Aqtaýda dárigerlerdiń salǵyrttyǵynan qyz bala qaıtys boldy

AQTAÝ. 14 qańtar. Aqtaýda astan ýlanǵan qyz balaǵa dárigerler durys dıagnoz qoıa almaı, óltirip alǵan. Bul týraly nur.kz saıtyna silteme jasaǵan egemen.kz tilshisi habarlady. Aqtaýda astan ýlanyp, qaıtys bolǵan 15 jastaǵy qyzdyń ólimine aq halattylar kináli. Sarapshylar jedel járdem dárigerleri naýqastyń jaǵdaıyn der kezinde baǵalaı almaǵandyǵyn aıtýda. 2015 jyly qazan aıynda Aqtaýda bir otbasy tuzdalǵan qııardan ýlanǵan. Olarǵa dárigerler bastapqyda botýlızm dıagnozyn qoıǵan bolatyn. Otbasynyń 15 jastaǵy qyzy keshkilik astan soń álsireı bastaıdy. Anasy dereý jedel járdem shaqyrǵanymen, kelgen dárigerler onyń asqazany aýyryp jatyr dep ketip qalypty. Qyzdyń jaǵdaıy nasharlaǵan soń, ekinshi ret jedel járdem shaqyrǵanymen dıspetcher erteńine emhanaǵa barýǵa keńes berip, brıgada jibermegen. Sarapshylar qyz balany alǵashqy jiberilgen jedel járdemmen aýrýhanaǵa jetkizgende tiri qalar edi degen toqtamǵa keldi. Tipti ekinshi ret shaqyrǵan kezde dıspetcher dáriger jibergende, qyzdyń aman qalýy múmkin eken. Sol sebepti 2 dáriger men dıspetcherge qyzmetine salǵyrt qaraýy saldarynan abaısyzda adam óltirdi degen aıyp taǵyldy. Aqtaý qalasynyń prokýrory T.Álibaev máselege qatysty pikirin «Qazaqstan Respýblıkasy Qylmystyq kodeksi 317 baby boıynsha 5 jylǵa deıin bas bostandyǵynan aıyrý qarastyrylǵan. Ony sot sheshedi» dep bildirdi. Gúlaıym Shyntemirqyzy Derek: egemen.kz. Sýret: nsktv.ru.