Atyraýda úshem bosanǵan 32 jastaǵy áıel 8 balanyń anasy atandy

ATYRAÝ. 14 qańtar. Jańa jyl qarsańynda Atyraý oblysynyń Qurmanǵazy aýdanynda turatyn 32 jastaǵy Samal Shamhanova úshem bosanyp, 8 balanyń anasy atandy. Bul týraly egemen.kz tilshisi habarlady. Buǵan deıin eri Dıdarbekpen birge 4 qyz jáne 1 ul tárbıelep otyrǵan Samal Shamhanova qursaǵyna úshem bitkende tóbesi kókke jeterdeı qýanypty. Bir qozy artyq týsa, bir túp jýsan artyq shyǵady deıtin qazaqy támsildi jetik biletin 32 jastaǵy kópbalaly ana Samal da muny Allanyń erekshe syıy dep qabyldaıdy. Árıne, dárigerler de Samaldy erekshe baqylaýǵa alypty. Jańa jyl qarsańynda, ıaǵnı, ótken jyldyń 26 jeltoqsanynda Samal Shamhanova úsh uldy bir mezette jaryq dúnıege ákeldi. Oǵan árıne, oblystyq perzenthananyń dárigerleri ota jasaý arqyly kómegin berdi. Sóıtip, ata-anasy ózderin kól-kósir qýanyshqa keneltken úsh ulǵa Álemhan, Erhan, Tileýhan esimderin beripti. Úshemniń salmaq qosyp, jaǵdaıy jaqsarýyna bas-kóz bolyp júrgen dáriger-neonotolog Aıgúl Súndetovanyń aıtýynsha, 18 táýlik boıy úshem aıryqsha kútimge alynypty. Burnaǵy kúni ómirge ińgáláp kelgen úshemnen soń 8 balanyń anasy atanǵan 32 jastaǵy Samal Shamhanova oblystyq perzenthana dárigerlerine alǵysyn aıtyp, óziniń otbasy turatyn Qurmanǵazy aýdanyna attanyp ketti. Joldasbek Shópeǵul. Derek, sýret: egemen.kz.