Keshe Prezıdent janyndaǵy Ortalyq kommýnıkasııalar qyzmetinde «KEGOC» AQ basqarma tóraǵasy Baqytjan Qajıevtiń qatysýymen «Elektr energetıkasy ınfraqurylymyn qalyptastyrý – Qazaqstan Respýblıkasy ekonomıkasynyń turaqty damýynyń mańyzdy faktory» taqyrybynda brıfıng ótti.
Kompanııa basshysy ótken jyly «KEGOC» AQ júıelik operator retinde elimizdiń birtutas elektr energetıkasy júıesiniń tıimdi jumys isteýin qamtamasyz etkenin habarlady. Sonymen qatar, osydan bir jyl buryn atalǵan kompanııanyń óńiraralyq deńgeıdegi jeliler arqyly elektr energııasyn jetkizý qyzmetiniń kólemi 37,9 mlrd.kVt/saǵ. quraǵanyn atap ótti.
Belgili bolǵandaı, 2015 jyly elektr energııasyn jelige bosatý men tutynýdy tehnıkalyq dıspetcherlendirý qyzmetiniń kólemi 82,8 mlrd.kVt/saǵ. jáne elektr energııasyn óndirý – tutynýdy teńgerimdeýdi uıymdastyrý qyzmeti 157 mlrd.kVt/saǵ. quraǵan. Elbasynyń Jarlyǵymen bekitilgen elimizdiń «jasyl ekonomıkaǵa» kóshýi jónindegi tujyrymdamaǵa sáıkes, kún men jel elektr stansalarynyń elektr energııasyn óndirýdiń jalpy kórsetkishindegi úlesin 2020 jyly 3 paıyzǵa jáne 2030 jyly 10 paıyzǵa jetkizý mindeti turǵanyn atap ótti. Osy rette ol «KEGOC» AQ kún men jel elektr stansalary óndiretin barlyq elektr energııasyn bir ortalyqtan satyp alatyn «JEK qoldaý jónindegi qarjy-esep aıyrysý ortalyǵy» JShS-ni qurǵanyn tilge tıek etti. О́tken jyldyń qorytyndysy boıynsha qarjy-esep aıyrysý ortalyǵy jalpy somasy 5,5 mlrd. teńgeni quraıtyn 200 mln. kVt/saǵ.-tan astam «jasyl» energııa satyp alǵan. Al bıyl atalǵan kórsetkishterdi eki esege arttyrý josparlanýda.
Brıfıng barysynda jumys istep turǵan energııa nysandaryn jańǵyrtý jáne ınfraqurylymdy damytýǵa baǵyttalǵan jobalardy atap ótken kompanııa basshysy alǵashqy baǵyttaǵy jumys sheńberinde 2000 jyldan bastap KEGOC asa aýqymdy «Ulttyq elektr toraptaryn jańǵyrtý» jáne «UET-ni jańǵyrtý, II-kezeń» jobalaryn júzege asyrdy, nátıjesinde, energııa júıesiniń tıimdi jáne ornyqty jumysy qamtamasyz etilip, qosalqy stansalardyń jabdyqtaryndaǵy tehnologııalyq aqaýlardyń sany 4 esege azaıdy, tutynýshylardy elektrmen jabdyqtaýdyń senimdiligi men sapasy jaqsardy, dedi. Sondaı-aq, qazirgi ýaqytta KEGOC Elbasynyń tikeleı tapsyrmasymen «Nurly Jol» memlekettik baǵdarlamasy sheńberinde KEGOC tarıhyndaǵy eń aýqymdy «500 kV-lyq Soltústik-Shyǵys-Ońtústik ÁJ tranzıtin salý» jobasyn iske asyrýda. Jobanyń birinshi kezeńi boıynsha «500 kV-lyq Ekibastuz – Semeı – О́skemen ÁJ-in» salý jumystary kún tártibinde tur. Atalǵan jelini iske qosý «Soltústik-Shyǵys» baǵytyndaǵy jelilerdiń ótkizý qabiletin aıtarlyqtaı arttyrady. Shyǵys Qazaqstan oblysynyń tutynýshylary tikeleı Qazaqstannyń elektr energııasymen qamtamasyz etiletin bolady, qazirgi ýaqyttaǵydaı Reseı aýmaǵy arqyly ótetin búginde paıdalanylyp otyrǵan tranzıttik jelilerdiń jaı-kúıine táýeldi bolmaıdy.
Elmıra MÁTIBAEVA,
«Egemen Qazaqstan»