Qańtarda báısheshek gúldedi

Ońtústikqazaqstan­dyq­tar jańa jyldy qy­laý­lap jaýǵan qarmen emes, sebezgiden sebelegen­deı jańbyrmen qarsy alǵan. Qazir de kún jyly, báı­sheshek gúldep jatyr. Tańer­teńgilikte jurt ústine ne ilerin bilmeıdi. Soltústik oblystardy qasat qar basyp, qarǵa adym jer kórinbeı, joldar jabylyp jatqanda ońtústiktegiler túske taman kástómge kóship, tipti, jeıde kıetinder de jeterlik. Asanbaı Asqarov atyndaǵy dendrobaqta aǵash­tardyń túr-túri ósedi. Qaıyń, sámbi tal, qaraǵashtar búr jara bastady. Keıbir úılerde shıe gúldegen. Shymkenttiń qyz-kelinshekterine obal-aq boldy. Túgi jyltyraǵan qundyz ishikterin bir kıe almaı armanda júr. Arab Ámirlikterinde muz­dan turǵyzylǵan alyp saraı bar deıdi kórgender. Týrısterdi magnıtteı tartatyn Dýbaı álemniń qys túspeıtin jyly núktesinde ornalasqan. Bi­raq aqshaly, aqyldy qala. Kanada sııaqty memleketterden qar ákelip qatyryp, muz qala salady. Ishinde bári bar. Qa­lasańyz muzdan qaty­ryl­ǵan shynaıaqpen kofe ishe alasyz. Sheıhtar qalyń kıi­nip, qundyz ishik kıgen ke­linshekterin shubyrtyp aralap júredi deıdi. Qys qyzyǵyn osylaı elestedi ári áıelderiniń qundyz ishikpen qulpyryp júrýine jaǵdaı jasaıdy. Al, kúni kúlip turǵan Shymkenttiń jigitteri qosaqtarynyń aldynda uıatty bolyp júr. Baqtııar TAIJAN, «Egemen Qazaqstan». Ońtústik Qazaqstan oblysy.