Mektep oqýshylarynyń jańa kıim úlgisi

Astanadaǵy ata-analar qaýymyna tanystyryldy Jańalyq elordada ótken otandyq óndirýshilerdiń kórmesi kezinde kórsetildi. Oǵan Bilim jáne ǵylym mınıstri Erlan Saǵadıev kelip, oqýshylardyń kıimine joǵary baǵasyn berdi. Endi otandyq tigin fabrıkalary formalardy tigýmen aınalysady. Qoldaǵy derekterge qaraǵanda, búginde jeńil ónerkásipte qyzmet etip jatqan qosymsha 55 tigin fab­rıkasy tapsyrysty oryndaýǵa daıyn. Mektep formasynyń jyldyq naryǵy – 30 mlrd. teń­ge. Demek, osynshama somaǵa oqý­shylardyń kıimin tigýge bolady. Mektep kıimin tigý máselesi orta bilim berý uıymdary úshin oqýshylardyń mindetti formasy týraly buıryq shyqqannan bastap qolǵa alyndy. Qazirgi kezde ony tigýge, dızaınyn ja­saýǵa jan-jaqtan usynystar kelýde. Máselen, almatylyq Má­dı Bekdaır degen stılıst mektep formasyn qazaqsha naqyshta tigýdi usynypty. Onyń aıtýynsha, kúndelikti turmysta ulttyq na­qyshtaǵy kıimderdi kııýdi oqý­shylardan bastaý kerek. – Meniń oıymsha, qazaqtyń ulttyq kıimderin kııýdi kún­delikti turmysqa engizý qajet. Bul óte ádemi kórinis bolady. My­saly, Úndistanǵa nemese Afrı­kaǵa barsaq, sol eldiń ult­tyq kıimin kıip júrgen adamdardy jıi kezdestiremiz. Alysqa barmaı-aq, kórshi Túrikmenstanda da jurt ulttyq kıimmen júredi. Bizdiń elde ulttyq kıimdi kııýdi bank qyzmetkerleri men stıýardessalardan bastasaq, jalǵasyn tabady degen oıdamyn. Mektep oqýshylarynyń kıimderi de ulttyq naqyshta jasalsa keremet bolar edi, – dedi ol. Ázirge bul usynysqa jaýa­p kelgen joq. Al Qazaqstan Je­ńil ónerkásibi kásiporyndary qaýymdastyǵynyń prezıdenti Lıýbov Hýdova  aldymen oqý­shylardyń kıimin ózi­mizdiń otandyq fabrıkalar tigýi kerektigin, sodan keıin mek­tep formasyn satyp alýǵa memlekettik tapsyrys­ty en­gizý qajettigin aıtty. Ol balalar kıiminiń kóbine shetelden ákelinetinin, qazirgi kezde Qytaı, Qyrǵyzstan men Túrkııanyń kıimderi otandyq naryqty jaý­lap alǵanyn atap ótti. Rústem JUMAN.