Aqtóbede «Neo-folklor» atty baıqaý ótkiziledi

AQTО́BE. 8 sáýir. Aqtóbede «Neo-folklor» atty baıqaý ótkiziledi. Bul týraly osy baıqaýdy uıymdastyrý komıtetiniń aqpary boıynsha egemen.kz tilshisi habarlady. «Áıelderdiń quqyqtary men múmkindikterin keńeıtý» atty BUU-nyń Qazaqstandaǵy damý baǵdarlamasy jáne Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa jobasynyń aıasynda «Neo-folklor» kıimder dızaınerleri men umytylyp bara jatqan jáne jańǵyrtylǵan qazaq ulttyq taǵamdary respýblıkalyq baıqaýlarynyń qalalyq kezeńi ótedi. Baıqaý «Astana» EXPO – 2017» halyqaralyq kórmesine áıelderdiń de qatysýyna daıyndyq maqsatynda uıymdastyrylyp otyr. Baıqaýlardy ótkizý úshin uıymdastyrý komıteti qurylyp, «Neo-folklor» kıimder dızaınerleri men umytylyp bara jatqan jáne jańǵyrtylǵan qazaq ulttyq taǵamdary baıqaýlardyń erejesi bekitildi. Baıqaýlardyń uıymdastyrýshysy — Aqtóbe qalasy ákiminiń janyndaǵy áıelder isteri jáne otbasylyq-demografııalyq saıasat jónindegi komıssııa. «Umytylyp bara jatqan jáne jańǵyrtylǵan qazaq ulttyq taǵamdary» baıqaýynyń maqsaty — qazaq ulttyq taǵamdaryn saqtap qalý jáne kópǵasyrlyq dástúrlerin nasıhattaý. Umytyla bastaǵan taǵamdardy qaıta jańǵyrta otyryp, jańa zamanaýı taǵamdardy ázirleý. Baıqaýǵa Aqtóbe qalasynyń turǵyndary qatysa alady, sondaı-aq barlyq menshik nysanyndaǵy kásiporyndar men uıymdardyń óz ashanalarynda qyzmet jasaıtyn aspazdaryn qatystyra alady. «Neo-folklor» kıimder dızaınerleri baıqaýy qazaqtyń ulttyq kıimderiniń biregeı qundylyqtaryna, onyń qazirgi sán úlgisiniń úrdister úılesimdiligine sáıkes etnıkalyq-turmystyq qundylyǵy men alýandylyǵyna nazar aýdartýdy kózdeıdi. Baıqaýǵa kásibı modelerler, kıim dızaınerleri, kıim tigetin shyǵarmashylyq ortalyqtar, shyǵarmashylyq ujymdar, dekoratıvti-qoldanbaly óner sheberleri, orta arnaýly  jáne joǵary oqý oryndarynyń oqýshylary men pedagogtardan turatyn shyǵarmashyl mamandary, jalpy bilim beretin mektepter, sán ortalyqtary men teatrlar, ulttyq kıimmen aınalysatyn mamandar qatysa alady. Baıqaýlardyń qalalyq kezeńi 27 sáýir kúni ótedi. Baıqaýǵa qatysý úshin ótinishter 2016 jyldyń 15 sáýirine deıin, Aqtóbe qalasy, T.Ahtanov kóshesi, 50 (27-kabınet) mekenjaıy boıynsha qabyldanady.  Qalalyq kezeńdegi baıqaýdyń jeńimpazdary I, II jáne III dárejeli dıplomdarymen, baǵaly syılyqtarmen marapattalyp, oblystyq kezeńge joldanady. Satybaldy Sáýirbaı. Derek, foto: egemen.kz