Ispanııada 40 kún boıy qazaq fılmderi kórsetiledi

 Sáýir aıynyń basynda Táýelsizdigimizdiń 25 jyl­dy­ǵyna oraı, Barselona qa­lasynda «Qazaqstandyq kıno sıkldary» sharasy saltanatty túrde ashyldy. 19 naý­ryzdan bastap, sáýir aıynyń aıaǵyna deıin jalǵasatyn, ıaǵnı qyryq kún boıy kórsetiletin qazaq kınosynyń kúnderin uıymdastyrýǵa Qazaqstannyń Ispanııadaǵy elshiligi, Sh­áken Aımanov atyndaǵy «Qazaq­fılm» aksıonerlik qoǵamy, «Dom Azıı» qoǵamdyq uıymy men «Cinemes Girona» kınoteat­ry uıytqy bolýda. Al saltanatty sharanyń ashylýyna Qazaq elshiliginen bólek, Barselonadaǵy kon­sýldyq korpýsy men Ispanııada oqyp júrgen qazaq stýdentteri at salysýda. Árıne, mundaı aıtýly má­denı oqıǵanyń basty maq­saty Qazaqstandy, onyń halqyn, dástúrin, tarıhy men ózge jurtqa úlgi bolǵan tatýlyǵyn tanytý ǵana emes, Ispanııa men Qazaqstannyń qarym-qaty­nasyn jandandyra túsý ekeni aıan. Sonymen, Barselona qala­synda bastalǵan saltanat­ty sharada «Dom Azıı» qoǵam­dyq uıymynyń mádenıet jáne kórmeler jónindegi departamentiniń dırektory ári Ispanııadaǵy mádenıet sa­lasyndaǵy bedeldi sarapshysy Menene Gras qazaqstandyq fılmderdiń álemdik kınematografııada ózindik orny bar ekenin ataı kele, onyń aıǵaǵy retinde otandyq kartınalarǵa berilgen halyqaralyq kınofes­tıvaldardyń basty júldelerin ataǵan. Menene Gras hanymnyń oıyn­sha, «Qazaqstandyq kıno sıkldary» qazaqstandyq kıno­nyń biregeıligin ǵana emes, búkil memlekettiń aýyzbirshiligin nasıhattaıdy. Bul kúnderi Barselonada bastalyp, Madrıd pen Va­lensııa qalalarynda jal­ǵasyn tabatyn qazaqstandyq kartınalardyń kórsetilimine  ıspandyqtar kóptep kelýde. Olar «Qazaqfılm» kınostýdııasynda túsi­ril­gen rejısser Er­mek Shynar­baevtyń «Dala daýy­sy», Er­mek Tursynovtyń «Ken­je» men «Shal», Erlan Nur­mu­ham­betovtiń «Jańǵaq tal», Rashıd Súleımenovtiń «Ora­lý» fılmderi men Qa­zybek Ámir­janovtyń qysqa metraj­dy «Baq» kartınasy, Ba­qyt Qaıyrbekovtiń «Deshti Qyp­shaq. Qupııa belgiler» de­rekti fılmderin tamashalaý­da. Fılmderdiń barlyǵy qazaq tilinde ıspan sýbtıtrimen j­úrip jatyr, dep habarlaıdy, Sh.Aı­manov atyndaǵy «Qazaq­fılm» kınostýdııasy» AQ baspasóz qyzmeti. Aınash ESALI, «Egemen Qazaqstan». ALMATY.