Beımálim jándik jumbaǵy

Qostanaı oblysynyń Áýlıekól aýdanyna qarasty Qazanbasy aýyldyq okrýgindegi Baǵanaly eldi mekeninen bul óńirde buryn-sońdy kezdespegen túsiniksiz bir maqulyq tabyldy. Kýálardyń aıtýynsha, jumbaq jándiktiń syrtqy kelbeti úlken sur qurtqa uqsaıdy eken. Aınalasyn qalyń orman qorshaǵan aýyl adamdary osy kúnderi qazan aıynda túsirilgen kómirlerin tazartyp shyǵyp, endi otqa jaǵa bastaǵan. Sol tazartý jumysynyń barysynda mektepke túsirilgen kóp kómirdiń arasynan kólemi kádimgi bólke nanǵa jete­qabyl jumyrtqa keıipti jandy zat shyǵa kelgen. Keıinirek bajaılap qaraǵanda, tabylǵan jándiktiń syrtqy qabyǵy jelimdeı jabysqaq ekeni de anyqtalǵan. Tipti, jumyrtqaǵa da uqsa­maıtyn sııaqty. Onyń ishinen sosyn uzyndyǵy 20 santımetrdeı bolatyn qurtqa uqsas bir maqulyq shyǵypty. Buǵan qaıran qalǵan jumysshylar álgini tezdetip mekteptegi eńbek kabınetine ákelip, túr-sıpatyn anyqtap kórý úshin ústine sý quıady. Sol kezde maqulyqtyń quıryq jaǵy úrlenip, birtindep qımyldaýǵa kóshedi. Taıaqpen túrtip qalǵanda, jándik óziniń bastapqy surǵylt túsin birden kógildir boıaýǵa ózgertip shyǵa kelgen. Álginiń aýzynda kishkene azý tisteri bar kórinedi. Aýyldyq okrýg ákimi qaladaǵy ǵylymı-zertteý ınstıtýtyna habarlasýǵa keńes beripti. Buǵan kóńilderi tolmaǵan aýyl turǵyndary: «Sonaý jer túbindegi bizdiń eldi mekenge oqymystylar osy úshin arnaıy atbasyn buryp kele qoımaıtyn shyǵar», – dep endi eshbir áreketsiz otyrǵan kórinedi. Sosyn sol jerde jumys jasaıtyn Gena atty jigit jumyrtqany da, álgi maqulyqty da úıine alyp ketken eken. Rýslan IGILIK.