Qaraǵandy qalasynda Arqa shertpe kúı óneriniń alyby, kúıshi-kompozıtor Aqqyz (Múgilsim) Ahmetqyzyna arnap ótkizilgen kúıshiler saıysy kelesi kúni gala-konsertke ulasyp, ónersúıer qaýym aıta júrerlik ulyq merekege aınaldy. Sharany uıymdastyrýshy Bolat Tákishovtiń aıtýynsha, bul ıgi is áıgili kúıshiniń kelesi jyly bolatyn 120 jyldyq toıyna daıyndyqtyń basy eken.
Kenshiler astanasyndaǵy mamandandyrylǵan mýzyka mektep-ınternatynda ótken kúıshiler jarysynda qazylar alqasyna Qazaqstannyń eńbek sińirgen ártisi, kúıshi-kompozıtor, Gýmanıtarlyq ǵylymdar akademııasynyń akademıgi Seken Turysbek tóraǵalyq etti. Qazylar alqasynyń quramynda mýzyka zertteýshi Jarqyn Shákárim, Qazaq ulttyq óner ýnıversıtetiniń professory Janǵalı Júzbaı, Aqqyz murasyn zertteýshi Bolat Tákishov, ustaz Jeńis Sársembekov sııaqty kúı áleminde iz tastaǵan belgili tulǵalar boldy.
Eki kúnge sozylǵan saıys qorytyndysynda 12-14 jas aralyǵyndaǵy balǵyn kúıshiler ishinde birinshi júldege Aıana Satanova laıyqty dep tanyldy. Al 15-17 jastaǵy kúıshiler arasyndaǵy negizgi synda bas júldege baǵy janǵan Baljan Serikbolqyzy ıe boldy. Jeńimpazǵa 100 myń teńgeniń sertıfıkatyn Májilis depýtattary Nurlan Dýlatbekov pen Aıgúl Soloveva tabys etti.
Shara barysynda professor Janǵalı Júzbaıdyń redaktorlyǵymen jaryq kórgen «Aqqyzdyn kúı murasy» atty kúıtabaq albomjınaǵynyń tusaýy kesildi jáne ustazdarǵa sheberlik synyby ótkizildi.
Kúı saıysynan keıin Kenshilerdiń mádenıet saraıynda ótken gala-konsertte konkýrsanttarmen birge Seken Turysbek, Janǵalı Júzbaı, Dánıel Hamzın, Qaırolla Sádýaqasov, Gúlnar Sharıpova syndy esimderi elge belgili kúıshiler sahna tórine shyǵyp,tyńdarmannyń qulaq quryshyn qandyra kúı shertti. Aqtoǵaı aýdanynan kelgen «Toqyraýyn tolqyndary» án-bı ansambli óner kórsetip, ánshi Dáýrenbek Árkenov Aqqyz (Múgilsim) Ahmetqyzynyń ánderin shyrqady.
Aıta ketetin jaıt, búgingi kúnde Aqqyz kúıshiniń toǵyz kúıi oryndalyp júr, segiz kúıi notaǵa túsken. Sonymen qatar, kúıshiniń tórt áni bar, sonyń biri – «Aman bol, amal qansha» ánin belgili ánshi Manarbek Erjanov oryndaǵan.
Gala-konsertte sóz alǵan belgili kúıshi Seken Turysbek Aqqyz kúıshiniń qazaq mýzyka óneriniń damýyna qosqan zor úlesine, sońyna qaldyrǵan mol murasyna joǵary baǵa bere kelip, onyń esimin Qaraǵandydaǵy mamandandyrylǵan mýzyka mektep-ınternatyna berý týraly oryndy usynys aıtty. Sondaı-aq, óner zertteýshisi Jarqyn Shákárim áıgili kúıshi atyndaǵy konkýrstyń aıasyn keńitip, respýblıkalyq deńgeıde ótkizý týraly paıymdy pikirin bildirdi.
Qaırat ÁBILDINOV,
«Egemen Qazaqstan»
QARAǴANDY