Baı men kedeıdiń arasy alshaqtap barady

Qazirgi tańda Jer betindegi halyqtardyń jartysynan astamy, ıaǵnı 3,6 mlrd. bóligi kedeıshilikte ómir súredi. Onsyz da isherge – as, kıerge kıim tappaı, qınalyp júrgen qamkóńil jandardyń jaǵdaıy sońǵy bes jylda taǵy 1 trln. dollarǵa tómendep ketken. Al jahannyń jarty baılyǵyn ıemdenip otyrǵan sanaýly mıllıarderlerdiń qazynasy osy ýaqyttyń ishinde tek kóbeıip otyrǵan eken. Kedeıshilikpen kúreste bel­sendilik tanytyp júrgen Oxfam kommersııalyq emes uıymynyń málimdeýinshe, 2010 jyldan beri qos taptyń arasy edáýir alshaqtaǵan. Atap aıtqanda, búginde jarty álem­niń qolyndaǵy qarjyǵa teń baılyqqa ıelik etip otyr­ǵan Jer betindegi eń baı 68 adam bes jyldyń ishinde 1,76 trln. dollarǵa baıyǵan. Osy rette, 2010 jyly kedeı-ke­p­shiktiń, ıaǵnı álem halqynyń jartysynyń baılyǵy eń baı 388 adamnyń esepshotyndaǵy qarjymen teń bolǵanyn atap ótken jón. Uıymnyń málimdemesine qara­ǵanda, bul máselege sa­lyq­taǵy jeńildikter, eńbekaqy­syndaǵy aıyrmashylyqtar, jumys­shylarǵa beriletin syıaqylardyń qysqartylýy syndy tetikter sebep bolǵan. Sondaı-aq, buǵan búgingi ja­handyq ekonomıkalyq daǵda­rystyń da salqyny tıgeni sózsiz. О́ıtkeni, qazirgi qarjy­laı qyspaqqa kedeı turmaq, baılardyń ózi shydas bere almaı otyr. Máselen, 2016 jyldyń alǵashqy eki aptasynda-aq álemniń eń qaltaly 400 adamy daǵdarys saldarynan 305 mlrd. dollarynan aıyrylyp, jıǵan-tergenin jelge ushyrǵan. Elaman QOŃYR, «Egemen Qazaqstan».