Aıqyn jol – joǵary maqsat

Elbasymyz Nursultan Nazarbaev 2016 jyldyń alǵashqy kúnderiniń birinde halqymyzǵa arnaǵan «Ult Jospary – qazaq­stan­dyq armanǵa bastaıtyn jol» dep atalatyn maqalasynda ulaǵatty áńgime aıtty. Munyń sál aldynda, ótken 2015 jyldyń sońynda Qazaqstan halqyna ózi­niń Joldaýyn jarııalady. Bul aqparat, materıaldar mańyzy qa­zirgi álemdik jan-jaqty tereń daǵdarys kórip jatqan elder turǵysynan qarasaq, halqymyzǵa jasaǵan naqty ıdeologııalyq bas­tama, alańdaýshylyqqa qarsy senim tiregi deýge bolady. Búkil álem túrli daǵdarystan elin qalaı aman saqtaý úshin ne isterin bilmeı, sasqalaqtap turǵanda Nursultan Nazarbaevtyń aıtqandary biz úshin danalyq baǵdarlama, eldi tabysqa jiger­lendiretin rýhanı qýat deýge turady. Jarııalanǵan materıaldar aýqymyn iri damyǵan batystyq elder jaǵdaıymen salystyryp qarasaq, mańyzy óte joǵary, aıqyn ekendigi baıqalady. Kúni keshe ǵana teledıdardan AQSh prezıdenti Barak Obama óz eliniń Kongresine joldaýyn ótkize almaı qınalyp turǵanyn kórip tańdandyq. Onyń ber jaǵynda Fransııa prezıdenti, Anglııa premeri, Germanııa kansleri, basqa Eýropa elderi basshylary óz elderin daǵdarystan qalaı aman alyp shyǵý jolyn taba almaı, demi taýsylyp turǵanyn eske alsaq, eń aldymen, ol el basshylary óz eliniń halqyna ne aıtaryn bilmeı daǵdarǵanyn kóremiz. Halyq aıtady: «Ne ekseń, sony orasyń» dep. Batys elderi, ózimen ózi jatqan Taıaý Shyǵys, arab elderine búlik salyp, Irak, Lıvııa, basqa elderdi talqandap, halyqtaryn qyrǵynǵa ushyratyp, birine birin jaý etip, olardyń ashýyn ushqyndyrdy. Nátıjesinde eli, jeri órtenip jatqan sorly halyq týǵan jerin, ósken elin tastap, joqshylyq qyspaǵynan Eýropaǵa shubyryp, sodan pana izdedi. Qazirgi qystyń kózi qyraýda júz myńdaǵan bosqyndar Eýropa jerine, halqyna qıyndyq týdyrýda. О́ıtkeni, olarǵa baspana, jeıtin tamaq, jyly kıim kerek, áıtpese qyrylady. Mine, osyndaı álemdik jaǵdaıda bizdiń elimizde, Elbasymyz aıtqan pikirleri hal­qymyzdyń armanǵa jetý jolyn ashyp kórsetýde. Ol arman, árıne, el tynyshtyǵy, turaqty turmystyq jaǵdaı, halyqty kúızeliske soqtyrmaý, babalar baǵytyn saqtaý, ilgeri damyǵan 30 eldiń ishine kirip, «100 naqty qadamdy» iske asyrý. Sondaı-aq, qaǵıdatty, quqyqty orta jasaý úshin 59 zań endiriletini. Prezıdent tapsyrmasy on kúrdeli máselelerdi qamtıdy. Olar Parlament pen Úkimet, kásibı memleket, sot júıesi, qazaqstandyq patrıotızm, taǵy sol sııaqty máseleler. Solardyń ishinde eń basty máselelerdiń biri – basshylardyń halyqqa taza qyzmet etýi, dandaısyp, demokratııalyq tártipti óz paıdasyna aınaldyrǵandardyń aıaǵyna tusaý salý, eldi birlikke shaqyrý, ashyq memlekettilikti iske asyrý. «Qazaqstan halqy», «Qazaq­standyq ult», «Máńgilik El», «Dala órkenıeti» uǵymdyq ter­mın­­deri endirildi. Jańa jyl basynda Prezıden­timiz jańa pikirler aıtyp, eldi soǵan jumyldyrýda. Jarııa­lanǵan materıaldardyń basty temir­qazyǵy – adam tárbıesi. О́ıtkeni, adam tárbıesi qashanda mańyzdy, al oqý oryndarynda tárbıe men bilim berý eń joǵary turǵan mańyz­dy maqsat. Otanǵa berilgen patrıot, joǵary bilimdi, kásibı maman daıarlaý, bul joǵary oqý oryn­dary úshin de, jalpy halyq úshin de aıqyn jol, bıik maqsat demekpin. Dosmuhamed KIShIBEKOV, QR UǴA akademıgi. ALMATY.