Abaı atyndaǵy Memlekettik opera jáne balet teatrynda aqyn, kınodramatýrg, pýblısıst, zertteýshi-ǵalym, qoǵam qaıratkeri, Qazaqstannyń Eńbek Eri Oljas Súleımenovtiń 80 jasqa tolýyna oraı uıymdastyrylǵan shyǵarmashylyq saltanatty kesh úlken tabyspen ótti. Osynaý mereıtoı saltanatyna alys jáne jaqyn shetelderden kóptegen kórnekti mádenıet qaıratkerleri kelip, qýanyshty birge bólisti.
Rejısser Ánýar Mustafınniń Oljas aqyn týraly túsirgen «Meniń jolym» dep atalatyn derekti fılmmen bastalǵan jyr keshinde Qazaqstan Respýblıkasy Mádenıet jáne sport mınıstri Arystanbek Muhamedıuly mereıtoı ıesine Elbasy Nursultan Nazarbaevtyń arnaıy joldaǵan quttyqtaý hatyn oqyp berip, aqyn shyǵarmashylyǵy jóninde jyly lebizin bildirdi. Qurmetti qonaqtar qatarynda qatysqan Qazaqstan Jazýshylar odaǵy basqarmasynyń tóraǵasy, senator Nurlan Orazalın men Májilis depýtaty Qýanysh Sultanov, sondaı-aq, bulbul ánshi Bıbigúl Tólegenova sahnaǵa shyǵyp, qazaqtyń álemdik dárejege kóterilgen aqıyq aqynyn, aımańdaı azamatyn mereıtoıymen quttyqtap, ótken kúnnen estelik aıtty. Kúmis kómeı ánshi Roza Rymbaeva, «Jetigen» trıosy men basqa da óner juldyzdarynyń ónerin tamashalaǵan kesh qonaqtary Oljas aqynnyń poezııasynan sýsyndap, rýh alyp qaıtty.
Osy mereıtoı aıasynda Qazaqstan Respýblıkasy Ulttyq kitaphanasynda da saltanatty shara bolyp ótti. Memleket jáne qoǵam qaıratkeri Murat Áýezov júrgizgen alqaly jıynda belgili aqyn, «Juldyz» jýrnalynyń redaktory Ulyqbek Esdáýlet óleń oqyp, aqyn aǵasynyń shyǵarmashylyǵyna toqtalsa, Qazaqstan Jazýshylar odaǵy basqarmasy tóraǵasynyń orynbasary, aqyn Maraltaı Raıymbekuly óleń arnady.
Kezdesý aıasynda aqynnyń ár jyldary jazǵan súbeli týyndylarynan qurastyrylǵan kólemdi jınaq – «Oljas Súleımenov» dep atalatyn ǵylymı-kómekshi retrospektıvtik bıblıografııalyq kórsetkishtiń tusaýyn Qazaqstannyń halyq ártisi Asanáli Áshimov pen Qazaq KSR-iniń eńbek sińirgen sáýletshisi Shot-Aman Ýálıhan kesip, atalmysh jınaqtyń ult qundylyǵyn asqaqtatý jolynda asa qajetti kórneki qural ári qujattyq eńbek ekendigin atap ótti. Shyǵarmalar jınaǵyna aqynnyń qazaq jáne orys tilindegi úzdik shyǵarmalarymen qatar, tarıhı hronologııalyq sýretter de engizilgen.
Irgeli bıblıografııalyq jumys Qazaqstan Respýblıkasy Ulttyq kitaphanasynyń biregeı qorynyń negizinde jasalyp, tuńǵysh derekkóz Oljas Súleımenovtiń «Lıteratýrnaıa gazetada» Leonıd Martynovtyń sát sapary retindegi alǵysózimen 1959 jyly jaryq kórgen «Moı narod», «Voda», «V stepı» óleńderinen bastaý alǵan. Hronologııalyq derekkózder tizimi búginde aqynnyń 4000-ǵa jýyq jekelegen shyǵarmalary jáne ol týraly ádebıetter, ómiri men shyǵarmashylyǵy týraly materıaldar toptastyrylǵan bul súbeli jınaqta Andreı Voznesenskıı, Robert Rojdestvenskıı, Rımma Kazakova sekildi tulǵalardyń týyndylary álem ádebıetine engen kórkemsóz alyptary men qoǵam qaıratkerleriniń Oljas aqynǵa arnaǵan poemalary men óleńderi, jyly lebizderi bar.
Ǵylymı-bıblıografııalyq kórsetkish qazaq, orys jáne álemniń alýan halyqtarynyń tilinde jazylǵan eńbekterden turady. Aǵylshyn, fransýz, nemis, arab, bolgar, bengal, ıakýt, shved jáne basqa da tilde jan-jaqty sıpattalǵan eńbekti qurastyrýshy belgili shyǵystanýshy-ǵalym, professor Safar Abdýllo bul hronologııalyq kórsetkishtiń fılologtar, ǵylymı qyzmetkerler men zertteýshiler, kitaphanashylar men izdenýshi qalyń oqyrman úshin baǵa jetpes qazyna ekendigin jetkizdi.
Tusaýkeser aıasynda Qazaqstan Respýblıkasy Ulttyq kitaphanasy qorynan ásem bezendirilgen «Oljas álemi» atty akademııalyq kitap kórmesi uıymdastyrylyp, mereıtoı ıesiniń shyǵarmashylyǵy men ómirin qamtyǵan beınematerıal kórsetildi.
Qanat ESKENDIR,
«Egemen Qazaqstan»
ALMATY
Sýretti túsirgender
Iýrıı BEKKER,
Aıtjan MYRZANOV