Qadaǵalaýshy organnyń mindetterin aıqyndady

Elbasy Nursultan Nazarbaev Bas prokýratýraǵa bardy, dep habarlady Prezıdenttiń baspasóz qyzmeti. Qazaqstan Prezıdenti Bas pro­kýratýranyń basshylyq qura­my aldynda sóılegen sózinde A.Daý­ylbaevtyń laýazymynan bosatylatynyn, ókilettik merziminiń aıaqtalýyna baılanysty onyń basqa jumysqa aýysatynyn aıtty. – Ashat Daýylbaev Bas proký­ratýrada sońǵy 15 jyl boıy úz­dik­siz jumys istedi. Aldyna qoıyl­ǵan mindetterdi oryndady, soǵan oraı oǵan jumysy úshin alǵys aıta­myn. Ol aldaǵy ýaqytta da óziniń kásibı úlesin qosatyn bolady, – dedi Memleket basshysy. Sondaı-aq, Nursultan Nazarbaev prokýratýra júıesinde eleýli jumys tájirıbesi bar jańa Bas prokýror J.Asanovty tanys­tyrdy. – Ol prokýrorlyq qyzmettiń barlyq satysynan ótti, úsh óńirde, Ádilet mınıstrliginde qyzmet istedi, Parlament depýtaty boldy. Bilimi men tájirıbesi jetkilikti, jergilikti jerdegi ahýalmen tanys. Osy ujymda uzaq ýaqyttan beri jumys isteıdi, oǵan eshqandaı eskertý aıtylǵan joq. Bul jumys qolynan keletinine senimdimin, – dedi Qazaqstan Prezıdenti. Memleket basshysy bıyl Bes ınstıtýttyq reformany júzege asyrý bastalǵanyna, onyń bir ba­ǵyty quqyqtyq memleket qa­lyp­tastyrý ekenine nazar aýdardy. – Negizgi salmaq prokýra­týra organdaryna túsedi, óıtkeni, olar barlyq ózge quqyq qorǵaý or­gan­darynyń qyzmetin úılestire­tindikten, quqyqtyq salada zor ókilettikterge ıe. Sońǵy jyldary qadaǵalaýshy organ el azamattaryn qorǵaý jáne quqyq tártibin qamtamasyz etý jóninen eleýli jumys atqardy. Memlekettik jáne qoǵamdyq ınstıtýttardyń quqyq qorǵaý áleýetin arttyrý, zańdardy tıimdi qoldaný jáne azamattarmen, shaǵyn jáne orta bıznes ókilderimen kúndelikti jumys barysynda zańnyń saqtalýyn qamtamasyz etý – basty mindet, – dedi Nursultan Nazarbaev. Qazaqstan Prezıdenti bul rette azamattarǵa óz quqyqtaryn, sondaı-aq, elde qabyldanyp jatqan zańdardy, sonyń ishinde Jer kodeksin durys túsindirýdiń mańyzdylyǵyn atap ótti. – Kodekste jerdiń shetel­dik­terge satylatyny týraly eshteńe aıtylmaǵan. Bizdiń mindet – jer­diń menshik ıesi bolyp, onyń durys paıdalanylýy úshin Qazaqstan azamattaryna jerdi jekeshelendirý múmkindigin berý. Jer qýraı basyp, ıesiz jatpaı, túsiniksiz maqsatta paıdalanylmaı, halyqtyń ıgiligine aınalýy kerek, – dedi Memleket basshysy. Osyǵan baılanysty Nursultan Nazarbaev jańa normany tolyq túsinbeý jáne burys mazmundaý derekteri bar ekenin aıtty. – Bul másele memleket qa­byl­dap otyrǵan zańdardy halyqqa tú­sin­dirýge mindetti Úkimet pen jer­gilikti atqarýshy bılikke, son­daı-aq, quqyq qorǵaý organdaryna qatysty, – dedi Qazaqstan Prezıdenti. Budan bólek, Memleket basshysy úlken rezonans týdyrǵan ister boıynsha prokýrorlar Pre­zı­denttiń tıisti tapsyrmasynan keıin ǵana shara qabyldaǵan jaǵ­daılar bolǵanyna nazar aýdardy. – Zańdy saqtaýshylardyń óz­deri ókilettikterin oryndaý jóni­nen minsiz bolýǵa tıis. Sonda senim arta túsedi, aryz-shaǵym azaıady, BAQ-taǵy materıaldardyń mazmuny da ózgeredi. Bul – kúrdeli mindet, biraq ony sheshpeıinshe bizdiń barlyq josparymyz úzilip, strategııalar men qabyldanyp jatqan baǵdarlamalarǵa da qa­ter tónedi. Sondyqtan, men sizder­di durystap jumys isteýge shaqy­ramyn. Bes ınstıtýttyq reforma men «100 qadamda» ol sharalardyń bári naqty jazylǵan, – dedi Nursultan Nazarbaev. Qazaqstan Prezıdenti kóz­del­gen reformalar arqasynda quqyq qorǵaý jáne sot júıesi aza­mattardyń quqyqtaryn qor­ǵaý jónindegi óz jumysynyń tıim­diligin arttyra túsetinine senim bildirdi.