Pýtın Eýropa elderi evreılerin Reseıge kelýge shaqyrdy

ASTANA. 20 qańtar. Reseı prezıdenti Vladımır Pýtın sońǵy kezderi Eýropa elderinde ósip bara jatqan antısemıtızm kórinisteri men musylman-mıgranttar tarapynan zorlyq-zombylyqty kóbirek tartyp júrgen evreılerdi Reseıge kelip turýǵa shaqyrdy. Bul týraly «Interfaks» aqparyna súıengen egemen.kz tilshisi habarlady. Memleket basshysynyń Eýropa evreıler kongresiniń ókilderimen kezdesýi barysynda osy uıymnyń prezıdenti Vıacheslav Kantor qazir Eýropadaǵy evreılerdiń jaǵdaıy Ekinshi dúnıejúzilik soǵystyń kezindegiden de nashar ekenin málimdedi. Onyń aıtýynsha, ústemdik pen óktemdiktiń ósýinen bul násildiń ókilderi jan-jaqqa qashyp jatyr. «Onda bizge kelsin. KSRO kezinde ketip qaldy ǵoı, endi qaıta oralsyn. Men olardyń qoǵamdyq oryndarda kıpa kıip júrýden de qorqatyndaryn, tipti ózderiniń ulttaryn jasyratyndaryn reportajdardan kórdim», - dedi Pýtın. Degenmen, ol Eýropadaǵy ahýaldyń tap osynshama deńgeıde nashar ekenine kúmáni bar ekenin de bildirdi. Sózinde evreılerdiń nasızmdi áshkereleý baǵytynda atqaryp júrgen jumystaryna alǵys aıtty. Prezıdent usynysyna Kantor munyń «jańa prnısıpti fýndamentti ıdeıa» ekenin aıtyp jaýap qaıtardy. Kongress basshysy muny uıym múshelerimen birge talqylaıtyndaryn jetkizdi. Eýropa evreıleriniń kongresi – qurlyqtyń 42 elinde turatyn evreıler múddesin qorǵaıtyn úkimettik emes uıym. Ol 1986 jyly qurylǵan. Murat Aıtqoja. Derek, foto: Interfaks.