Komıtet tóraǵalyǵyna qaıta saılandy

Grýzııanyń astanasy – Tbı­lısı­ qalasynda Dostastyqqa qa­tysýshy elder Temirjol kóligi jónindegi keńestiń 64-shi sessııasy ótti. Atalǵan shara aıasynda «Qazaqstan temir joly» UK» AQ prezıdenti Asqar Mamınniń tóraǵalyǵymen Transkaspıı halyqaralyq kólik dálizin (THKD) damytýdy úılestirý komıtetiniń kezekti otyrysy boldy. A.Mamın óziniń sózinde THKD-ni básekelestikke saı damytýdyń mańyzy zor ekendigin, onyń Eýrazııa qurlyǵyndaǵy bolashaǵy zor baǵyt bola alatyndyǵyn atap ótti. «Úılestirý komıteti qurylǵaly beri tıimdi tarıf saıasatyn jasaý, júkterdi tasymaldaýdyń biryńǵaı tehnologııasyn óndiriske engizý, birlesken yqpaldasqan logıstıkalyq Nomad Express ónimin qalyptastyrý, alǵashqy konteınerlik poıyzdy jiberý, Transkaspıı halyqaralyq kólik konsorsıýmyn qurý boıynsha qyrýar ister atqaryldy. Transkaspıı dálizine qatysýshy memleketterdiń qatary kóbeıdi. Búginde komıtette temirjol, teńiz, port ákimshilikteri, Qazaqstan, Qytaı, Ázerbaıjan, Grýzııa, Túrkııa, Ýkraına jáne Rýmynııa sııaqty memleketterdiń logıstıkalyq kompanııalary bar», – dep atap ótti A.Mamın. Otyrys barysynda THKD aýmaǵynda konteınerlik, vagondar, konteıner­lik tasymaldaýdyń básekelestikke saı mól­sherlemesin bekitý jaıy da qaras­tyryldy. THKD Úılestirý komıtetiniń ju­my­syn turaqty atqarý úshin onyń Úılestirý komıtetiniń turaqty shtab-páterin Astanada ashý ýaǵdalasyldy. Transkaspıı halyqaralyq kólik kon­sorsıýmynyń jumys kestesi bekitildi. Atalǵan baǵyt Qytaıdan Qazaqstan arqyly Kaspıı teńizi, Ázerbaıjan, Grý­zııa, Túrkııa, odan ári qaraı Eýropaǵa tartylady. THKD Eýrazııa qurlyǵyndaǵy konteınerlik tasymaldaý áleýetin damytý arqyly saýda qatynasynyń óristeýine jol ashady. Otyrys barysynda «Qazaqstan temir joly» UK» AQ prezıdenti Asqar Mamın biraýyzdan Transkaspıı halyqaralyq kólik dálizi (THKD) úılestirý komıtetiniń tóraǵasy bolyp saılandy.  «Egemen-aqparat»