Maıra AISINA:
– Jalpy, depýtat bolý adamǵa óte úlken jaýapkershilik júkteıdi. Elimizdiń ekonomıkalyq damýyna, áleýmettik ál-aýqatynyń artýyna yqpalyn tıgizetin zańdardy barynsha tıimdi etip qabyldaý adamnan óte kóp eńbektenýdi, uzaq ýaqyt boıy sarylyp izdenýdi talap etedi.
Men ótken saılanymdarda óz basymnan osyndaı ahýaldardy ótkerdim.
V saılanymnyń depýtattardy úılesimdilikpen jumys istedi dep aıta alamyn. Bári de zańdardy qajetti deńgeıge jetildirýge belsene atsalysty. Endi jańa áriptesterimizben de tez tabysatyn shyǵarmyz. О́ıtkeni, bul joly da Májiliske óte bilikti, óz isiniń sheberleri saılanǵanyn kórip otyrmyz.
Árıne, ótken saılanymdaǵy keıbir áriptesterimizdiń ornyn solar sekildi bilikti adamdar basqanyna senimdimin.
Balaıym KESEBAEVA:
– Parlament Májilisiniń depýtaty bolyp saılanǵanyma qýanyshtymyn, sonymen qatar, bul jumystyń óte aýyr jaýapkershilik júkteıtinin de sezinemin. О́zim biraz jyl Qyzylorda oblystyq ádilet departamentiniń basshysy bolyp qyzmet atqarǵandyqtan, zańdarmen jaqsy tanyspyn. Alaıda, solardyń keıbiriniń qazaqsha mátinderi qaryn ashyratynyn kórip júretin edik. Endi sony óz qolymyzben túzep, halyqqa sapaly sánimen usynýǵa qolǵabys tıgizermin degen úmitim bar.
Búgin Elbasynyń sózi maǵan qatty áser etti. Ol kisi bizge úlken jaýapkershilik júktedi. Bes ınstıtýttyq reformanyń iske asýyn zańnamalyq turǵydan qamtamasyz etetin zańdar da jetildiriletinin jáne osy baǵyttaǵy jańa zań jobalary bizdiń qaraýymyzǵa kóptep keletinin sezip turmyn. Mine, osylardyń bárin ári tıimdi, ári halyqqa barynsha uǵynyqty jasaı alatyn bolsaq, bizdiń mindetimizdiń oryndalǵany sol dep bilemin.
Fahrıddın QARATAEV:
– Elbasynyń jańaǵy aıtqan sózderi meni qatty tolqytty. Ol kisi óziniń sózinde bizdiń shyǵarǵan zańdarymyzdyń bári Qazaqstan halqynyń ál-aýqatyn arttyrýǵa baǵyttalatynyn atap kórsetti.
Qarjy úderisteriniń jarııalylyǵyn qamtamasyz etetin biryńǵaı salyq jáne keden kodeksin qabyldaý kerek degen tapsyrmasy da qatty unady. Bul zańnyń ártúrliligin paıdalanyp, memlekettik qarajatty jeń ushynan jalǵasyp, qymqyrǵysy keletinderdiń jolyn kesetini aıqyn. Jalpy, bir másele boıynsha zańda eshkimdi tapjyltpaıtyn birizdi sheshim bolýy kerek qoı. Sonda ǵana sybaılas jemqorlyqtyń joly kesiledi.
Elbasynyń osyndaı máselelerge nazar aýdaratyny meni qatty tánti etti. Men ózim ózbek tilinde shyǵatyn «Janýbıı Kozogıston» atty oblystyq gazettiń bas redaktorlyǵy qyzmetinen «Nur Otan» partııasynyń tizimimen saılanǵan jýrnalıst depýtatpyn. Sondyqtan da, ashyqtyq pen móldirlikti qalaımyn.
Máýlen ÁShIMBAEV:
– Memleket basshysy óz sózinde Parlamenttiń aldynda turǵan keleli mindetterdi aıqyndap berdi. Ol negizinen elimizdiń quqyqtyq bazasyn qalyptastyrý tóńireginde órbidi. Aldaǵy ýaqytta básekelestikke, salyq kodeksine, keden kodeksine qatysty zańdardy jetildirý máselesi aldymyzda tur. Depýtattar Memleket basshysynyń tapsyrmasyna oraı osy tóńirekte belsene jumys isteıdi. Túıindep aıtqanda, Parlament Májilisiniń búgingi eń basty mindeti elimizdegi reformalardy zańdyq turǵydan qamtamasyz etý bolmaqshy.
V shaqyrylymda depýtattar 59 zań qabyldady. Áıtse de, Ult Josparyna baılanysty, basqa da reformalarǵa qatysty quqyqtyq bazany tolyqqandy qalyptastyrdyq dep aıtý qıyn. Basqa da zańdardy, basqa da sheshimderdi qabyldaý qajet. Budan basqa, «Nur Otan» partııasynyń fraksııasy úshin saılaýaldy baǵdarlamasy bizdiń basym baǵyttarymyzdyń biri bolyp tabylady. Sondaı-aq, qazirgi Parlament Májilisiniń aldynda turǵan basty másele – bes ınstıtýttyq reformany júzege asyrý baǵytynda jumys isteımiz.
Gennadıı ShIPOVSKIH:
– Búgin VI shaqyrylymnyń alǵashqy otyrysyna qatystyq. Ant qabyldadyq. Parlamenttik qyzmetimiz endi bastalyp jatyr. Osy kúnnen bastap halyq úshin qoldan kelgen qyzmetimizdi kórsetýimiz kerek dep oılaımyn. О́ıtkeni, halyqtyń kópshiligi «Nur Otan» partııasynyń saılaýaldy baǵdarlamasyna senimin artty, ózderiniń túıindi máseleleriniń sheshiletindiginen úmittenip otyr. Sondyqtan, aldaǵy ýaqytta áriptesterimizben birge halyqtyń oıynan shyǵýǵa tyrysamyz.
Parlament Májilisiniń quramynda ártúrli salanyń ókilderi bar. Onyń ishinde ekonomıster de, elge tanymal saıasatkerler de jetkilikti. Halyqtyń problemasy da ártúrli. Sondyqtan ár depýtat óziniń tereń biletin salasyna baılanysty, zańdardyń sapaly qabyldanýyna úles qosatyny sózsiz. Men jumysshylar tobynyń ókili bolǵandyqtan shyǵar, áleýmettik jelilerde syn tezine alǵany baıqalady. Men mashınıspin, poıyz júrgizetin, al ol qansha adamnyń taǵdyryna jaýap beretinin bilesiz be? Jaýapkershiligi tym joǵary. Bilmegen jerlerimiz bolsa, úırenemiz, sóıtip, depýtattyq qyzmetimizdi jaýapkershilikpen atqarýǵa tyrysatyn bolamyz.
Sýretterdi túsirgen
Erlan OMAROV.
