Aqtóbede respýblıkalyq bı baıqaýy ótýde

AQTО́BE. 30 naýryz. Aqtóbede Táýelsizdiktiń 25 jyldyǵyna jáne oblystyq halyq shyǵarmashylyǵy úıiniń 55 jyldyǵyna arnalǵan Nursulý Tapalova atyndaǵy III Respýblıkalyq «Bıdiń nury – Nursulý» jeke oryndaýshylar bı baıqaýy ótýde. Bul týraly egemen.kz tilshisi habarlady. Bı baıqaýyn oblystyq mádenıet, muraǵattar jáne qujattama basqarmasynyń qoldaýymen oblystyq halyq shyǵarmashylyǵy úıi uıymdastyrdy. Baıqaýdy uıymdastyrýdyń maqsaty qazaqtyń balet bıshisi, Qazaq QSR-niń eńbek sińirgen ártisi Nursulý Tapalovanyń shyǵarmashylyǵyn nasıhattaý, horeografııa ónerin jáne halyqtyq bılerdiń jeke oryndaýshylaryn óskeleń urpaq pen shyǵarmashyl jastar arasynda keńinen tanystyrý bolyp tabylady Respýblıkalyq baıqaýǵa jastary 15-25 aralyǵyndaǵy elimizdiń Astana, Atyraý, Shymkent, Qyzylorda, Atyraý, Semeı, Taraz, Aqtaý, Aqtóbe qalalary men Aqtóbe oblysynyń Oıyl aýdanynan 14 kásibı jáne áýesqoı bı ujymdarynyń jeke oryndaýshylary qatysýda. Baıqaý eki kezeńnen turady. Birinshi, qatysýshylar halyqtyq bı mektebi boıynsha tehnıkalyq ádisterin kórsetedi. Ekinshi, qatysýshy-bıshiler ózderiniń tańdaǵan bılerin bıleıdi. Qatysýshylardy respýblıka kóleminde horeografııa salasyndaǵy jetekshi mamandar baǵalaıdy. Qazylar alqasynyń tóraǵasy – Astana qalasyndaǵy «Shalqyma» halyq bı ansambliniń kórkemdik jetekshisi, Mádenıet qaıratkeri Abdrakul Esekeev, músheleri – Aqtaý qalasyndaǵy Abaı atyndaǵy mádenı-demalys kesheniniń «Jorǵa» bı mektebi men halyqtyq bı ansambliniń kórkemdik jetekshisi, Eńbek sińirgen qaıratker Serik Sarıev, Qorqyt Ata atyndaǵy Qyzylorda Memlekettik ýnıversıtetiniń «Dıdar» halyqtyq bı ansambliniń kórkemdik jetekshisi, horeografııa kafedrasynyń meńgerýshisi, dosent Gúlbaný Mýrzabaeva, Aqtóbe oblystyq mádenıet, muraǵattar jáne qujattama basqarmasynyń basshysy Qanat Aıtbaev, Aqtóbe oblystyq halyq shyǵarmashylyǵy úıiniń dırektory Orynbasar Terekov qatysýshylardyń akterlyk sheberligin, kórkemdik-ssenalyq beınesin, bı qozǵalysynyń máneri men ereksheligin saralaýda. Satybaldy Sáýirbaı. Derek: egemen.kz. Sýret: kargoo.gov.kz.