«Barys» «Aq Barstan» jeńilip, jaǵdaıyn qıyndatyp aldy

ASTANA. 17 aqpan. Búgin Qurlyqtyq hokkeı lıgasynyń turaqty chempıonaty sheńberinde Astananyń «Barysy» Qazanda jergilikti «Aq Barspen» kezdesip, 2:5 esebimen jeńildi. Bul týraly egemen.kz tilshisi habarlady. Oıyn aıdyn ıeleriniń aıqyn basymdyǵymen bastaldy. Kezdesýdiń bar bolǵany 3-mınýtynda qazandyqtar Djastın Azevedýdiń kómegimen esep ashty. Arada 7 mınýt ótkende, Fedor Malyhın esepti eseledi. Bunymen de toqtamaǵan «Aq Bars» hokkeıshileri úziliske deıin taǵy bir shaıba soǵyp, esepti 3:0-ge jetkizdi. Atap aıtqanda, 16-mınýtta Artem Lýkoıanov mergendigimen kózge tústi. Ekinshi kezeń bastalmaı jatyp, qarsylastarymyz tórtinshi shaıbalaryn soǵyp úlgerdi. Naqty aıtar bolsaq, 22-mınýtta Malyhın dýbldiń avtory atandy. Osy goldan keıin es jıǵandaı bolǵan «Barys» 2 mınýttyń ishinde, ıaǵnı 25 jáne 27-mınýttarda eki shaıba soǵyp, jankúıerlerine úmit syılaǵan edi. Bul goldardyń avtorlary – tıisinshe Dastın Boıd pen Roman Starchenko. Alaıda, oıynnyń 32-mınýtynda «Aq Bars» sapynan Vasılıı Tokranov nátıjeli soqqy jasap, komandasynyń 5-shaıbasyn soqty. Qalǵan ýaqytta esep ózgermeı, Tatarstannyń komandasy jeńiske jetti. Osylaısha, «Barys» bıylǵy maýsymda 31-ret jeńilip otyr. Búginde qorjynynda 83 upaı bar komandamyz Shyǵys Konferensııasynda 9-orynda tur. Pleı-off joldamasyna talastaǵy basty básekelesimiz Nıjnekamskiniń «Neftehımıgi» búgin syrt alańda Tolıattıdiń «Ladasyn» jeńip, týrnır kestesinde bir saty kóterildi. «Lada» ázirge 86 upaımen 8-orynda tur. Endi lıganyń turaqty chempıonaty aıasynda bir ǵana týr qaldy. Ol týrda «Barys» Ombyda jergilikti «Avangardpen» synǵa túsedi. Al «Neftehımık» óz alańynda Ýfanyń «Salavat Iýlaevyn» qabyldaıdy. Bul kezdesýler 18 aqpan kúni ótedi. Astanalyqtardyń pleı-offqa ótýden áli de bolsa úmiti úzilgen joq. Ol úshin Andreı Nazarovtyń shákirtterine sońǵy oıynda jeńip qana qoımaı, «Neftehımıktiń» negizgi ýaqytta jeńilýin tileýden basqa amaldary joq. Elaman Qońyr. Derek: egemen.kz. Sýret: hcbarys.kz.