Rıng apogeıi – nokaýt!

Azýyn aıǵa bilegen «Astana arlandarynyń» «Venesýela Kası­kes»komandasyn jeńetin­digine kóńilimizdiń sengeni son­shalyqty, oǵan balshy, baqsy, qushynashtar kóripkeldiginiń túk te keregi joq bolatyn. Shymkenttegi «Sırk» mane­jinde ótken alǵashqy kúngi aıqas 4:1 esebimen «arlandardyń» esebi­ne jazyldy. Kelesi kúni qonaqtardyń esh­qaı­sysyna jeńis buıyrǵan joq. 52 kılo salmaqtaǵy Azamat Isa­qulovtyń qarsylasy Iol Fınol on toǵyz jasta bolsa da 7 ret shar­shy alańǵa shyǵyp, tórteýinde jeńiske jetken jigit. Biraq, bizdiń saıypqyranǵa ol jaǵy áser etken joq. Túlki in­detken qasqyrdaı izine túsip sharshy alańda tyqsyr­dy da júrdi. Ońtaıy kelgende oń qolmen opyra uryp, betpe-bet kelgende bes-alty soqqyǵa kómip tas­tady. Úshinshi raýndta Azamattyń soqqysynan Fınol­dyń aýzyndaǵy kapasy ushyp ketken. Alapat urys salǵan Isa­qulovtyń óz kúshin durys eseptemegeni tórtinshi raýnd­­tyń ortasynda baıqalyp qal­ǵan. Qarqyny báseńdegen soń Fınol alǵa umtyldy. Úsh tóre­shiniń ekeýi venesýelalyq jigitke jaq tartty. Sońǵy raýndta da solaı boldy. Azamat alǵashqy úsh raýndtaǵy taza alǵan upaılarynyń arqa­synda 2-1 esebimen jeńiske jetti. Al Zakır Safıýlınniń (60 kılo) qamshy saldyrmaıtynyn bilgenbiz. Onyń urys máneri eshkimge uqsaı bermeıdi. Bir qyryndap eki qolyn salbyratyp jiberip, qarsylasyna dúrse qoıa beredi. Ol ońaı olja kórip, tap bergende oń, sol qol eki jaǵynan qanjardaı qadalady. Qarsylasy Lýıs Karber durys soqqy daryta almaı ábden pushaıman boldy. Qalasa raýnd arasynda ózin tynyqtyra da biletin Za­kır bes raýndqa kúshin ábden shamalapty. Besinshi raýndtan soń da sýytylǵan jaraý attaı oınaqshyp turdy. Eshbir tóreshi jeńisine kúmándanǵan joq. Zakırdiń shymkenttik jerlesi Bekzot Halmetovtiń (69 kılo) qarsylasy Gabrıel Maestranyń qaıratyn London olımpıadasynda kórgenbiz. Iyqty, qoly uzyn, orta jáne alys qashyqtyqta ózin sýdaǵy balyqtaı sezinetin Maestrańyz Rıo de Janeıronyń joldamasyn qaltasyna basyp alǵan dóı. Raýnd saıyn ókshesin bas­ty da otyrdy. Gabrıeldiń eki soqqysyna namys tula boıyn jandyrǵan saıypqyranymyz tórt soqqymen jaýap berýge tyrysty. Ras, Maestranyń árýaǵy asqan tustary da boldy. Kóseýdeı qoldary ash búıirden súńgideı qadalyp jatty. Biraq, Bekzottyń jeńiske degen qushtarlyǵy Gabrıel­­diń ekpinin taý sýyndaı bas­ty da otyrdy. Tóreshiler al­ǵashqy eki raýndta Maestro jaǵynda bolǵanymen, sońǵy úsh raýndta Halmetovtiń jeńgenine kúmándanǵan joq. Arman Rysbekke (81 kılo) kó­birek sengen edik. Qoıan-qol­tyq aıqastyń jigiti edi. Basyn qar­sylasynyń basyna tirep qoıyp, qoıǵylasýda des bermeıtin. Ve­nesýelalyq Nalek Korbaj de­genińiz de osyndaı soıqan eken. Naǵyz kelseń keldiń ózi. Qaıta bizdiń Arman «myna páleniń beti qurysyn» degendeı, eki-úsh márte taıqyp ketip, urys saldy. Sońǵy raýndta tóreshilerdiń úsheýi de Nalek myqty degenimen bes raýndtyń qorytyndysymen Rysbek jeńiske jetti. Asa aýyr salmaqtaǵy Qamshybek Qońqabaev О́skemende ótken jarysta ózbek boksshysy Abdýllaevty erkin eńsergen edi. Edgar Mýnıs boıy tapaldaý bolǵanymen denesi tyǵyz. Alǵashqy raýndta Qamshybekti sharshy alań buryshyna qýyp tyǵyp, soqqy astyna alǵanda «sońy qalaı bolar eken» dep qylpyldap qalǵanbyz. Qamshybek erdiń soıy eken. Ekinshi raýndta jaǵynan opyra uryp, edenge jalp etkizdi. Nokaýt! Jalpy esep 9:1. Arlandardyń jartylaı fınaldaǵy qarsylasy – «British Lionhearts». Baqtııar TAIJAN, «Egemen Qazaqstan» Ońtústik Qazaqstan oblysy