵy tusynda uzaqqa sozylǵan jan­jaldardy retteýde qandaı jetistikterge jetti neme­se neni oryndamady dep oılaısyz?” – degen suraqqa EQYU-nyń Janjaldardyń aldyn alý jónindegi ortalyǵynyń dırektory: “Aldymen Qazaqstannyń EQYU-ǵa tóraǵalyǵy aıasyndaǵy mindetteriniń áli tolyq aıaqtalmaǵanyn esterińizge salaıyn. Onyń ústine tóraǵa el EQYU-nyń sammıtin uıymdastyryp otyr. Qazaqstannyń halyqaralyq Uıymǵa tóraǵalyǵy barysynda atqarǵan jumystaryna baılanysty túıindi so­dan keıin ǵana jasaýǵa bolatyn sııaqty. Biraq men qazirdiń ózinde Qazaqstannyń janjal aımaqtaryndaǵy jaǵdaıdy retteýge qosqan úlesi óte úlken boldy dep esep­teımin. Is basyndaǵy tóraǵa osy daýly aımaq­tar­dyń barlyǵyna saparmen baryp qaıtty. Olardaǵy taraptardy syndarly únqatysýǵa shaqyrdy, ıaǵnı bul isti alǵa jyljytty”, dep jaýap berdi.

Jastar halyqaralyq forýmdy qoldaıdy

Kókshetaý qalasyndaǵy “Dos­tar” mádenıet saraıynda Aqmola oblystyq ákimdigi “Kókshe” aka­demııasymen birlesip, “Qa­zaq­stan jáne EQYU: tarıh – qazirgi zaman – keleshek” atty stýdenttik konferensııasyn ótkizdi. Saıası shara Aqmola oblystyq “Jastar” pedagogıkalyq otrıadynyń “Aq­mo­la jastary sammıtti qoldaıdy” jan­dy flesh-mobymen jáne ar­naıy jabdyqtalǵan kórmeni tamashalaýmen bastaldy. Konferensııany ashqan res­pýblıkalyq “Jiger” jas mem­le­kettik qyzmetkerler klýbynyń múshesi, moderator Azamat Ysqa­qov Qazaqstannyń EQYU-ǵa tóraǵalyǵy mártebesindegi mereıli qyzmeti men atqarǵan jumys­tary­nyń jemisi jaıly aýqymdy aqparat berdi. Mańyzdy basqosýda Aqmola oblysy ákiminiń orynbasary Ashat Qaınarbekov táýelsiz Qa­zaqstan álemdegi asa bedeldi uıym tóraǵalyǵyna ekonomıkalyq daǵ­darys tolqynyndaǵy kúrdeli kezeńde qol jetkizip, úmit pen senimdi abyroıly atqaryp kele jatqandyǵyn naqty mysaldarmen jatyq baıandady. TMD elderine tuńǵysh berilgen múmkindikti Memleket basshysy Nursultan Nazarbaev kóregendikpen, tereń paıymmen jer júzi halyqtary umtylǵan uly murattarǵa baǵyttaı bildi. Sondyqtan, araǵa on bir jyl salyp shaqyrylǵan Astana Sam­mıti Qazaqstannyń ǵana emes, bú­kil álemniń iri jetistigi sanalady. Álem Qazaqstanǵa nazar aýdaryp otyr, óziniń kókeıkesti másele­lerin qadamy sátti Qazaqstanmen baılanystyrǵandy qalaıdy. “Kókshe” akademııasynyń rek­tory, akademık Janat Qasym erteń bastalǵaly otyrǵan sammıt saıası deńgeıdegi ǵana emes, kún­delikti ómirdegi oqıǵalardyń, tirshilik taramdarynyń jaqsylyq jetegindegi qubylnamasy eken­di­gine basa nazar aýdardy. Qoly­myz­ǵa ǵasyrlar boıǵy arman-tilektiń, qaırat-jigerdiń arqasynda kelgen táýel­sizdiktiń táýbe qylar sha­ra­pattary eń aldymen jastarǵa baǵyttalǵany ǵanıbet, dedi ol. Parlament Májilisiniń depý­taty Amanjol Jazın, Shoqan Ýálıhanov atyndaǵy Kókshetaý memlekettik ýnıversıteti fıloso­fııa kafedrasynyń meńgerýshisi Raýshan Kóshenova Qazaqstannyń Eýropadaǵy qaýipsizdik jáne yn­tymaqtastyq uıymyna tóraǵalyǵy kezeńindegi adamzat úmiti aqtalar sony qadamdardyń qorytyn­dylanaryna qatysty pikirlerimen bólisti. Al Astana Sammıtin Qa­zaqstan men onyń Prezıdenti ustanǵan saıasattan úlgi alýǵa bo­latyndyǵyn aıqyndaıtyn jıyn dep baǵalaıtyndyǵymyz sondyq­tan, dedi sóıleýshiler. Konferensııada sóz alǵan belgili ǵalymdar, qoǵamdyq uıym­dardyń basshylary, Kókshetaý qalasynyń qurmetti azamattary men stýdentter táýelsiz Qazaq­stannyń 19 jyldaǵy jetistigine, EQYU-ǵa tóraǵalyǵynyń ma­ńyzdylyǵyna, bizben sanasyp otyrǵan álem úniniń tilektestik nıetine joǵary baǵasyn berip, respýblıka jastaryna úndeý qabyldady. “Dostar” saraıynda Táýelsiz­dik merekesine arnalǵan kórme uıymdastyrylýy da konferensııa­nyń mańyzyn kótere tústi. Baqbergen AMALBEK,  Aqmola oblysy. Qutty qonaq bolyńyzdar! EQYU-ǵa múshe elder basshy­larynyń Astanada ótetin Sammıtin júrek lúpildeı kútip otyrmyz. Qazaqstanǵa alǵash ret osynsha kóp jáne bedeldi memleketter men atyn alystan estip tańdanyp júretin ha­lyq­aralyq uıymdar basshylary birge keldi. Astananyń áýejaıyna jer júziniń azýyn aıǵa bilegen úlken shaharlarynan ǵana ushatyn alyp laınerler qonyp jatyr. Kelgen qonaqtar Qazaqstannyń qonaqjaı ekendigine kózi qanyp, kó­ńili tolyp keterine men bás tigemin. О́ıtkeni, osynsha úlken jıyn bolma­ǵan­men jas Astananyń halyqaralyq sharalar ótkizip jatqany bir bul emes. Tájirıbeniń jeterligine shú­kir­lik etemiz. Al elimizge kelgen márte­beli qonaqtarǵa memlekettik dárejede kórsetiletin qonaqjaılylyq negizi bizdiń halqymyzdyń dástúri arqyly tereń qalyptasqan der edim. “Myń ólip, myń tirilgen” qazaq halqy náý­bet zamandarda aryp-ashyp kelgen qan­daı ulttyń ókilin de baýyryndaı qushaǵyna tartty. Qazaq halqynyń qaıyrymdylyǵyn, meımandostyǵyn kórgen atalarymyz Qazaqstanda ósip, óndi. Olardyń urpaǵy, biz, osy ulan-baıtaq jerde bir atanyń balalaryn­daı tatý-tátti ómir súrip kelemiz. Qa­zaq­standaǵy qazaqtardyń da, osy jer­diń sýyn sýlap, otyn ottap otyr­ǵan ózge ulystardyń aldynda bir-aq maqsat bar. Ol – Qazaqstandy gúl­den­dirý, ony dúnıe júzindegi moıny ozyq damyǵan elderdiń qataryna qosý. Prezıdent Nursultan Nazar­baev­tyń bastamasymen ótip jatqan halyqaralyq bedeldi Uıym – EQYU Sammıti de bizdiń elimizdi dúnıe júziniń tanýyna, qarym-qatynastyń odan ári damýyna jol ashady. Halqymyzda “qonaq az otyryp, kóp synaıdy” degen mátel bar. Sammıtke kelgen memleketterdiń basshylary, mártebeli qonaqtar eń aldymen Qazaqstannyń ishindegi qustyń uıasyndaı jylylyqty sezindiretin beıbit, tynysh ómirdi baıqar dep oılaımyn. Saryarqada totydaıyn taranǵan jas Astananyń sulýlyǵy da elenbeı qalmas. Tórimizge ozǵan mártebeli qonaq­tar da sammıtte halyqaralyq mańyzy bar, jumyr jerdiń bolashaǵyna qa­tysty asa jaýapkershilikti isti at­qarady. Olardyń jumysyna sáttilik tileımin. Qutty qonaq bolyńyzdar! Evgenıı DRÝJININ, “DEP” JShS dırektory. Qostanaı. Kádeli syı Almatydaǵy Ulttyq kitaphana búkil álem nazaryn tigip otyrǵan EQYU-nyń Astana Sammıti qar­sa­ńynda “Eýropaǵa jol – órkenıetke jol” jáne “Nursultan Nazarbaev – Qazaqstan Respýblıkasynyń Tuńǵysh Prezıdenti” atty kitap kórmelerin óz oqyrmandary men qalyń kópshilikke kádeli syı retinde usyndy. “Eýropaǵa jol – órkenıetke jol” atty kórmege EQYU-ǵa múshe 56 el men Eýropanyń basqa da memle­ket­teriniń tarıhy, mádenıeti, áleý­mettik-ekonomıkalyq damýy týraly syr shertip, alýan aqparat beretin, álem­niń 114 tilinde shyqqan bes myń­nan astam kitaptar men qujattar qoı­yldy. Eýropanyń ǵylymı-tehnı­ka­lyq jáne gýmanıtarlyq aqyl-oı qazynasynan qısapsyz maǵlumatqa keneldire sýsyndatatyn bul qujattar túrli saladaǵy mamandar men ǵalymdarǵa, joǵary oqý oryndary stýdentteriniń ǵylymı izdenisterine kómek bolarlyq aqparattar qoımasy der edik. Sondaı-aq bul kórmeniń aýqymdy bólimi Qazaqstannyń EQYU-ǵa tóraǵalyq etýi kezindegi Elbasymyzdyń tarıhı rólin jan-jaqty kórsetip, onyń syndarly da sarabdal saıasatyn pash ete alǵan. “Nursultan Nazarbaev – Qazaq­stan Respýblıkasynyń Tuńǵysh Pre­zı­denti” dep atalatyn kórmege Mem­leket basshysynyń eńbekteri, ómiri men qyzmetin ózek etken otandyq jáne sheteldik basylymdar qoıy­lyp­ty. Kórme kitaphananyń Prezı­dent ómiri men qyzmetine arnalǵan 16 myńnan astam bıblıografııalyq jaz­ba­lardy jınaqtaǵan elektrondy de­rek­qor negizinde jasaqtalǵan kórinedi. Elbasynyń ómiri men saıası qyz­me­tine arnalǵan bul kórme – Táýelsiz Qa­zaqstannyń qalyptasý jyldary­nyń aıshyqty shejiresi ispettes. Mun­daǵy qujattar táýelsiz memle­ke­ti­mizdiń qysqa merzimde júrip ótken jolynan, sol aralyqtaǵy tarıhı oqı­ǵalardan, Elbasynyń kóregen­dik­pen júrgizgen salıqaly syrtqy saıa­saty men eldiń áleýmettik-ekono­mı­kalyq damýyn jedeldetken strate­gııa­­lyq baǵdarlamalarynan syr shertedi. Qorǵanbek AMANJOL. “Egemen Qazaqstannyń” tilshiler toby. Sýretterdi túsirgen  Orynbaı BALMURAT, Bersinbek SÁRSENOV.