Iýlııa Galysheva frıstaıldan ótetin Álem kýbogyna daıyndalýda

ASTANA. 19 qańtar. Qazaqstandyq frıstaılshy Iýlııa Galysheva Álem kýbogyna daıyndalyp jatyr. Bul týraly egemen.kz tilshisi habaraldy. Iýlııa Galysheva 5 qańtardan beri AQSh-tyń Vermont shtaty Kıllıngton qalasynda ótip jatqan oqý-jattyǵý jıynyna qatysýda.    Osy jerden ol Kanadanyń Val Sent-Kom qalasynda frıstaıldan ótetin Álem kýbogynyń kezekti kezeńine barady. Jarys 23 qańtarda ótedi. Oqý-jattyǵý jıynyna Qazaqstan sportshylarynan basqa Japonııa, Reseı, Germanııanyń frıstaılshylary da qatysýda. Kıllıngton qalasynda taý shańǵysy kýrorty ornalasqan. Ol dúnıejúzindegi taý shańǵy sportyna qolaıly jaqsy jerlerdiń biri bolyp sanalady. Bul jerde álemniń ár túkpirinen kelgen sportshylar jyl on eki aı daıyndalyp, Killington Mountain School sport mektebinde snoýbord, frıstaıl, taý shańǵysy men telemark sport túrlerinen oqý-jattyǵý jıyndaryn ótkizedi. Osyǵan deıin frıstaıldan Álem kýbogynyń alǵashqy kezeńi ǵana ótti. Ol byltyr 13 jeltoqsanda Fınlıandııanyń Rýka qalasynda boldy. Al ekinshi kezeń 14-16 qańtar aralyǵynda AQSh-tyń Leık-Plesıd qalasynda ótýi tıis bolatyn. Alaıda, qardyń bolmaýynan jarys keıinge shegerildi. Endi Iýlııa Galysheva Kanadada ótetin jarysqa qatysyp, odan keıin osy eldiń Kalgarı qalasynda jalaýy jelbireıtin taǵy bir básekede baq synasady. Kalgarıdegi jarys 30 qańtarda ótedi. Sodan keıin 4-6 aqpan aralyǵynda AQSh-tyń Dır Valleı qalasynda ótetin kezeńge qatysady. Galysheva aqpan-naýryz aılarynda Japonııa men Reseıde bolatyn jarystarǵa da qatysamyn dep otyr. Dastan Kenjalın. Derek, sýret: egemen.kz