Reseıde naýqasty uryp óltirgen dáriger jumysynan qýyldy

ASTANA. 10 qańtar. Reseıdiń Belgorod qalalyq aýrýhanasynan naýqasty uryp óltirgen dáriger jumysynan qýyldy. Bul týraly tengrinews.kz habarlady. Belgorod qalasyndaǵy №2 aýrýhananyń dárigeri emdelýshini soqqyǵa jyǵyp, saldarynan naýqas oqıǵa ornynda qaıtys boldy. Aıta keteıik, jantúrshigerlik jaǵdaı ótken jyldyń 29 jeltoqsanda qaladaǵy №2 aýrýhanada oryn alǵan. Onda terapııa bólimshesiniń dárigeri meıirbıkege tıiskeni úshin emdelýshini uryp óltirgen. Oqıǵa beınebaqylaý kamerasyna túsip qalǵan. Kadrdan dáriger áıeldiń emdelýshini tekserip otyrǵanyn kórýge bolady. Sol sátte kabınetke jas qyzdy eritken dáriger kirip keledi. Er adam naýqasqa kenetten kúsh kórsetip, soqqyǵa jyǵady. Saldarynan basyna tıgen qatty soqqydan ol qulap qalady. Al dárigerge qarsylyq kórsetpekshi bolǵan emdelýshiniń joldasy da aýyr judyryqtyń astynda qaldy. Birneshe ýaqyttan keıin bólmede bolǵan áıelderdiń biri naýqastyń kógerip ketkenin ańǵarady. Osy kezde «qyzba» dáriger oǵan kómek kórsetpekshi bolady. Degenmen jábirlenýshi oqıǵa ornynda qaza tabady. Qazirgi tańda kúdiktige eshqaıda ketpeý týraly qolhatpen bosatý túrindegi bultartpaý sharasy taǵaıyndalǵan. Sebebi qylmys aýyr deńgeıdegi kategorııaǵa jatpaıdy jáne baptyń sanksııasy bul jaǵdaıda eki jylǵa deıin bas bostandyǵynan aıyrýdy qarastyrady. Bul kategorııadaǵy qylmys úshin qamaýǵa alý degen bultartpaý sharasyn tańdaý úshin erekshe jaǵdaılar talap etiledi. Jergilikti tergeý komıtetiniń mamandary dárigerdiń jáne onyń otbasynyń Belgorodta turyp jatqanyn, bultartpaý sharasyn buzyp jatpaǵanyn, sondyqtan tergeýde ózgerister engizýge aıtarlyqtaı sebeptiń joq ekenin atap ótti. Sondaı-aq, komıtettiń baspasóz qyzmetiniń habarlaýynsha, kúdiktiniń qylmysy baıqaýsyzda kisi óltirý bolyp baǵalanǵan. Talǵat Raıymbek. Derek, sýret: tengrinews.kz.