Muhıt deńgeıi ǵalymdar oılaǵannan da kóterilip barady

ASTANA. 20 qańtar. Grenlandııa muzdyqtarynyń erýine baılanysty muhıt deńgeıi ǵalymdar oılaǵannan da kóterilip barady. Bul týraly TASS aqparat agenttigine silteme jasaǵan egemen.kz tilshisi habarlady. Mamandar 2009 jáne 2010 jyldary jaz maýsymynyń ystyq bolýyna baılanysty muzdyń betki qabattary erip ketýinen muhıtqa quıylatyn sýdyń artqanyn anyqtady. Osyǵan baılanysty jahandyq jylynýdyń áseri ýaqytynan buryn sezilýi múmkin. Professor Djeıson Boks Danııanyń ǵylymı ınternet-portalyna bergen suhbatynda, qardyń joǵarǵy qabatyna jınalǵan sý qatty muz qabyrshaǵyna aınalatynyn, bul óz kezeginde aldaǵy jyldary sýdyń tereńirek sińip, muzdyqqa aınalýyna jol bermeıtinin aıtty. Osyǵan deıin siresip jatqan muzdyń bıiktigi keıbir jerlerinde 40 metrdi quraǵan bolsa, búginde aıtarlyqtaı azaıdy. «Erigen qar sýy muhıtqa mólsherden tys quıylýda. Bul bárimiz úshin kútpegen jaıt boldy. Aldaǵy on jyl kóleminde muhıt deńgeıi qanshalyqty kóteriletinin anyqtaýymyz qajet», – deıdi Djeıson Boks. Al muztanýshy Dırk van Ast Grenlandııadaǵy muzdyqtardyń erýi jahandyq jylynýdyń áserinen bolýda deıdi. Aıta keteıik, Grenlandııa – Soltústik Amerıkanyń soltústik-batysynda ornalasqan álemdegi eń úlken aral. Jer kólemi 2 130 800 sharshy kılometrdi quraıdy. Aýmaǵynyń basym bóligin muz alyp jatyr. Shildeniń ystyq kúnderi aýa temperatýrasy +21 Selsıı gradýsqa deıin barsa, qysta ortasha kórsetkish -25 Selsıı gradýsty kórsetedi. Aıan Ábdýálı. Derek: TASS. Sýret: tonkosti.ru.