Baǵyty aıqyn baǵdarlama

Qazaqstannyń Reseıdegi elshiliginde Qazaqstan Pre­zıdenti Nursultan Nazarbaevtyń «Ult Jos­pary – qazaqstandyq arman­ǵa bas­taıtyn jol» baǵdar­la­malyq maqalasyn talqylaý boıynsha «Jańǵyrtýdan – bolashaqtyń birtutas ultyna deıin» degen taqyrypta dóńgelek ústel bolyp ótti. Máskeýdegi «Bolashaq» halyq­aralyq baǵdarlamalar orta­ly­ǵynyń ókildigi dóńgelek ús­tel­di Qazaqstannyń Reseıdegi elshiliginiń járdemimen uıym­das­tyrdy. Al is-shara­ǵa máskeýlik joǵary oqý oryn­dary­nyń professorlary men oqytý­shylary, reseılik ǵalymdar men sarapshylar, qazaqstandyq stýdentter, aspıranttar, doktoranttar jáne «Bolashaq» baǵdarlamasynyń stıpendııa ıegerleri qatysty. Dóńgelek ústeldi ashqan Qa­zaq­stannyń Reseıdegi elshiliginiń keńesshi-ýákili Vıktor Temirbaev Memleket basshysynyń atalǵan baǵdarlamalyq maqalasyn Elbasy Nursultan Nazarbaevtyń Qazaqstan halqyna jasaǵan «Qazaqstan jańa jahandyq naqty ahýalda: ósim, reformalar, damý» atty Joldaýynyń negizgi erejelerin odan ári damytý bo­ıynsha el jańǵyrtýynyń jáne Bes ınstıtýttyq reformasynyń «jol kartasy», tipti, olardy iske asyrýdyń nusqaýlyǵy retinde alyp paıdalanýǵa bolady dedi. «Prezıdent Bolashaqtyń birtutas ulty – eldiń bas­ty maq­saty, Bes ınstıtýttyq reformanyń máni degendi jet­kizip otyr. Qazaqstan halqy Assambleıasy jáne «Máńgilik El» jalpyulttyq ıdeıasy Bolashaqtyń birtutas ultynyń eki irgeli ne­giz­deri retinde belgilendi», – dedi V.Temirbaev. «Baǵdarlamada, ádistemelik tur­ǵydan kelgende, qazaqstandyq ar­mannyń basym baǵyttary aıqyn­dalyp qana qoımaı, sondaı-aq, el halqynyń sol reformalardyń nátı­jelerinen naqty ne kútetinine deıin belgilengen. Memleket basshysy Ult Josparyn júzege asy­rýǵa baılanysty úlken daıyn­dyq jumystary jasalǵany týraly egjeı-tegjeıli aıtyp otyr», – dep atap kórsetti dıplomat. Ol 2016 jyl­dyń 1 qańtarynan 59 jańa zań kúshine enip, Bes ınstıtýttyq reformany júzege asyrý boıynsha Ult Josparyn oryndaý bastalyp ketkenin qaperge saldy. Pánaralyq zertteýler orta­lyǵynyń dırektory, Eko­­­no­mıka joǵary mektebiniń Ulttyq zertteýler ýnıversıteti memlekettik jáne mýnısıpaldyq basqarý ınstıtýty dırektorynyń orynbasary Vladımır Korolev Qazaqstan óte mańyzdy bastamalardy ilgeriletip otyrǵanyna nazar aýdara kelip, olardy keıin post­keńestik keńistiktegi ózge elder jıi óz kádelerine jarata­ty­­­nyna toqtaldy. Onyń sózine qa­raǵanda, baǵdarlamada qazirgi zamanaýı kóptegen syndar men qaterlerdiń aldyn alý úshin tutas­taı sharalar kesheni bar jáne olarda memlekettik organdardyń bıznespen jáne azamattyq qoǵammen úılese jumys isteýiniń tetikteri aı­qyn­dalǵan. Zań ǵylymdarynyń doktory, O.E.Kýtafın atyndaǵy Máskeý memlekettik zań akademııasynyń birinshi prorektory Elena Gracheva Prezıdent baǵdarlamasynyń úl­ken bóligi táýelsiz quqyq tóreligi men zań ústemdigin júzege asyrý má­selelerine arnalǵanyn atap ótti. «Quqyqty damytý máseleleri negiz qalaýshy úderisterdiń biri bo­lyp tabylady, – dedi ol. – Eger bar­lyq másele quqyqtyq retteý­diń jo­ǵary deńgeıimen qamtamasyz etilmese, onda ekonomıkalyq jáne saıası tabystarǵa qol jetkizý múm­kin emes». Onyń ústine, E.Grachevanyń pikirinshe, jaı ǵana zańdar qabyl­dap qoıý jetkiliksiz, olardyń qa­tań júzege asyrylýy qajet. Baǵdarlamada bul másele jan-jaqty ashyp kórsetilgen. Qazaq­stannyń táýelsiz quqyq tóreligi men búkil quqyq qorǵaý júıesi tek qana azamattardyń quqyqtary men bostandyqtaryn qamtamasyz etip, zańdardyń qaltqysyz oryndalýy men quqyq tártibin nyǵaıtýǵa baǵyt­talatyn bolýy tıis. Fılosofııa ǵylymdarynyń doktory, professor, Reseı pre­­zı­denti janyndaǵy halyq sharýashylyǵy jáne memlekettik qyzmet akademııasynyń «Halyq­aralyq yntymaqtastyq» kafe­drasynyń meńgerýshisi Semed Se­medov ár memlekettiń ózin ózi birtektilendirý úderisinen ótetinin atap kórsetti. Osy oraıda, ǵalym Nursultan Nazarbaev jarııalaǵan reformalar jospary Qazaqstan memleketin damytýdyń úrdisterin belgileýde alǵa qaraı bir qadam bolyp tabylady dep esepteıtinin kóldeneń tartty. «Memleketti damytýdyń strategııasyn naqty belgileý qajet, – dedi osy oraıda ǵalym. – Jáne biz Qazaqstannyń ári qaraı qalaı damý kerek ekenin túsinetinin kórip otyrmyz». S.Semedov baǵdarlamada ja­rııalanǵan álemdegi asa damyǵan 30 memlekettiń qataryna qosylý tý­raly mindet Qazaqstan úshin ábden qol jetkizýge bolatyn min­­det ekenine óziniń senimdi eke­nin bildirdi. «Nazarbaev strate­gııa­synyń negizi – adam kapıtaly. Jáne bul mindetti asa durys qoıa bilýdiń kórinisi», – dep qorytty sózin sarapshy. Keń kólemde júrgen talqy­laý­lar barysynda dóńgelek ústel­ge qatysýshylar Memleket bas­shysy baǵdarlamasynyń negizgi erejelerin ár qyrynan tal­­qylap, Bes ınstıtýttyq re­formanyń mazmuny týraly óz oılarymen bólisti jáne olardy júzege asyrýdyń joldaryn qalaı kóretinderi týraly usynystaryn ortaǵa saldy. Sońynda eldi qazirgi jaǵdaılarda jańǵyrtý úderisterine Qazaqstan jastarynyń qanshalyqty úles qosa alatyndary týraly salıqaly áńgime qozǵaldy.  Sáýlebek BIRJAN.