Qazaq radıosynan Baýyrjan Momyshulynyń shyǵarmasy berilip jatyr

ASTANA. 14 qańtar. Qazaq radıosynyń efırinde 12-shi qańtardan bastap Baýyrjan Momyshulynyń «Ushqan uıa» povesi negizinde jasalǵan jańa joba tyńdarmanǵa usynyldy. Batyrdyń otbasy qundylyqtaryn nasıhattaıtyn shyǵarmasy Qazaq radıosynyń áýetolqynynan berilýde. Bul týraly egemen.kz tilshisi habarlady. Baýyrjan Momyshuly basynan ótkergenderi men paıym-túsinikterin kúndelikke jazyp otyrǵany bárimizge belgili. Batyr kórgen-bilgeni men oılaryn jazý arqyly adamdardyń ary men namysyn, sanasy men erkindigin oıata otyryp,  jaqsylyq jasaýdy adam boıyna eń basty qasıet etip sińirý kerek dep sanaǵan. Onyń qolynan bul mindetti oryndaý keldi. Qazaq radıosynyń efırinen «Ushqan uıa» kitabynyń aýdıonusqasyn tyńdaý arqyly árbir tyńdarman bir otbasy negizinde batyrdyń týǵan jerinde sol jyldary bolǵan oqıǵalarmen, kóshpendiler zamanyndaǵy qazaq etnografııasynyń elementterimen tanysa alady. Bir qyzyǵy, kitapty jazýǵa Baýyrjan Momyshulynyń 1955 jyldyń naýryzynda kórgen túsi túrtki bolǵan. «Ushqan uıa» shyǵarmasynda Baýyrjan Momyshuly ákesi men ájesiniń aıtqan aqyly men ósıetteri arqyly otbasy tárbıesiniń mańyzdylyǵyn qozǵaıdy. Avtor, salt-dástúrlerdi otbasy músheleriniń beınesi arqyly qyzyqty etip baıandaıdy. Áskerı shyǵarmalar men memýarlar janryna jatatyn «Ushqan uıa» povester men áńgimeler jınaǵy 1976 jyly Qazaq Sosıalıstik Sovet Úkimetiniń memlekettik júldesin ıelendi. Kitap - halyqty mindet, úlkenge qurmet, Otanyna degen mahabbat sııaqty qasıetterge tárbıeleıtin, ulttyq dástúrlerin ustanýǵa baýlıtyn shyǵarma. «Ushqan uıanyń» aýdıo nusqasy Qazaq radıosynyń áýe tolqynynan 12-shi qańtardan bastap jumys kúnderi tańerteńgi saǵat 9:35-te, qaıtalaýy keshki 18:35-te berilip jatyr. Dastan Kenjalın. Derek: «Qazaqstan» RTRK baspasóz qyzmeti. Sýret: egemen.kz