Jambyl oblysynda jaýapty adamdar tártiptik jazaǵa tartyldy

TARAZ. 20 qańtar. Jambyl oblysy ákimdiginde júktiligin jasyryp, jol ústinde bala bosanǵan mektep oqýshysynyń máselesine qatysty arnaıy jıyn ótkizildi. Onda bala tárbıesine salǵyrt qarap, náreste ólimine jol bergeni úshin birqatar jaýapty tulǵalarǵa tártiptik jaza berildi. Bul týraly Jambyl oblysy ákiminiń baspasóz qyzmeti habarlady. «Talas aýdany, Úsharal aýyly shaǵyn ǵana eldi meken. Mekteptegi oqýshylardyń da sany kóp emes. Ár synyptaǵy oqýshylar úshin synyp jetekshisi, tárbıe isi jónindegi orynbasar, mektep dırektory, balalardyń densaýlyǵyn qadaǵalaıtyn arnaıy dáriger bar. Solaı bola tura, mektep qabyrǵasyndaǵy jasóspirimniń júkti bolýyna jol berilgen. Qajetti jumystar der kezinde júrgizilmegen. Ýaqytynda anyqtaǵan bolsańyzdar náreste ólimine de jol berilmes edi», deıdi Jambyl oblysynyń ákimi Kárim Kókirekbaev. Bala tárbıesi men adam taǵdyryna beı-jaı qaraýǵa bolmaıtynyn qatań eskertken aımaq basshysy áleýmettik salaǵa jaýapty orynbasaryna eskertý, oblystyq bilim, densaýlyq basqarmalarynyń basshylaryna, kámeletke tolmaǵandar isteri jáne olardyń quqyqtaryn qorǵaý jónindegi komıssııa hatshysyna sógis, Talas aýdanynyń ákimine qatań sógis túrindegi tártiptik jaza beriletinin jetkizdi. Sonymen qatar aýdandyq bilim bóliminiń basshysy, mektep dırektory, Úsharal aýyldyq okrýginiń ákimi, Talas aýdanynyń bas dárigeri men orynbasary, jalǵan anyqtama bergen medbıke qyzmetinen bosatyldy. Oralhan Dáýit. Derek, sýret: egemen.kz