Asyq pishindes avtokólik

«El ishi – óner kenishi» degen ras sóz. Jurtshylyqtyń arasynda túrli ónerdi meńgerip qana qoımaı, óz oıymen jańa dúnıeler qurastyryp shyǵaratyn azamattar bar. Keńes ókimeti qırap, Táýelsizdiktiń eleń-alańynda talaı dúnıeniń qadiri qashyp ketti ǵoı. Sonda keńshardan qalǵan kólikterdiń de tek qańqasy qalǵan kezeń boldy. Aýyldaǵy Jumanazar degen aǵamyz Gaz-53 kóligine traktordyń motoryn qoıyp júrgizgende aǵaıynnyń bári aıran-asyr tań qalǵan. Munyń ózi ónertapqyshtyq. Al, qyzylordalyq Aqdıdar Ábdihalyqov otandyq kólik óndirisin qazaqy naqyshpen kómkerip, damytýǵa nıet qylyp otyr. Ol qazaqstandyq brendterdiń biri retinde ulttyq qundylyqtarymyzben astastyra otyryp temir tulpar jasaǵysy keledi. Oıy ushqyr jigit qazirde asyq pishindes kóliktiń úlgisin daıyndap qoıdy. Ony «Asyqpa!» dep ataǵan. Aqdıdar bul úshin bir jyldaı eńbektenipti. Tipti, óziniń jeńil avtokóligin satyp, qarajatyn osy tyń dúnıeni jasaýǵa jumsaǵan. Avtordyń aıtýynsha, kóliktiń qańqasyn aǵashtan ıip, bylǵarymen qaptap shyqqan. Oıý-órnekpen kómkerip, qyran búrkittiń de beınesin utymdy úılestire bilgen. Jyldamdyq tetigin qamshyǵa, oryndyqtaryn asyqqa uqsatqan. Endi ol óz qolynan shyqqan jańa kólik dızaınyn patenttep, Elbasyna syıǵa tartýdy armandap júr. «Oryndyqtary da asyq úlgisinde jasalǵan. Qamshy – ol da bizdiń qazaqtyń kıeli buıymynyń biri. Sol qamshyny jyldamdyq tetigine ornattym. Qazaqy uǵymda qamshyny maqtanysh tutyp, qaısarlyqtyń, qaırat pen qýattyń sımvoly retinde qaraıdy ǵoı. Sol sebepti ony da qoldandym. Al, rólin elektrondyq túımeshemen keltirdim»,– deıdi Aqdıdar Ábdihalyqov. Asyq pishindes «Asyqpa» avto­kóligin óndiriske jiberse bolatyndaı. Oıý-órnekpen kómkerilgen, qyran búrkiti qalyqtaǵan kólik minip júrsek, jarasymdy emes pe?! Erjan BAITILES, «Egemen Qazaqstan». QYZYLORDA.