О́SKEMEN. 14 qańtar. Shyǵys óńirindegi Jarma aýdany Áýezov aýylynyń turǵyndaryna qolaıly jaǵdaı jasalyp otyr. Bul týraly egemen.kz tilshisi habarlady.
Áýezov aýylynyń turǵyndary úshin endi О́skemen men Semeı qalalaryndaǵy medısınalyq mekemelerge nemese aýdandyq aýrýhanaǵa júginýdiń qajeti shamaly. Olar ýaqyt pen qarajat shyǵyndamaı-aq óz aýyldarynda medısınalyq tekserýden óte alady. Iаǵnı, aýyldyń dárigerlik ambýlatorııasynda endi quny 3 mıllıon teńge turatyn qan quramyn tekserýge arnalǵan qural-jabdyqtar men apparattar jáne kóz tonometri bar.
Medısınalyq qural-jabdyqtar Jarma aýdany ákimdigi men «Baqyrshyq taý-ken óndirý kásiporyny» JShS arasynda bekitilgen áleýmettik-ekonomıkalyq memorandým sheńberinde syıǵa tartyldy. Sonyń arqasynda dárigerlik ambýlatorııa MicroCC-20 Plus gematologııalyq avtomatty analızator apparaty men SOE-metr PR-3 quraly arqyly qan quramyn tekserýge arnalǵan jáne IGD-02 «PRA» markaly kóz ishindegi qysymdy tirkeıtin kóz tonometrine ıe boldy.
Qundy syılyqtardy dárigerlik mekemege kompanııa jetekshileri saltanatty túrde tabys etti.
«Polımetall» kompanııasy kásiporyn qyzmetkerleri men aýyl turǵyndary jaıly turmys keshýi úshin qoldan kelgen kómekti aıanyp qalmaıdy. Aıtalyq, 2014 jyly dárigerlik ambýlatorııaǵa naýqastardy jedel aýrýhanaǵa jetkizýge jáne bastapqy medısınalyq kómek kórsetýge arnalǵan jedel járdem kóligin tartý etken edik. Al 2015 jyly kompanııa jetekshiligi ambýlatorııanyń qasbetin jóndeýden ótkizý jáne zamanaýı qajetti qural-jabdyqtar satyp alý jóninde sheshim shyǵardy», dedi Baqyrshyq taý-ken óndirý kásiporynynyń bas dırektory Iýrıı Ovchınnıkov.
Jarma aýdanynyń ákimi Nurlan Sydyqov «Polımetall» kompanııasynyń qarapaıym aýyl turǵyndaryna jasaǵan kómegin joǵary baǵalap, óńirdiń áleýmettik jáne ekonomıkalyq damýyna úlken úles qosa berýlerine tilektestigin bildirdi.
Dýman Anash.
Derek, sýret: egemen.kz
