Brıýsselde Eýropalyq odaq pen Ortalyq Azııa elderi arasynda saıasat pen qaýipsizdik máseleleri týraly joǵary deńgeıdegi únqatysýdyń úshinshi otyrysy ótti. Onyń aldyndaǵy basqosýdyń tájirıbesi jalǵastyryla otyryp, únqatysýǵa arnaıy qonaq retinde Aýǵanstannyń ókilderi shaqyryldy.
Qazaqstan tarapyna Syrtqy ister mınıstriniń orynbasary Roman Vasılenko jetekshilik etse, quramynda Syrtqy ister, Ishki ister mınıstrlikteri men Ulttyq qaýipsizdik komıtetiniń ókilderi boldy. Eýropa delegasııasyn Eýropa Syrtqy áreketter qyzmeti Bas hatshysynyń orynbasary Helga Shmıd basqardy.
Kezdesýge qatysýshylar Eýropalyq odaqqa, Ortalyq Azııaǵa jáne Aýǵanstanǵa qatysty negizgi máseleler boıynsha pikir almasty. Taraptar 2015 jyly naýryzda Dýshanbe qalasynda ótken kezdesý barysynda qol jetkizilgen kelisimderdiń iske asyrylý barysyn, sondaı-aq, radıkalızm men terrorızm qaterine qatysty syn-tegeýrinderdi talqylady.
Eýropalyq odaqtyń jańartylǵan BOMKA jáne KADAP óńirlik baǵdarlamalary sheńberinde shekarany basqarý men esirtkiniń zańsyz aınalymyna qarsy kúres salalaryndaǵy yntymaqtastyqty nyǵaıtýǵa, sondaı-aq, Eýropalyq odaqtyń Aýǵanstan shekarasyn basqarý jónindegi BOMNAF baǵdarlamasy sheńberindegi ózara is-qımyldy kúsheıtýge erekshe nazar aýdaryldy.
EO – Ortalyq Azııa pishimindegi únqatysý ózara qyzyǵýshylyq týdyratyn saıası jáne qaýipsizdik máselelerin talqylaýǵa jáne olardy sheshýge arnalǵan tıimdi alańǵa aınaldy. Aýǵanstan ókilderiniń otyrysqa qatysýy óńirdegi jaǵdaıdy meılinshe keń turǵyda qarastyrýǵa, sondaı-aq, Ortalyq Azııa elderine, EO men Aýǵanstanǵa osy memlekettiń odan ári ornyqty damýy úshin jaǵdaılar jasaý boıynsha birlesken qadamdaryn talqylaýǵa múmkindik berdi.
Is-shara barysynda R.Vasılenko Aýǵanstandaǵy jaǵdaıdyń damýy negizinen Eýropalyq odaq pen óńirdegi kórshi memleketter sııaqty múddeli syrtqy aktorlardyń eldi qaıta qurý úderisine qatysýǵa degen qyzyǵýshylyǵynyń deńgeıine táýeldi bolyp tabylatynyna senimdi ekenin bildirdi. Biz ústimizdegi jyldyń kúzine josparlanǵan Aýǵanstan boıynsha konferensııanyń qorytyndylaryn asyǵa kútýdemiz. Eýropalyq odaq pen oǵan múshe memleketter osy eldiń odan ári damýyna eleýli qarjylyq jáne tájirıbelik úles qosatynyna senimdimiz», – dedi Qazaqstan Respýblıkasy Syrtqy ister mınıstriniń orynbasary.
Únqatysýǵa qatysýshylar óńirdegi kóliktik-tranzıttik múmkindikterdi damytý máselelerine, sondaı-aq, Qazaqstannyń «Nurly Jol» ınfraqurylymdyq baǵdarlamasy men Qytaıdyń «Jibek jolynyń ekonomıkalyq beldeýi» atty baǵdarlamasyna, «Batys Eýropa – Batys Qytaı» avtokólik dálizi jáne t.b. iri jobalardyń úılesimdi tolyqtyrylýy men keleshegine erekshe nazar aýdardy.
«Egemen-aqparat»