Aqtóbe oblysynda kúre joldyń boıynan kempıng ashyldy

ASTANA. 20 qańtar. Aqtóbe oblysynda kúre jolǵa jaqyn ornalasqan Aqjar aýyldyq okrýgi mańynan boı kótergen «Raıgúl» kempıngi paıdalanýǵa berildi. Bul týraly egemen.kz tilshisi habarlady. Hromtaý aýdany ákiminiń orynbasary Seıitmaǵanbet Shilmanovtyń aıtýynsha, sońǵy úsh jylda aýdanda jol boıynda qyzmet kórsetetin 13 nysan iske qosylǵan. Qyzmet kórsetý ortalyqtaryna qazaqstandyqtardan basqa Túrkııa, Reseı, Qytaı, Moldavııa, Bolgarııa, О́zbekstan jolaýshylary da aıaldaıdy. Aldaǵy ýaqytta jol boıynda budan basqa on shaqty kempıng ashý josparlanǵan. Sonyń altaýy bıyl salynady. Memleket tarapynan mundaı ortalyqtarǵa ınjenerlik jeliler tegin tartylady. «Raıgúl» kempınginiń ıesi Erjan Kenjebaev jańa nysandy salýǵa 30 mln. teńge jumsaǵan. Ortalyqtyń ishki árleý jumystaryn júrgizý úshin «Jumyspen qamtýdyń jol kartasy-2020» baǵdarlamasy boıynsha 3 mln. teńge kóleminde nesıe alǵan. Kempıngte 80 adamǵa arnalǵan ashana, 16 oryndyq qonaq úı jáne monsha bar. Satybaldy Sáýirbaı. Derek, sýret: egemen.kz.